DUDE911
27-07-2022 - 02:48 am
هلا وغلا بأحلى بوابة في أحلى منتدى
رحت أقدم عالفيزا اليوم في الرياض في مركزهم اللي في السليمانية انا و2 من اخوياي
بالأصح رحت لهم امس وقبل ما يوصلني الدور ب3 أشخاص قالو لنا معليش السيستم عطلان
قلنا معليش نجي بكرة
عاد جيتهم اليوم الأربعاء وأخذت رقم وكان قدامي تقريبا عشرين شخص
والموجودين كلهم ما يتجاوزون 13
المهم قعدت أنتظر تقريبا ساعتين وقتها كان في واحد سعودي يعبي الأبلكيشن للعالم وقال اللي ما عبا الابلكيشن حقه يجي
المهم قعدنا نتعازم انا واخوياي ورسينا علي انا
يوم رحت وياليتني ما رحت حاس لي ام الدعوة
المشكلة انهم حاطينه يعبي الابلكيشن يعني هاذي شغلته وحاسها لي
خطّه الله لا يوريك وفي خانه مكتوب فيها بما معناه(هل تم رفضك من قبل من اي سفارة) وخوينا الله يهديه حط لي نعم وكتب لي التاريخ بعد:110انا مدري من وين جاب التاريخ أصلا):112:
ويوم جيت اوقع في النهاية سالته هل لازم نفس التوقيع اللي في الجواز
قالي يا رجال ماحد عندك وقع اي توقيع
يوم خلص وعبا لي الابلكيشن انتظرت بعدين رحت للهنود اللي يدخلون البيانات عالسيستم
شغلهم بطيء الله يهديهم يشتغل دقيقة ويسولف 10 دقايق:112: المهم يوم وصل لخانة هل تم رفضك من قبل ناظرني وسألني
قلت له لا طبعا
قاعد يضحك وقال لي من اللي عبا الابلكيشن
قلت له خويكم الله يطول بعمره :112:
عقبها ضحك
ويوم وصلنا للتوقيع قالي وقع
قلت له نفس اللي في الجواز؟؟
قالي ايه
قلت له يبو ترى التوقيع اللي في الجواز غير اللي في الابلكيشن اي وحد تبي؟؟
المهم شطبت عالتوقيع اللي في الابلكيشن ووقعت اللي في الجواز
(لان اللي مطلع لي الجواز معقب وموقع عني الله يهديه)
عقبها رحت وبصمت وعطوني الايصال اجيهم بعدين
اما بالنسبة لاخوياي واحد منهم راح للهندي دايركت وخلاه هو يعبيها
بس الهندي طلع استغلالي وطلب 35 ريال زيادة عشانه عباها
أما الثاني راح لخوينا وخلاه يعبيله الابلكيشن
وكان من ضمن الأسئلة
Have you been in the UK before?
عاد هو مسوي يترجم وقال : هل تنوي انك تروح بريطانا بعدين؟
خويي قعد يضحك وصحح له السؤال
أما بالنسبة للفيزا فكانت فيزة طالب
مدتها 6شهور (أقل شي ممكن تحصله مع ان دراستي فقط شهر واحد)
المستندات:
صورة واحدة فقط
ورقة القبول من المعهد
كشف حساب من البنك
والابلكيشن(تاخذه من عندهم او تطبعه من النت)
جواز سفرك
بالنسبة لكشف الحساب الظاهر انهم يشترطون مبلغ معين
ولازم تكون موظف
بس اذا كان في حسابك مبلغ معقول اتوقع يمشونها ولا يركزون اذا كنت موظف ولالا
(مع العلم اني طالب جامعي)
هذي تجربتي لليوم واتمنى تستفيدون منها
بالتوفيق،،،
الحين انا جوازي طلعته قبل سنة ولا فيه توقيع لي !!! وكمان زوجتي طلعت لها جواز قبل شهر ولا فيه توقيعها!!
لازم تواقيعنا تكون داخل الجواز؟؟ يعني مثل حالتي لازم ارجع للجوازات اوقع عندهم في جوازي ولا شلون؟؟
وبالنسبة لحجز الطيران وحجز السكن هناك ماطلبوه منك؟؟
والرسوم لازم كاش عندهم ولا فيه خدمة الشبكة؟؟
واخر سؤال عن الايصال ختموا لك عليه ولا لا؟؟
وجزاك الله عني كل خير