والله انا اللي اذكره انو لا ما اذا رفضوا خلاص ما عاد تقدر تطلع فيزا حتى من اي سفارة ثانية تابعة للاتحاد الأوروبي
لكن وش السبب اللي خلاهم يرفضون
هل التعريف فيه مشكلة هل هو من جهة حكومية او من جهة خاصه
واذا كان من خاصه هل مصدق من الغرفة التجارية او لا
او هل مرفق الراتب في التعريف؟؟؟
او يمكن حسابك ما كان نشيط ما تدخل فيه فلوس اعتقد هذي اسباب الرفض وغيره هم ما يرفضون

بكرا بروح لهم و بشوف و الله يعين
بس بجاوبك
انا موظف حكومي
و حسابي نشيط
وكل شيء مقدمه على ما يطلبون
بس ما أدري ليش
وعلى حسب كلامك يعني اذا رفضوا الفيزا
خلاص راحت علي السفرة
و بدون ذكر أسباب
يعني ما فيه حل
والله حرام المفروض
ما نتعب التعب كله و بالأخير يقولون لا
والله القهر مالي قلبي
و مشكور على ردك

اذا دفضت من السفاره فلاتسطيع اصدارها عن طريق سفاره اخرى
والفلوس اكيد راحت عليك لآن السفاره تاخذ رسوم التاشيره من البدايه لانها لاتسترد

الله يعوض عليك يارب

يا رجال ما تدري يمكن انها خيره
الله يعوض عليك واحنا والله في الطريق الله يسهل اجراءات الفيزا وتطلع

العوض من الله يالانجليزي
وعلمنا اذا ذهبت اليهم وش نتيجك معهم
اخاف انا على الساقه وانا ماندري
وفيه مقال جميل في الاقتصاديه كتبه الدكتور عبد الرحمن الطريري عن سوء تعامل السفارات الاوربيه ومنها ربعك يوم الثلاثاء 11/6/1428 صوره وعطهم منه نسخة وان ترجمته فهو احسن
و الله يعين عليهم

راجعهم وش وش السبب وقدم على سفارة ثانيه وانصحك بالنمساوية

الله يعوض علي خلاص ما فيه سفر
كنسلنا الفنادق و خسرنا 1500 ريال
كنسلنا التذاكر على الخطوط الهولندية و الخطوط الداخلية و خسرنا 2300 ريال
و فلوس التأشيرة مع فلوس التعقيب راحت 800 ريال
غير التأمين و ترجمة التعريف و الركض طوال الشهر اللي راح
ما أطول عليكم
اليوم رحت للسفرة يوم وصلت الساعة 6.30 قالوا خلصت الأرقام
أنتظرت لين خلصوا اللي معهم أرقام
قالوا الحين تدخلون بالدور و أنطق تحت الشمس 3 ساعات
يوم جاء دوري قالولي الهنود اللي عند باب السفارة أنت ما تدخل
طيب ليه و يمين يسار مرة ما فيه أمل جلست مصدوم لين خلصوا السفارة كل المراجعين
حاولت مرة ثانية طلعت لي موظفة لبنانية أسمها زوزان و قالت يا الله هوينا محنا فاضيلك تصور تقولي كذا
قلت لها خلاص ما أبغى أسافر حتى لو عطيتوني الفيزة
بس عندي طلب ودي أعرف ليش ما عطيتوني فيزة في المرة الأولى
تدرون وش قالت
بكل بساطة : كذا ما عطيناك فيزا عندك مانع
و بعدها مشيت للسيارة مقهور من الخساير و من ضياع حلم زيارة أسبانيا و من الدنيا كله
على طول كنسلت كل شيء
الله لا يوفقهم
يا ليت طلب الفيزا يكون قبل البهذلة عشان الواحد ما يتحطم
تحياتي
و مشكوريني يا أخواني على مواساتي و على ردودكم الطيبة

الله يعوضك خير وعسى ان تكرهوا شيء وهو خير لكم