رحلة موفقة بأذن الله ....
اتمنى ان تحصل على كل الفائدة منها
بالتوفيق

الحمد لله على السلامه
والله أنه هاليومين أفكر فيك أقول وش صار عليه
الله يوفقك يالغالي وتستفيد من سفرتك
وترجع لنا بالسلامه
وبعدين وش أخبار النت خابر العائلة اللي بتروح لهم ما عندهم نت
عسى ضبطت الامور معهم

موفقين أخوي وان شاء الله تنبسط عالأخر
تحيتي

انا استخدم النت الي في المعهد قربت اخلص الحلقة الأولىو ترى اسمعوا لا تدققون ف الوقت لأني بعض الاحيان انسى متى الوقت (بعض الاحيا بتوقيتهم و بعض الاين بتوقيتنا)

الحمد لله على السلامه

موفق خير أخوي.....
تراني ماني بعيد قريب واجيكم بس زينوا الأمور بالذات الإستقبال
أبي شيء ملكي مو أي كلام
لا تنسى تقرير الدراسه

الله يحيك . بالنسبة للتقرير قرب يخلص ان شاء الله تلاقونه جاهز ي الويك اند او قبله بشوي

1. الجزء الاول : يوم السفر

الجزء الاول : يوم السفر

كنت اعد ما بقالي من ساعات و دقايق و ثواني و ماني مصدق ان اليوم الي انتظرته في حدود 6 شهور ما بقى عليه غير دقايق فكنت اسرح بفكري بعيد و ساعات اتخيل البيت بدوني و اتخيل هل الرحلة بتكون سهلة او بتعب فيها و اتقروش و ساعات اتخيل انهم يرموني في سجن غوانتانموا كنت اشوف نفسي لابس البرتقالي لبس المساجين في غوانتانمو و ساعات احط نفسي مكان في سجن غريب و تنتشر صوري و انا اتعذب فيها في السجون لكن قطع الوالد هواجيسي و افكاري الكارتونيه و قالي استعد يله بنمشي ركبت السيارة و حطيت شنطتي و رافقوني الى المطار اللمك خالد كل الاسره (امي و ابوي و اخواتي ) ليودعوني و بكوني الولد الوحيد حسيت بدموع الوالده تلمع في عيونها لأن هذي اول سفرة لي و لحالي و لمكان بعيد في اخر الدنيا .كلها كم دقيقه الا و حنا في المطار تقدمت الى كونتر الخطوط الاماراتية عشان احط شنطتي و اشحنها على الطيارة و استقبلها مره وحده من كرايس تشيريش وكنت متوقع ان وزنها راح يكون كبير مره .طلع وزن شنطتي 41 و المسموح فيه تقريبا حول 31 و تقلب وجه الرجال و سألني انت بتقعد كم هناك و جاوبته و علامات الاحباط و الاحراج تغطي ملامح وجهي : ايه راح اجلس لعشرة اسابيع ان شاء الله . سكت شوي الرجال و قال : لازم تشيل 10 كيلوا من الشنطه وتحطها في شنطة ثانيه و تدفع على كل كيلوا 100 ريال . لم اكد ارد علية حتى قطع ابوي حديثنا وقال لراعي الكونتر هو مجرد طالب يعني المفروض تساعدونه . بعد عدة محاولات بائت بالفشل الذريع اقتنع ابي ان انقص من الشنطة . رجعت و انا اجر اذيال الهزيمة و نقصت من العفش قدام العالم و قعدت في وضع محرج و انا طلع الملابس المهم بعد ما طلعت الملابس رجعت مستانس و قالي نقص 5 كيلو زياده لأن شنطتك كذا محد بيشيلها لك رجعت مرة ثانية وقعدت انقص و انقص و انقص و انا احس اني برجع البيت و اترك السفره و في المره هاذي قلي : وش كنك سويت نقص زياده و قتها انا وصلت حدها معي 3 مرات و انا رايح راجع انقص و هو يزيد في الوزن و قلت له يعني تبيني اروح مفصخ ولا ايش ترا الديرة الي ابي اروح لها برد و ثقل الشنطة ما جا من كثر الملابس جا من ثقل الملابس الشتويه . المهم هالمره قال ولو ان باقي كيلوين زيادة لكن نحس اننا تعبناك فراح نمشيك ( وقتها عطيته نظرة كذا )و الله و شحنت الشنطه و ختم الجواز و قعدت انتظر رحلتي الى دبي جلست في صالة ةالانتظار و انتظر و انتظر و انتظر الى ان مل صبري شوي و هم يقولون الطيارة تأخرت (كان المفروض اقلاعنا 9 لكن ما حركنا الا 10 ونص ) و صلنا دبي تقريبا الساعة 12 بتوقيت دبي نزلنا و ركبنا الباص و كان معي واحد ىسعودي بيروح استراليا يدرس ثاني يوم الساعه 7 و انا رحلتي الترانزيت الساعة 9 على ما اذكر المهم و حنا في الباص كان في محطتين الاولى للي عندة ترانزيت مواصلة بعد ساعة او ساعتين والمحطه الثانية للي يبي دبي انا ما انتبهت الى الرجال و هو يعلمنا بالمحطتين و ما نزلت مع المحطة الاولى من حسن حظي اني لازم انزل في الثانية يعني توني بحط رجلي و انزل على المحطة الاولى إلا و سواق الباص يسكر الباص و ما خلاني اطلع قعدت اضغط اضغط اضغط في الازرار و لا حياة لمن تنادي.ناظرت السعودي وقالي خلنا ننتظر واذا وصلنا الثاني نسأل عن الفندق قلت يله شورتك وهداية الله و نزلنا في المحطة الثانيه و رحت سألت الي يشتغلون في المطار وعطيتهم ورقة الفندق و علموني الدرب بعد ما اتعدى الجوازات و الجمارك .عند الجوازات الموضف الي يختم لي سألني انت من اي دوله انا استغربت كيف هو خليجي و ما يعرف الجواز السعودي يعني معقول ما شاف السيفين و النخله و لا قرا الدوله في الجواز .المم بعد التختيم والجمارك رحت عند كاونتر الفندق و قلي انتظر شوي الى ان يوصل الباص رحت الكرسي و توني ابي اجلس الا و هو يناديني و يقول ترا الباص جاهز طلعنا بذا الحر و الرطوبه الي في دبي وركبنا الباص و توجهنا الى الفندق دخلت غرفتي و عطوني ورقتين ورقه فطور مجاني و الثانية اي ساندوتش مجاني و انا في الغرفه صليت ركعتين وطمنت اهلي علي قعدت اتفرج على التلفزيون الى ان جاني النوم و نمت .و لما صحيت قبل موعد الرحلة ب 3 ساعات تجهزت و صليت الفجر و نزلت اللوبي و فطرت الفطور المجاني الي كان مره لذيذ و عدلت مزاجي بذاك الشاي و ذاك العصير و مخمخت الا و جا الباص الي يودي على المطار ركبت و قعدت شوي الا وانا واصل المطار . بعد ما ضعت في المطار لأني ما ادري وين مكان الرحلة سألت واحد يشتغل و دلني و تعديت الجوازات و و التفتيش و ذاك السيب الالي الطويل و كان في عجوزتين هنديتين لابسين العباية و النقاب الأماراتي ما يعرفون يمشون على السير الألي و سولي كم حادثة كم مره صدمت فيهم ؟ الله اعلم .كم مرة طيحو العالم معهم ؟ الله اعلم .الى ان وصلت السوق الحرة وقعدت اتمشى و اتمشى و اتمشى و أسأل عن البوابة السفر (لم تكون مكتوبه في البوردنق ) شاف الرجال مواعيد السفرات و علمني رقم البوابة و عرفتها و رحت عندها وتكيت شوي اتفرج في الناس الرايحة والي جاية و اتخيل كالعادة , اشوف هذيك الخالة الي تتميلح كأنها نعومي كامبل و ذيك الخالات الي الي مطلعين الشوشة المنفوشه و صابغينها موفي (بنفسجي) كأنهم ايس كريم بالزبيب و و عليه خلطة موفية كلها نص ساعة و قفت في الطابور حق رحلتنا و قصيت البوردنق و ختمت الجواز وو دخلت صالة الانتظار .
الى هنا و نصل الى نهاية الحلقة , اتمنى انكم استمتعتوا معي و انتظروا البقية وشكرا

يعطيك العافية
بس لاتتأخر علينا بالجزء الثاني واهم شيء الصور
تحياتي لك أخوي