1. بسم الله الرحمن الرحيم


2. Hohenschwangau Castle وهي القلعة الصغيرة


3. Neuschwanstein Castle وهي القلعة الكبيرة (


4. وعلى كذا انتهت رحلتي للقرية الجميلة Füssen ورجعت لميونخ


5. نصائح هامة للي بيزور القرية :

بسم الله الرحمن الرحيم

التقرير هذا كتبته بمدونتي قبل اسبوع ,, والعرب المسافرون أول مكان انشره خارج مدونتي ان شاء الله يفيد زوار المانيا ::
هذا اول تقاريري عن رحلتي الأوروبية اتمنى انها تكون مفيدة للي بيسافر إلى Füssen:هذي قرية كان ملك اقليم بافاريا يجيها في فترة الصيف لأنها أعلى منطقة مرتفعة عن سطح البحر في بافاريا ,, وجنبها بحيرة ,, القرية فيها قلعتين ومتحف
هذي صور القلعتين وأسمائهم :

Hohenschwangau Castle وهي القلعة الصغيرة

Neuschwanstein Castle وهي القلعة الكبيرة (

القطار بيوصلك الى Füssen Bahnhof هذي المحطة الرئيسية للقرية وموجودة في وسط القرية أول ماتطلع منها تلقى قدامك تكاسي وباصات ومحل تأجير سياكل !! أنصح الشباب والي فيهم لياقة ياخذون السياكل لأن منطقة القلاع خيالية والمشي فيها كثير بتكون أحلى بالسيكل
انا رحت مع الباص بنفس تذكرة اقليم بافاريا ووصلني إلى منطقة القلاع ,, لأن منطقة القلاع حوالي 10 دقايق بالباص برا القرية
هذا رقم الباص :
اذا نزلت من الباص تتوجه لمكتب التذاكر ,, طبعا التذاكر للقلعة الصغيرة والقلعة الكبيرة والمتحف
ولأن فيه زحمة سياح عندهم فكره في تنظيم دخول السياح للقلاع ,, بحيث انك اذا شريت تذكرة يكون مسجل عليها انك ماتقدر تدخل القلعة الا الساعة الفلانية بالضبط ,, طبعا فايدتها انه يدخلون الناس على شكل قروبات ويكون معهم مرشد سياحي يتكلم عن تاريخ القلعة ,, احرص انك تقول للي يقص التذاكر انك تبغى مرشد يتكلم انقليزي لاتتورط بقروب ألماني ههه
يوم قص لي التذاكر صار باقي ساعة على دخول القلعة الصغيرة وثلاث ساعات على القلعة الكبيرة قلت هذا احلى وقت أجلس استكشف البحيرة والمسارات داخل الغابة
وجلست اتمشى وابعدت عن القلعة وشفت باقي 10 دقايق ويجي وقت دخولي للقلعة !! عاد رجعت أركض للقلعة وأشوى وصلتها عالوقت المحدد
وهذا نظام بوابة القلعة وكيف تعرف هل اقدر ادخل ولا لأ :
ادخل التذكرة في البوابة الالكترونية واذا كان موعد القروب حقي تكون الشاشة خضراء وتخليني أدخل
المهم دخلت القلعة الصغيرة Hohenschwangau Castle وانتظرنا 5 دقايق عشان يكتمل القروب وقبل لا ندخل القلعة قال المرشد التصوير ممنوع داخل القلعة وقلت له بنفسي ايه هين :d
وبدينا نتمشى داخل قصر الملك والله ياهو صغير ومبني من خشب !! واضح انهم كانوا يسلكون لملوكهم اول ولا شافوا القصور الهندية !! القصور الهندية بدعة في فخامتها وهندستها وجمالها
بالقصر موجود بعض الهدايا الي استقبلها الملك مثل درع منقوش عليه 55 شعار ولا مجسم لنفس القصر منحوت من ذهب خالص
هذي صور متفرقة داخل القلعة الصغيرة :
الصورة الأخيرة عبارة عن صندوق مصمم باليد كان هدية زواج ومكتوب بالصندوق حرف الزوجة وحرف الزوج بالذهب !!
وهذي الصورة من احد نوافذ القلعة
وأكملنا جولتنا داخل القلعة وطلعنا للساحة الخارجية صغيرة وحلوة وفيها نافورة داخلها فلوس !! يرمون فيها قروش كان ودي اعرف ليش يسوون كذا
يوم شفت تذكرتي لقيت باقي ساعتين ونص على القلعة الكبيرة Neuschwanstein Castle لكنها بعيدة تحتاج ساعة كاملة عشان اوصل لها مشي برجليني ,, جلست اتمشى حول البحيرة واصور ولقيت واحد يأجر قوارب في البحيرة
بعد التمشي والتصوير ويوم بقى ساعة على موعد القلعة الكبيرة Neuschwanstein Castle قلت يلا شد العزم يبوو داحم لأنها في قمة مرتفع والمشي لها مرهق
هذي بوابة القلعة الكبيرة ( يوم وصلتها لقيتها مزحومة كثير بالسياح اكثر من القلعة الصغيرة )
وألي فيه لياقة حلووة وخلص القلعة الكبيرة فيه جسر فوق شلال ورا هالقلعة يمكن نص ساعة مشي من القلعة يستحق الزيارة
هذي صورته :
هذا منظر من احد نوافذ القلعة ,, يالله الجنة !!
وهذا المطبخ مدري من يوكل على كثر هالقدوور !!
عاد تدروون !! الملك ماسكن في هالقصر الا شهرين وبعدها مات !! وسكروا القصر ست شهور ثم فتحوه للسياح !!

وعلى كذا انتهت رحلتي للقرية الجميلة Füssen ورجعت لميونخ

نصائح هامة للي بيزور القرية :

• اهم حاجة تهتم لها تكون لابس جزمات مشي مريحة لأنك بتمتر القرية مشي بتتعب رجليك بدونها
• جو هالمدينة أبرد بقليل من ميونخ
• يوجد عربات خيل توصل من مكتب التذاكر إلى كل قلعة وسعر الركوب 2 يورو لكل شخص
• الي ناوي يسكن بفوسين فيه القرية نفسها فيها بيوت وفنادق وفيه منطقة القلاع وجنبها فنادق مبنية على استايل القلاع انصحكم تسكنون فيها عشان تعيشون جو الريف بجد
• القرية تاخذ منك يوم كامل اذا كنت في ميونخ أول قطار يروح لها الساعة 9:50 واحسب 4 ساعات الطريق و 5 ساعات تجلس فيها ,, يعني ماترجع لميونخ الا الساعة 7 المغرب

ان شاء الله يكون هالتقرير فيه معلومات مفيدة للي بيزور القرية