الأخ ماجد الحمدلله على السلامة
وياليت تعطينا تفاصيل أكثر عن المدن إلي زرتها ولو فيه صور يكون أفضل
وهل البلد تنفع لسياحة وإلا لا وخصوصا المناظر الطبيعية وهل هيا مخدومة سياحيا تحياتي للك

وعليكم السلام ورحمة الله وبركاته اخي ماجد
من خلال قرائتي لموضوعك اشوف الفنادق غاليه جدا جدا
والطعام كذالك..
طيب اخي ماجد طبعن في مناطق للمسلمين ألم تزرها وهل هي جميله ام لا .
وهل استطيع ان اشتري خروف كي اشويه..وهل هناك الجو يصلح للشوي.
وهل يوجد بيوت للسكن..
وفي المالديف اين سكنت وكم اسعار الفندق
ادري كثرة عليك الاسئله الله يعينك على الاجوبه..
وننتظر منك الصور ان وجد.
وتقبل تحياتي

الاخ Asd2 والاخ ابو ناصر بالنسبة للصور فهي موجود في المنتدى في موضوع الاخ كبيان اما الصور الى عندي فهي تصوير فيديو .

• البلد سياحي للي يبي الطبيعة والمنتجعات الجميلة اما الي يبي تسوق ولف في المراكز التجارية فلبلد ما تصلح له .
• البلد سياحتها في الطبيعة الجميلة والمنتجعات الرائعة .
• الفنادق فعلا غالية لان البلد عليها حركة سياحية مستمرة من الاروبيين واليابانيين
• بلنسبة للمسلمين فهم موجودون في كل المناطق
• الخروف ودعه بديرتك لين تعود الله يعينك على الاكل السريلانكي او البيتزا اما الشوي فيوجد في الفنادق شوي سي فود
• اما البيوت فلا يوجد حسب علمي الا شقق في العاصمة والعاصمة ما تنفع ولولا تعب الطيارة ما جلس في العاصمة ولا يوم
• المالديف سكنت في امبدو فلج فندق 3 نجوم سعر الغرفة 100

تحياتي

يليت اخوي لوفيه مناظر مصوره وصور الفنادر مع اسعاره إذا ما فيه كلافه

الحمدلله على السلامة اخ ماجد 000
افهم من كلامك العام ان سيرلانكا اغلى من ماليزيا 000؟
بس بالحلاة منو احلى ؟
تحياتى

هلا والله باخوى ماجد والحمد الله على سلامه ، وليش تعتذر يالغالي انت ما قلت شى خطأ تعتذر منه بالعكس كلامك 100% صح. والله كأنك تصف حالتنا لما نزلنا من الطيارة ومسكنا سرما فى صالة القدوم وطول وبطأ الاجراءات. والا بعدما خرجنا من المطار باتجاه الفندق مناظر الطريق الله ام لك الحمد والأهم ان زوجتى والاولادي كل واحد فيهم يناظرنى ويقول ( سيرلانكا هاه ) وانا اقول لهم لا تراها زينه وما بعد شفتوا شى واصبروا وانا والله من الداخل اقول اول ما اوصل الفندق بدور حجز على ديرة ثانية. لكن بعدما خرجنا من كولمبو تغير الحال ومثل ما قلت سبحان الله جمال الطبيعة شئ خيالى ويعوض اليوم التعيس حق كولمبو. بس الى انا ا مستغرب انك تقول سيرلانكا غاليه ، وخاصة فى هذا الوقت ،يبدوا انك لم توفق في برنامج جيد. كذلك بخصوص اخذ سواق وسيارة مباشرة بدون الحجز مع وكالة اعتقد انه اكثر مشقه واكثر تكلفه، اضافة الى ان حجز الفنادق يكون في بعض الاحيان صعب جدا و ربما يزودون عليك الاسعار اضافة الى تضييع الوقت في التدوير ، وانا افضل التعامل مع شركة سياحية لتوفير الجهد والوقت ، اضافة الى انهم يستطيعون تدبير الحجز فى اوقات الذروة السياحية بعكس ما لو رحت بدون حجز . هذا مع انهم يصبحون للشخص بمثابة الكفيل ويسهلون له كل المشكلات التى تواجهه اذكر مره كنا فى احد المدن وكان فيه تفتيش ولكن مندوب الشركة نزل وتفاهم مع العسكر وخلال ثوانى مشونا بسرعه .
اما بخصوص الدب الى فى وكالة زهرانى فاعتقد انه الشخص الذيا شرت له فى احد المشاركات وقلت لا تاخذوه معكم اذا اقترحوا ان يكون دليل الرحلة والظاهر حظك طيحك فيه ، بس ترانى ذاكر اسمه فى احد المشاركات . اما التأكد من درجة الفنادق فالعادة انهم يقولون لك ما درجة الفندق او المنتجع الى ترغبه وعلى ضوء ذلك يتحدد سعر اتعاب الوكالة بس بشكل عام اسعارهم معقولة جدا من وجهة نظرى ووتراوح بين 25- 120 دولار.
اما الخرفان والتيوس والشوى فانت صادق ما يوجد في سيرلانكا خرفان ابدا سبحان الله فعلاً لا يوجد مطلقا لا على المستوى العام ولا الخاص ما تعيش هناك . والماعز ما شفت الا حوالى اربع او خمس فى احد القرى وغيرها ما شفت ابدا في كافة سيرلانكا حتى الشوى ما يعرفونه رغم ان عندهم حدائق ومنتزهات رائعة لا كن ما فيها اماكن للشوى ابداً. والشى الذي استغربت منه رد اخونا الشيتوى على بعض الأخوة عن هذا الأمر حينما سئل هل هناك تيوس للشوى اجاب:
عندهم تيوس على كيفك كيفك. ارجو من الشتيوى اذا يعرف شى عن هذا الموضوع يعلم به الأخوان لأنه سيحل مشكلة وربما هو يعرف امور ما نعرفها بحكم طبيعة عمله فى وكالات السياحة فحبذا اذا عنده معلومه توضيحية عن هذا الشأن بعدما يقرأ هذه المشاركة ان يوضحها للأخوة وجزاه الله خير.
اما بخصوص الأكل الظاهر صار لكم مثل ما صار لنا فى البداية بس ترى بعدين فرجت لما علمت انه ممكن الطباخ حق الفندق يطبخ لك ما تريد وهذا اخونا المطيرى ماشى على نفس الطريقة الآن ، اما اكلهم الله يديم النعمه لا يؤكل .
بخصوص المطار صحيح اول ما يجى الزائر يصدم بصالة القدوم سيئة للغاية ولكن صالة المغادرة فخمة جدا وحديثه وكبيرة ، وكأنك في مطارين مختلفين ،عموماً ترى الربع كلهم بانتظار التقرير المفصل والحمد الله على السلامه. بس بشكل عام ارجو ان لا اكون ا عطيتك معلومات مغلوطة ، وفي كل الأمور تضل هذه تجارب وانطباعات شخصية كل يراها بطريقته ولكل شخص الحرية ان ياخذ ما يريد
والحمد الله انكم استانسوا وهذا اهم شى ، اما سيرلانكا ما تهمنى انا مجرد سائح شفتها وعرضت تجربتى
واهم شى على اخواني في المنتدى وخدمتهم ، وختاما ترى هذه السطور ما تكفى ترى منتظرين التقرير المفصل ، ومفصل المفصل ومسامحينك الصور بس المعلومات وعرض تجربتك امر هام للجميع والكل بالانتظار اليوم سموحه نخليك ترتاح وتنام بس بكره ترى الربع منتظرين التفاصيل. الحمد الله على السلامه مرة اخرى.

اخووي بعد التحيه انا ابي معلومات عن المالديف بسس اما سريلنكا فلا؟ اقصد ذالك هل فيه رحله بدون مرور سريلنكا من السعوديه ؟ وماهي عملتهم مقارنه بريال السعودي وماهي اسعار الفنادق 3 نجووم وهل الوضع الامني فيها جيد حيث انني بسافر لوحدي ( مالقيت احد يخاويني وطفشت قلت روح لحالي ) الرجاء الوجيه من الجميع عن ما خص المالديف وهل فيها استغلال والخ ابغا معلومات كافيه تكفون تعرفون الي بيروح وحداني لازم يحسبها صح اعزوبي وطفشان ههه
الرجاء الرد من الاخوه جميعا
تحياتي

أخوي أبو عمر
أنا برتب موضوع الرحلة وان شاء الله يستفيد الجميع منه والله يعين بشتري كرت تلفزيون حتى اعرض بعض الصور الى عندي بكمرة الفيديو . أما بخصوص الفنادق فهي غالية فعلا اغلى من ماليزيا .
فنادق درجة اولى في كولومبو رخيصة الكونتننتل ب 60 دولار بدون فطور بس وش تسوي في كولومبو ؟
اما في المدن السياحية فهي من فوق 100 دولار اما الاربعة والثلاثة نجوم فهي من فوق 70 دولار بخلاف ماليزيا انا سكنت في فندق اسمه قراند سيزن في ماليزيا 4 نجوم وكان توه فاتح جديد وسعره 35 دولار
هذا موقع فيه صور الفنادق واسعارها http://asiatours.net/srilanka/hotels.html
أما عن موضوع الاخ القلب الكسير فاقول المالديف ما تصلح للعزوبي واذا رحت عزوبي بتكرهها سفرة .
أن من وجهة نظري المالديف حدها 3 ايام بس لان الفندق في جزيرة ولا تستطيع الخروج الا في اوقات محددة وتكون ملتزم بمجموعة والا الله يعينك على تحمل قيمة الطراد كاملة وهي في حدود 300 دولار يوصلك مثلا للعاصمة مالى ويعود لك في الوقت الى تحدده والعاصمة ما فيها شي يستاهل بيوت وسوق خضرة وسوق سمك ومسجد قديم هذه الاماكن الى ياخذون السياح لها اما سعر الفندق 3 نجوم فهو ب 100 دولار شامل الوجبات الثلاث هذا موقع فيه فنادق المالديف اسعار وصور http://www.asiatours.net/maldives/islands.html ويوجد عندهم رحلة الغواصة ب 55 دولار مدتها 50 دقيقة وهي ممتعة جدا
تحياتي للجميع