1. اول شي السلام عليكم كيفكم ان شاء الله طيبين

اول شي السلام عليكم كيفكم ان شاء الله طيبين

انا توي رجعت من لندن امس للرياض وبصراحه الديره عاديه جدا وماخذه اكبر من حجمها ولحد يزعل من كلامي هذا من وجهة نظري الخاصه وبصراحه عشان مااظلمها جوها خيالي وانا من رايي ان لندن فيها ميزتين الاولى الجو والميزه الثانيه التسوق بصراحه لندن ديرة شوبنق للي يحبون السوق
انا قعدت بلندن 17 يوم من اول اسبوع حسيت بالملل وكنت نادم اني ما طلعت فيزا شنغن عشان اروح باريس مع اني رحت لها الصيف اللي راح وقعدت فيها 13 يوم وراحت كأنها يوم ولا حسيت بالملل ويمكن من الاسباب اللي خلتني احكم على لندن كذا اني جيتها بعد مارحت لباريس وقعدت اقارن بينهم صراحه باريس راقيه وفيها شرحة صدر وبالليل فيها جلسات اللي بالشانز راقيه وحلوه مو القهاوي اللي بالاجول رود الله يديم النعمه الجلسات ضيقه اللي يمشي بالشارع يحك بطاولتك من ضيق المكان والشارع نفسه وصخ وكئيت ومايصير تجلس بالجلسات اللي برا الا لازم تطلب شيشه:112: طيب انا مااشيش وابي اجلس برا في البراد وبطلب عشا اغلى من قيمة الشيشه يقولك معصي لازم تنزل شيشه وش ذا النظام :112:
يمكن البعض مايعجبه كلامي او يقول منت مجبور تروح لندن وانا اقول انا شفت لندن كذا وهذي نظرتي الخاصه فيها وانا مارحت للندن الا من مدح بعض الاعضاء وبعض الاصدقاء المقربين مع اني يوم خلصت حجوزاتي وظبطت اموري للسفره ومابقى لها الا اسبوع سألني بعض المقربين مني وين بتسافر قلت لندن قالو لندن وش تبي بلندن ياخي...عسى منت مطول فيها قلت 17 يوم قالو كثيبر على لندن 17 يوم الله يعينك على الطفش والملل قلت لهم خلاص ياجماعه سفرتي مابقى عليها الا كم يوم ارفعو معنوياتي شوي قالو حنا قلنالك الحين عشان ماتنصدم اذا وصلت
وفعلا حسيت انا وزوجتي بالطفش من اول اسبوع والاهل يكلمونا وحسوا ان حنا ملينا وقالو روحو لباريس قلت ياليت بس ماعندنا فيزا
وحاولت اني اقدم موعد رجعتي للرياض بس للأسف لازم ادفع تقريبا 4000 ريال لأني حاجز على البريطانيه على اقل درجه وماحصلت امكانيه الا على الدرجه اللي اعلى منها هذا غير الفندق ماراح يرجعون لي الفلوس لأني دافع للمكتب في الرياض..
وبالنسبه للفندق اللي سكنت فيه اللي هو فندق المارليبون حجزت فيه ودفعت فلوسه للمكتب وكان ب650 ريال مع الفطور وبعدها سألت عنه الاعضاء وتقريبا كلهم قالو ماعليه زين بس فيه احسن منه وكنت طول الوقت انتظر اللحظه اللي ادخل فيها الفندق واول ماوصلت الفندق تفاجأت بالفندق اللوبي حلو والفندق راقي وجلساته حلوه وكله خليجيين وغير كذا قرريب من الاكسفورد تقريبا 300 متر..وبعدها رحت للي على الاستقبال وقلت لها اذا فيه امكانيه تعطيني غرفه تكون كبيره قالت انت تامر امر لحظه شوي بعدين قالت ودك بسويت قلت بثقل نو بروبلم بعدين قالت للأسف السويتات مليانه فيه غرفه ديلوكس اكبر من الغرفه اللي انت حاجز عليها وافخم منها وبنفس السعر اللي دفعته في الرياض قلت اوكي ودخلت الغرفه وكانت كبيره وحلوه ونظيفه والحمام كبير وفيه مغسلتين وشاشه ال سي دي 40 بوصه وفيه جزء من الغرفه مستقل للشنط والثلاجه
الخلاصه لندن جوها وديرة شوبينق وانا ماقول ان حنا ما انبسطنا فيها يكفينا الجو
واخيرا اشكر جميع الاعضاء اللي استفدت منهم وبالاخص اخونا القطري الله يجزاه خير ويقوم امه بالسلامه ان شاءالله...واي سؤال من الاعضاء او استفسار انا حاضر ترى بخصة الديره