1. كنت متخوف من كذا شغلة وهي :


2. بس فيه واحد شفتها رجعته وهو بعد موظف ارامكو بس ناقص عنده شغلات كثير


3. عنده جوازات لعياله ولا صور منها ولا واحد

السلام عليكم
اسعد الله اوقاتكم/ن بكل خير
طبعا كنت خايف ودايخ من سالفة الروحة للسفارة والتقديم على الفيزا بس طلعت اسهل مما اتصور بكثير ولله الحمد .
رحت امس السبت ومن خلال قرائتي هنا ومساعدة بعض الاعضاء لهم الشكر الجزيل على مساعدتي احضرت كافة الاوراق المطلوبة ورحت للسفارة الساعة 7.30 صباحا وحجزت لي رقم وكان 2 وما كان فيه يوم رحت الا واحد قدامي..
للعلم انا رايح للرياض من الشرقية وانتظرت لحد الساعة 9 ودخلت وتمت الاجراءات بكل سهولة ويسر ولله الحمد
يوم دخلنا كان معي حوالي 7 اشخاص المجموع وكان فيه وحده شكلها سورية طيبة وحبوبة الله يسهل امورها سهلت على الناس وكانت تتعامل مع الناس بلطف وتساعد قد ما تقدر وفيه نقاط بذكرها لاحقا تبين مدى مساعدتها.

كنت متخوف من كذا شغلة وهي :

انا موظف ارامكو وكان عندي وساوس من ناحية الخطاب اللي اخذته من العمل هل يقبلونه بدون ختم الغرفة التجارية او لا ، ولله الحمد ما كلمتني فيه ابدا ولا سألت عن الختم بس لازم يكون مختم وموقع من شئوؤن الموظفين ولا يقبلون التوقيع او الختم الالكتروني
كنت خايف من شغلة انها تطلب تأمين غير الموجود بخطاب ارامكو ، وبعد الحمد لله ولا تكلمت
كان عندي مشكلة في حجوزات الفنادق كان ناقص عندي يوم ولا اكتشفتها الا الجمعة الليل وحجزت في فندق اليوم الزايد وحطيته مع باقي الاوراق ومشت ولله الحمد مع العلم اني طبعت لهم الكونفرميشن اللي ارسلوه لي نفس الفنادق بس اليوم اللي كنت غلطان فيه طبعته من بوكينق
اما باقي الشغلات فما صار لي فيها اي مشكلة الا في كشف حساب البنك لاني يوم اودعت الفلوس رحت وقلت للموظف اعطني كشف حساب على طول فأعطاني كشف حساب حق الايام اللي طلبتها الا اليوم نفسه اللي اودعت فيه الفلوس ما طبعه علشان كذا ماطلع في الحساب مبلغ كافي
طبعا حلينا المشكلة وقالت لي الموظفة روح وجيب لي كشف حساب يكون فيه على الاقل 15 الف بس ومو شرط حق 6 شهور جيب لي حق شهر واحد
وقالت روح جيبه لي الحين وتعال لاني عارف انك جاي من الدمام وعلى طول كنت بروح وبدون ادفع الا هي تصارخ وتضحك تقول شو مابدك تدفع الحساب ههه
وبعد واحد غيري كان ناقص عنده تامين وهو جاي يسوي اوراق لواحد من اقاربه وقالت روح جيب التأمين وتعال

بس فيه واحد شفتها رجعته وهو بعد موظف ارامكو بس ناقص عنده شغلات كثير

عنده جوازات لعياله ولا صور منها ولا واحد

وبعد الخطاب حق ارامكو ماطبع الا واحد بس وقالت لازم تجيب الظاهر واحد لك وواحد لزوجتك لانه الزوجة مع الاولاد ( فملي ) او عائلة فطلبت خطاب ثاني ، وانا اذكر ان واحد قالي لازم تأخذ خطابين وفعلا سويتها ومشت اموري ولا لو اني ماجبتها كان ماقبلت اوراقي الا اجيب خطاب لزوجتي
وبعد كان ناقص عنده يوم يعني مثل حالتي بس هو انصاد ، وقالت لازم الايام كلها تكون كاملة
المهم الامور كلها الحمد لله كانت على ما يرام ولا فيه اي تعقيد ولا مشاكل وكل شئ يمشي بسرعه انا يمكن ماجلست عند الموظفة ربع ساعة
هذا كل اللي صار معي واذا فيه اي استفسار او مساعدة انا حاضر