- الصراحة في تلك اللحظه شكيت بزوجتي انه حطتن بلى ( واحد موسوس )ههه
- المسكين له مده طويله والا هالحين ما تعلم انجليزي من الشباب اللي معه .
بسم الله
هذه قصتي وكيف بدأت
أولاً انا معلم حاسب آلي ولي سوابق باللغة يعني سافرت قبل كذا ، الى بريطانيا وخذيت دورة شهر انجليزي ولي ممارسات في اللغة بسيطة ( يعني اطقق لغة ) .
المهم اني بغيت اقوي شوي لغتي ففكرت اسافر الى بريطانيا ولكن ردني الاحداث اللي صايره بالعالم وكره الغرب للعربي والمشاكل كلها وخصوصا ( تواجد العرب بكثره في كل جحر في بريطانيا )
يوم من الايام قال واحد من زملاي ليش ما تروح نيوزلاندا ؟ الصراحة كنت احسب نيوزلاندا في اوروبا وان لغتها الام ليست الانجليزية ، بديت افكر اني اخليها لغة مع سياحه فبدأت ابحث واجمع معلومات عن هذا البلد
( نيوزلندا )
بحثت في الانترنت ووجدت هذا المنتدى الغالي علي
وفادني كثيرا خصوصا الاعظاء اللي سافروا قبلي
وبحثت عن مدن وتعرفت على الخرائط النيوزلنديه والاماكن السياحية زالمناخ ..... .
قررت ان اذهب اليها ، فراسلت المعاهد هناك وكانت صيغ الايميل المرسل لهم واحده وهي :
- ______________________________
Hello..
I am looking for English institute or schools , I'm from SAUDI ARAB
I will arrive NEWZEALAND in 4 JUL 2005 .
can you please tell me about fees :1- tuition full time
2- homesty ( any optional but neer from school)
weeklywithout pick-up airport ,
how many arab students in school
please ..thanks to you
alshammari
وكانت الردود ممتازه ، كانت واضحه وسريعه
المضحك في الامر كانوا يسألوني هل انا بنت والا ولد ههه لأنهم مايعرفون اسامينا .
المهم خذيت العناوين والارقام وحفظتها في دفتر نوته خذيته معي وخزنت بالجوال كل الارقام مع الايملات
أكثر ماعقدني في البحث ان كل معهد اراسله يقول فيه عرب واحد او اثنين واذا مافيه قال يمكن يجون الشهر الجاي ،
اثرينن ابحث في المعاهد اللي باوكلاند وطقتها يعني ابحث باللي كل الناس تبحث فيه ، المهم قمت ابعد شوي عن اوكلاند فكرت في كرست شارج
فاكتشفت انها مدينه كبيره يعني لوما لقيت سعودي بالمعهد راح القاه عند باب المعهد ينتظرني ههه
او القاه باحد المطاعم وناخذها طهبله .
المهم .... قرب السفروانا ما حددت مصيري وين وبأي مدينه ، ،، بأثناء الزحمة اللي انا فيها طلع واحد من زملاي الغالين بالحيل
وقال ابي اروح معك ؟!!! ههه
ههه هالحين انا هاج من السعوديين في نيوزلندا ، أقوم اجيب معي واحد في واحطه معي بنيوزلنده ههه
ههه
قال ابيك بس تساعدني بالحصول على المعهد والعائله ولا أعرفك ولا تعرفني ( لأنه هو خابر اني ما أبي العرب ولي خبره بالسفر وشوي لغه على الاقل احسن منه )
قلت خلاص على الاقل القى لي خوي بهالطياره عشرين ساعة ماهي هوينه.
=============
مشينا
من حائل العصر وصلنا الرياض العصر ورحنا للخطوط الاجنبيه بالمطار برضه العصر وانتظرنا حتى الساعة الثانية بالليل
واقلعت طائرة الايرباص للكاثي باسيفيك الى هونج كونج وصلنا الساعة ما أذكر بالضبط بس حوالي الساعة 7 سبع الصبح بتوقيتهم
المهم نزلنا وكنا خرمانين دخان نبي ندخن عقب هكالاكل الزين اللي تعشيناه مدري افطرناه .
ابي اولع زقاره بس ما شفت احد يدخن استغربت معقوله ما فيه أحد يدخن والله واشاور خويي قال ما أدري خل اندخن
واشوف الا اللوحات التحذيرية من التدخين في كل سيب وجدار وزاويه قلنا يمكن
المنطقه هذي بس اللي ممنوع فيها التدخين ، ونمشي ونمشي الا والله كل المطار والله وانا أوقف هكالموظف واسأله وين اقدر ادخن قال هناك غرف خاصه بالمدخنيين ويدلني على وحده وفعلا جينا وليقنا الناس زحمه وضرب من هالزقاير ههه
يلعن ام النظام ما أروعه غرف للمدخنين :::::::::::::: ( بالرياض تطفي الزقاره عند باب الطياره قبل لا تصعد ) ههه
بعد ما عدلنا الراس رحنا تمشينا بالمطار لان الوقت كان ست 6 ساعات في مطار هونج كونج ثم الاقلاع الى اوكلاند
تمشينا و تمشينا وكلينا وملينا ما فات ساعه ونص المهم لقينا حاجه كأنها فندق مصغر ( سنع استراحه) حمام دش يعطوك منشفه وتدخل تتروش ومساج واجهزة كمبيوتر انترنت وبوفيه مفتوح ،،،، يعني مكان ترتاح فيه بدل شحططة المطار خذناه الساعة 16 دولار امريكي للشخص.
ريحنا وصورنا واستانسنا حتى جاءت ساعة الاقلاع اذكر اننا صلينا الظهر والعصر بالمطار والمغرب والعشاء بالطياره .
ركبنا الا والله الركاب غير جو هالانجليز الحمر العطر خصوصا ان اغلبهم تجار اللي رايح يعقد صفقه بالصين واللي رايح يجيب بضاعة واللي رايح ياخذها سياحة يشوف سور هونج كونج العظيم ( واحد مكبرها )ههه
انا ورفيقي اتفقنا اننا نبعد عن بعض من هالحين علشان نحتك اكثر والواحد ياخذ راحته في الكلام والكذب ههه
المهم انا جلست بجنب واحد لحيته طويله وهو ضخم الجثه و لبسه كنه رثه المهم انا أهوجس اسولف معه والا اتوهق ما أعرف وش يقول الصراحة متردد ، يوم جابوا الاكل وقام يأكلصار فيه شوي حركه كلمه مني وكلمه منه اسكيوزمي لامنه بغى يطلع ...وهكذا يوم جا الشراب هو يطلب رد واين .. والله هو يسفهل وهو يقوم يرطن علي وخذ يا سوالف خذ يا حكي لالوللاولاوللالووللاولوللوللاللاوللالالولالولالو للاول حتى أوجعني راسي ههه
المهم طلع دكتور بجامعة أو كليه بمدينةكوين تاون اذا ما نسيت في الجنوب ، ايوالله وادردش انا وياه واخذ علوم الجو والناس واسأله عن المواصلات وكيف التنقل كلمة يفهمني وثلاث من جنبها ههه
نمت باطيارة وقمت وتابعت فلم ونمت وتابعت مباراة ومليت وانغثيت واندبلت تسبدي ونمت وصحيت ............... ممله
وصلنا نيوزلنده بلد الاحلام
الاحلام
يالله وش هالجنه كل التعب اللي عانيته راح بح جاني نشاط غريب قمت بس اتلفت اتحرى متى نهبط واحول على الارض
البحر صافي
الارض خضراء
نزلنا المطار قال رفيقي خل كل واحد لحاله احسن علشان ما يقولون وين الاوراق ويغثوننا قلت طيب ما عندي مشكله
ترى يوم حنا بالطياره عبينا أوراق تبين وش معك من ممنوعات أكل دخان وغيره وبيانات كامله ليش جاي للدراسة والا للسياحة اذا كان للدراسة بأي معهد وكم المدة وترفق الاوراق .
المهم صفينا بالسرى ... ننتظر دورنا يو وصلني الدور قالتي الموظفه تعال معي والله وأمشي معه لين دخلتني زي العزله خشب راقي وفيه طاوله كبيره عليها الشناط وفيه كمبيوتر
وراحت وجاني واحد وأول سؤال سألني : انت اللي موظب ومرتب شناطك بنفسك والا فيه احد ساعدك ؟
الصراحة في تلك اللحظه شكيت بزوجتي انه حطتن بلى ( واحد موسوس )ههه
قلت انا مرتبها بنفسى وابتسمت ، قال وهو يضحك اكيد ؟ قلت اكيد وانا اقوم اب اساعده في فتح الشناط زقرني وقال بسرعة لالالا دونت تاتش اني ثينك بالانجليزي
المهم هن كلهن شنطتين واحدة كبيره اللي تسحب وواحده صغيره حقت ظهر ،،،، جلست وقام يمسد من هالملابس وهالاغراض وهو يطلع كروز الدخان وهو يحطهن على جنب ، وهو يطلع دفتر نوته مسجل فيه المدن والعناوين وهو يحطه على جنب ، وهو يطلع مصحف القرآن الكريم طبعة جيب صغيرة وهو يحطه على جنب ( قلت قعدنا به )!!
قال من وين شريت الدخان؟ قلت من حايل . قال وشي حايل ؟ قلت معليش اقصد السعوديه . ههه
قال بكم شريت الكرز ( الكرتون ) ؟ قلت 64 باربع وستين ريال ( ديفد اوف). قام يحسب بالاله الحاسبه . قال انت تدري انه ممنوع ؟ قلت وشو الممنوع انك تجيب اكثر من كرز واحد .
قلت لا . قال اما انك تدفع الفرق لكل كرز ، والا يتم اتلافهن امامك الان .
والله وانا احسبها : لو اتلفتهن راح اشري دخان بعدين وراح يكون غالي لكن خل ادفع الفرق احسن لي ودخان اخبره يمكن ما القى نفس النكهه المهم ، قلت ابي ادفع الفرق
وهو يحسب بالاله الحاسبه قال المبلغ ......... دولار نيوزلندي نسيته بس اذكر اني حسبت الدخان اربع 4 كروز بثمانمئة ريال سعودي تقريبا 800
والله وانا اكر المبلغ كان معي دولار امريكي قال تعال معي وخلينا الشناط والحوسه على ماهي عليه ورحنا يم صراف بنك قريب وحولت الدولارات الامريكيه الى دولارات نيوزلنديه يوم قضيت وهي تطري علي فكر ( قلت اصبر هذي فرصه احول اللي معي وانا والله اكاسر الصراف واحول حول ثمان مية 800 دولار امريكي الى نيوزلندي قام يضحك الموظف اللي يفتش علي وقاللي حركة ذكية سمارت دوينج ( انا الى هالحين ما ادري وش العمل الذكي اللي انا سويته ) ما أدري المكاسر والا الصرف في وقت التفتيش ولا همني والا اني دفعت الفرق للدخان ما اتلفته .... ما أدري .
المهم رجعنا الى حوستي واستلم الدفتر قام يقرأ الا مدن وشوارع يعرفها هو ، قال ليش مسجل اسماء المدن هذي؟ قلت علشان ازورها . راح ونادى وحده دبى وقام يوريها الدفتر ويشاورها ، سألتني أنت جاي تدرس والا سياحه ؟ قلت سياحة مع ممارسة اللغة .
راحت ، وهو يأخذ المصحف وقال ماهذا ؟ قلت هذا القران الكريم هولي كوران ، على طول نزله وقال وقع وانا اوقع على ورقه حقت المبلغ للدخان وتعهد اني ما أجيب دخان مره ثانيه .ههه
سالني وين تبي تسكن قلت بأي فندق بأوكلاند ، ضف شناطي بنفسه ( بس هالمره ساعدته انا ) وقاللي شف رفيقك ينتظرك ههه ههه وشلون؟؟؟ قال يور فند وايتنج يو.
ههها الا رفيقي فاقشها ومعلمهم بكل شي توهق وبجه .ههه
مشينا شوي شوي نتلفت ما ندري وين نروح ونطب على زي الاسواق بالمطار وشوي الاهذا السفر والنور يوم طلعنا الا.............
الهواء اللي الى اليوم ما في حياتي شميت زيه . هواء اذا ضاق صدري تخيلته يتوسع .
هواء يسحر اللي يشمه مايقدر يفارقه بعدين ( مثل مية النيل )هههبالصدفة ........... والصدفة البحته المعفنه
حنا ما درينا أثري : ((( فيه واحد يقرب للي معي(رفيقي ) قال لواحد في نيوزلاندا على موعد رحلتنا،،،، الرجال اللي في نيوزلندا سواها مفاجئة وانتظرنا في المطار
طبعا مافي مشكله عندهم يقدر يجيب متى تقلع الطياره ومتى تاصل المهم عنهم نظام غريب يساعدهم في مثل هالامور....كان الرجال اسمه ابراهيم ومعاه واحد اسمه سامي ابو داوود معه جنسية نيوزلندية (يقول انه شمري رمالي وهو عايش هنا من زمان ) لهجته مكسره فعلا شوي يخش كويتي شوي عراقي شوي بدوي شوي شمري شوي لبناني الرجال فعلا تحس انه مولود في نيوزلنداالمهم سلمنا عليهم وقلنا ليش التعب والكلافه ، جينا السيارة الا وفيها ثلاث شباب سعودين (ههه) وحنا نركب الصراحة اختلطت دمعة الفرحة مع الحزن ، مابين النظره الاولى للطبيعة وديرة الاحلام وفرحة الوصول وبين الشباب السعودي اللي انكب علي فجأة وانا هاج عنهم.
سألنا ابو داوود ويش تبون تسون هالحين ؟ قلت انا بسرعة ابي انام . ضحكوا وقال تبون فندق والا عائلة والا باك بيكرز ؟ قلت باك بيكرز ( لأني خابر بالانترنت هو مكان مختلط غرف زي البانسيون عند المصاريه) اذكر الوقت كان بعد الظهر تقريبا ، مر الموتيل الاول مافيه ( طبعا معارفه يتعامل معهم ) ومر الموتيل اثاني ما فيه ، وراح بنا لشارع الكوين ستريت ، قال بس ابي امر المعهد حقي ونروح ناخذ لكم غرفة تريحون نزلنا قلنا معه ، وحنا نمشي بالشارع كل شوي نلقى شباب سعوديين ويسلمون علينا واللي عند القهوه يشيش واللي واقع يتفرج على العالم واللي شله يمشون ويشمتون بهالخلق ( المهم حسيت اني مسافر للرياض) ، و
وصلنا المعهد للدور السابع على ما أذكر ودخلنا الا : هلا ابراهيم هلا خالد هلا طلق هلا ابو مهند ..... كله ربعك ههه
خذينا شوي ما أدري وش سوى ابو داوود ونزلنا ( الظاهر انه متعمد يورينا الفله والاغراءات ويورينا انه واصل وعند معهد وكل الطلاب عند هو اللي مدبرهم ومساعدهم لأن كل ما يواجهه واحد يسأله ( هاه ابو داوود وش سويت باللي انا قلتلك ) وهذا يسأله ها فتحتلي حساب بالنك وهذا يسأله كلمت المعهد الفلاني ...... الخ)
المهم وقف عند هاك الكبينه وهو يفتح اليلو بيج كتاب الصفحة الفراء ( كتاب عندهم فيه كل شي تبيه يعني دليل متكامل ) وهو يأخذ كم عنوان وهو يتصل وهو يودينا يم هاكالموستيل ( سنع فندق ) اكبر من الباك بيكرز واصغر من الموتيل وحجزلنا واعطانا رقم تلفونه وقال انا بكرى اتصل عليكم او اتصلوا علي ....
ونروح وندخل الغرفة الا سريرين فوق بعض ودولاب ودفايه ونافذه وباب بس كنها قصر ( شعور اوروبي) .
نمنا يوم جاء من باكر الصبح الساعة سبع 7 وحنا نلبس ونطلع ندوج ونتمشى وشوي تمطر وشو تطلع الشمس وشوي تمطر جو ما أنساه .... المهم خذينا جوله وعرفنا وين حنا فيه وش بعد ابو داوود عنا وعرفنا الاسواق ونروح نشرى شرايح جوال فودا فون ونشحنها ونكلم اهلنا ونبكي انهم عايشين بالحر والغبار ، امزح هههالمهم ..... جاء الظهر وانا ازهم على ابو داوود هاه ابو داوود نبي معهدحلو مافيه عرب ( ترى امس قالنا انا ادبركم بالشروط اللي تبونها وارخص الصراحة فرحنا ورفيقي قال كلها خيره اللي واجهناه)
المهم قال تجون بكرى للمعهد قلت طيب ، يوم جاء بكرى ونركب باص اللي يودي للكوين ستريت
طبعا اخذت العنوان امس وندخل عليهم وين ابوداوود قالوا شوي ويجي وندق عليه جوال قال انا مشغول لكن عطني السكرتيره اللي في الاستقبال واعطيه وكلمها وقال هي اللي تسنعكم وانا بكره اكلمكم سلام سلام .
وهي تقوم الموظفه ( من جنسية شرق اسيويه) وتبحث بالانترنت عن معاهد وتتصل عليهم وتسأل عن الاسعار وهل فيه عرب ( يعني مثل ما سويت انا في بيتنا بالسعودية )
المهم قالت لنا كم معهد ما يصلحن اللي فيها عرب واللي قريبه من الشارع العربي ( كوين ) واللي غالي تسعيرة الانترنت ، قلت لها شكرا وطلعت زعلان على هالوقت والتأخير اللي راح بس كذا بدون فايدة .
قلت لرفيقي هاه وش رايك ؟ قال خل انشوف معهد هنا مافيه سعوديين اقرب وازين والمدينه عرفناها .ولو انزنقنا في مصيبه لاسمح الله الا ابو داوود فيه ..
قلت طيب ( انا الصراحة بيّت النية على الهجه من أوكلاند بس قلت ابي اضبط وضع رفيقي واهج )
يوم بكرى وحنا نشد ندور معاهد مافيها سعوديين او عرب وبالصدفه نلقى ياباني بالباص يدر لغة واقوم انشده عن معهده قال مافيه عرب ، وين؟ قال انزلوا معي .
ونروح معه للمعهد وفعلا مافيه ولا عربي بس كله يابانيين .! وقريب لشارع الكوين يوم طلعنا من المعهد الا هذا واحد سعودي ( يعني كنك يابوزيد ما غزيت )
قعدنا نسولف معه قال انا توهقت بالمعهد ، دفعت حق المده كامله ويوم جيت ابي اغير رفضوا ... ونصحنا وهو يتحسر لا تأخذون اكثر من اسبوعين ويقول هجوا عن اوكلاند
المسكين له مده طويله والا هالحين ما تعلم انجليزي من الشباب اللي معه .
المهم رجعنا للسكن وقلت لرفيقي انا بكرى ابي ادور لي ديره ثانيه معي عناوين ومدن لازم امرها وفيه معاهد مراسلهم بالانترنت وينتظروني اجيهم ومعطيني خصم لازم اسافر لهم وبعدين هذا فايدة السفر مو بس تتعلم لغة تتعلم حياة جديدة وتتعلم كيف تتعامل مع البشر وتكسب اساليب وتكسب مهارات حياتيه جديده ، وبعدين ماهي مكلفه ولا متعبه المسأله باص ينقلك بين المناظر الطبيعيه أو طائرة الموضوع سهل جداً ....
من بكرى وبعد تفكير عميق ومتعب وتخطيط محكم رحت السنتر وقصيت تذكره على تاورانقا(( طبعا وقع اختياري على تاورنقا لسببين ،1- لأنها الأقرب محطة من أوكلاند 2- لأن ما فيها عرب ابد ابد لا الديره ولا المعاهد))
كله على الخريطه ، وين اروح ومن وين ابدأ والانترنت ما قصرت يعني ما تبلش ابد .
المهم قصيت تذكره وقالوا لي ما فيه حجز الا المغرب قلت لا ابي بكرى الصباح علشان اشوف المناظر الطبيعيه على الطريق واتفرج ( قيمة التذكرة 13 دولار والرحلة تستغرق 4 ساعات مع الوقفات ) المهم صارت هالتأخيرة خيرة قرر زميلي انه يسافر معي بشرط انه يكون بمعهد وانا بمعهد وهو بعائله وانا بعائله ولا نشوف بعض الا بالويك اند العطلات الاسبوعية .
وصلنا تاورنقا وسألت سواق الباص عن اقرب سكن اشر عليه ورحت انا ورفيقي وخذينا غرفه :
( دخلنا .... هيللوو .....هاي .... مافيه احد . قلت لرفيقي خلك عند الشناط والله واروح الف بالمكان الا فيه صاله فيها اربع اجهزة كمبيوتر وبلياردو وثلاجه كبيره اللي تحط فيها فلوس وتعطيك بيبسي ههه وفيه بآخر الصاله كنبات وكراسي وطاولة تلفزيون ورسيفر ومن وراه المطبخ كبير المهم جيت الا فيهبنتين وثلاث شباب جالسين قلت وين صاحب الهوتيل قامت هاكلمزيونه وهي تجي يم الاستقبال وتقوم تصوت وتدعي صاحب المحل مارد احد قالت وشتبون قلت نبي غرفه قالت ابعطيكم غرفه وذا جاء صاحب المحل تتفاهمون معه قلت طيب مشكوره ، والله هي تدبك وتفزع وتروح تختار لنا غرفة وتضبط الوضع وحنا نحط اغرضنا ونقفل الغرفه ونطلع نتمشى ونستكشف المدينه ( اشوف وين المعاهد اللي انا اراسلهم بالانترنت وعناوينهم وناخذ خريطة للمدينه الا هذا الشارع اللي عليه المعاهد ،،، الاهذا شارعنا اللي حنا واقفين فيه كل شئ بالخريطه مافيه ضياع ماخوف الامور سهله بس حنا الله يهدينا ... ونمر المعهد الاول طبعا معي دفتري اللي مكتوب فيه كل شئ
يوم دخلنا عليهم بالاستقبال وهو يقوم الموظف وقال هللو مستر الشمري ( بعدين سألته كيف عرفت اسمي قال من وجهك انت عربي و((((( أول ))))) عربي يجي عندنا بالمعهد والتاريخ حول الحروة يقصد تاريخ جيتي ) وهو يجيب هكالورقة الا رسالتي اللي ارسلتها لهم بالايميل ، وحنا نجلس ويقوم يقرق علينا عن المعهد ومميزاته وياخذنا جوله على الفصول ، وسألته عن الاسعار واعطاني خصم حلو غير الاسعار اللي ناشرينها بالانترنت ، وانا اسجل الاسعار واكتب كل شئ بالدفتر معي ، قدامه وبالانجليزي ( هي كلها ارقام ما يبيلها انجليزي )
وقلته ابي اشوف المعاهد الثانيه وافكر ( كذا كاش ما عندي به ) ما انت بحاله حتى هو قال من حقك وقال : بعد ما تشوف المعاهد الثانيه وترجع لك خصم آخر. ( لو عندنا وترجع له يقول تغير السعر ويزود عليك لأنك ما رجعت له الا انك منحد عليه )
المهم . رحنا للمعهد الثاني( الغريبه ان المعاهد في أغلب مدن نيوزلندا تكون في شارع رئيسي واحد أو قريبه للشارع نفسه ، مدري ليش يمكن شغلة بلديه )
والثالث والرابع والخامس بدون مبالغه خمس معاهد بنفس الطريقه اسجل بالدفتر وامشي واخلهم .
رجعنا للسكن وارتحنا وتشاورنا ، قال رفيقي انا ابي المعهد الفلاني سعره كذا واعجبني المهم اختار هو معهد وانا اخترت معهد ثاني يبعد عنه حوالي 3 ثلاث كيلو متر في نفس المنطقه
يوم جاء من بكرى وهو يروح الى معهده وانا رحت لمعهدي البسيط المتواضع اللي ما فيه الا ثلاثة فصول والفصل فيه 5 خمس طلاب وقعدت شهرين ما شفت العربي ماغير رفيقي كل اسبوع مره .
يوم درست يومين قلت للادارة ابي عائلة دورولي على رخاء عائلة عندهم انترنت وقريبه من المعهد ، يوم جاء بكرى قال المدرس لاتروح بعد الحصه حصلت لك عائله وابيك تروح معي تشوفهم قلت طيب ، رحت الا هاكالعائلة اللي ما عندك احسن منهم وبيت شرح يطل على ملاعب قولف بس اثر عندهم كمبيوتر وما عندهم اتصال انترنت قاطعينه او ما دري وش قصتهم قلت ما ابيهم قال خلاص بكرى ، يوم جاء بكرى قال لي فيه عائلةعندهم انترنت بس عندهم( ليتل دوق) كلب صغير ضحكت وقلت ماهي مشكله نشوفهم ( يحسب اني مابي الكلاب خايف مايدري انه علشان الطهاره)
واركب معاه ونروح يوم دخلنا الا هكالعجيّز ترحب وتهلي وهكالبيت المحترم وهاكالجاز اللي مايفصل انترنت واجي لغرفتي فيها سريرين قلت معي احد بالغرفه قالت لا مافيه الا انت هذه غرفة عيالي رايحن او مسافرين المهم صرفتني وقالت كل الغرفة لك خذ راحتك بالبيت كله يوم جينا نبي نطلع انا والمدرس قالها الطالب هذا ( يغز علي ) مايحب الكلاب يخاف منها حاولي انك تبعدينه عنه ( ابتسمت ) وقالت اولا الكلب صغير وحبوب (بوبي ) وثانيا انا اخذه معي للدوام ما أقدر اخليه بالبيت ( قلت بقلبي أحسن خليه يذلف معك ) جبت شنطتي وتكيت عندهم
اعطوني جدول للباص وبطاقه ممغنطه مجانيه تشحنها بالمبلغ اللي انت تبي واعطوني دليل للاماكن السياحية في المدينه والملاعب والاسواق وكل شئ
انا أقوم بدري واصلي الفجر واتروش وافرش سنوني والبس واطلع من غرفتي الا هذا ابوهم قايم اضبطلي كوبين شاي وتوست جبن مربى والا بيض وافطر انا واياه ( أكثر من مرة يقول انا أوصلك للمدرسة امش معي ) وفعلا وصلني اربع مرات لان المدينه صغيره ، والمعهد على طريق دوامه ، وانا اروح بدري ما عندي مشكله .
كان البرنامج اليومي كالتالي : اطلع من الدوام الساعة 12:30 حسب الجو اما اتغدى واروح للبيت أو أروح للبيت اتعشى مره وحده ، يعني اذا رحت للبيت بدري اصلح لي أي حاجه أكلها واتكي على الانترنت طبعا البيت مافيه الا انا ( تقل جني نيوزلندي) حتى تجي الساعةخمس تجي الام من الدوام واقعد ادردش انا واياه حتى يجي العشاء يجي زوجها حوالي 6:30 ونتعشى سوى وبعد العشاء اقعد اذاكر واحل الواجبات واكتب اللي ما أعرف في ورقه خارجيه ،وبعد ما أنتهي أخذ الورقه وأعطيها الابو ويعلمني ويحل كل الكلمات والقواعد ويضربلي امثله ويفهمني اللي ما فهمته في المعهد ( الغريب انه كان يستمتع وهو يذاكر لي ) اذا جاء يوم ماسألته هو يسألني وش خذيتوا اليوم في المعهد ويقعد يختبر معلوماتي اللي شرحها لي قبل المهم يذاكر لي وندردش انا وياه الى الساعة يمكن 10 عشر وادخل الغرفة واتفرج على التلفزيون شوي وانام-)(*&&^%$#@! ( للحديث بقيه وفيه البوم صور ... الصراحة تعبت من الكتابه ...) !@#$%^&*)(_
.. ... ...
... .. .. ... ...
.. .. ...
..