مساء الخير ،،
من وجهة نظري الجمع بين انترلكن وزيلامسي في سفرة وحدة غلط ،، لأن طبيعتهم وطبيعة ماحولهم تقريباً فيها تقارب لحد كبير ،، وراح تفقد السفرة التنوع المطلوب ..
إلا إذا كان الغرض من السفرة طبيعة وأرياف فقط ،، وهذا شي انتو تقرروه .
.المدة طويلة وحرام مايكون فيها تنويع في طبيعة المناطق والمدن ..
إذا كان لابد من زيارة انترلكن وزيلامسي مع بعض ،، فأفضل يتم إدخال مدن ذات طبيعة مختلفة شوي في الجدول ،،
مثل مدن بحيرة جنيف ( الريفييرا السويسرية ) اللي هي جنيف أو مونترو أو لوزان أو ضواحي جنيف المدن الفرنسية ...
والأفضل تكثيف قراءة المواضيع والتقارير لأن فيها كل اللي ممكن تشغلون فيه برنامج الرحلة ،، والوقت لسا بدري إلى حد ما ..
والأعضاء ما راح يقصرون ...
بالتوفيق ..

رحلة الشتاء شاكرة لك مرورك الله يكتب لك الأجر
لكن شو المقترح اللي تشوفه يعني كيف قصدك تكون الرحلة لو اتسهل علي أكثر أكون شاكرة لك
الأولاد راحو قبل زلامسي وحابين ايروحونها مرة ثانية لان فيها مرح مع جو مع طبيعة
لكن شو وجهة نظرك أن تكون السفرة في سويسرا بس لاني أنا أول مرة أروح سويسرا
ومعاي الوالدة ونميل أكثر للطبيعة لكن معانا الاولاد يحبون الألعاب
ياريت لو مقترح الرحلة تساعدني فيه بحكم خبرتك

نعم بالتأكيد ما ينفع الجمع بين زيلامسي وانترلاكن
وبعدين دام إنكم قد زرتم زيلامسي قبل كذا ليه ما تزورون انترلاكن عوضا عنها وتلغونها من جدولكم التجديد شيء جميل
وبالنسبة للملاهي أنصحكم تزورون ملاهي الأوروبا بارك في رست
المهم سؤالي / هل قطعتم تذاكر الطيران أم لا ؟
على أساس أقترح عليك جدول لرحلتكم؟

خلاص راح الغي زلامسي حسب رايكم
لحد ألحين ما قطعنا التذاكر انتظر أرتب الرحلة قبل ثم التوجه إلى مكتب السفريات
علشان أكون عارفة وين وجهتي ورحلتي بالضبط
شنو مقترح غريق الشوق
واحنا زرنا قبل اليوروب بارك رائعة جدا وحبوها الأولاد لكن أبو الأولاد يقول يمكن مافي مكان قريب من رست يصلح للسياحة
ولأن أحنا عدد الأفراد كثير فقلنا نخلي سكنا في ثلاث محطات فقط علشان الشنط وتضبيطهم لأنه متعب
ولا شنو رايكم أنا انتظر اقتراحكم الكريم

هلا فيك
المعذرة على التأخير
طيب ليه ما تنزلون مطار جنيف وتزورون انترلاكن والريف الفرنسي على حدود سويسرا
وبعدها تتجهون إلى باريس وتقضون بها باقي الأيام ومنها تزورون ديزني لاند من باب التغيير
باريس تبعد عن جنيف 540 كم
أو تكتفون بزيارة النمسا وسويسرا

شاكرة تفاعلك غريق الشوق
أنا فعلا محتاجة لمساعدتكم لاني مو قادرة أنظم الرحلة محتارة ومشوشة
الله ايبارك لكم في عافيتكم ويغفر لكم وكل من ساعدني يارب
احنا سبق رحنا باريس لكن كانت لنا مشاكل كبيرة في السيارة اللي استأجرناها تفاجأنا بالسيارة
مافيها مكان للحقائب وكانت الاسعار مرتفعة عن ميونخ كما تعودنا
المهم احنا خفنا نروح جنيف وندبهدل مثل فرنسا فلنا بنخلي رحلتنا بين ألمانيا وسويسرا
على أساس إن احنا مارحنا سويسرا وحابين نروح
احنا رحنا ديزني فرنسا واستمتعنا جدا لكن كانت متعتنا اكبر في اليوروب بارك بالنسبة للأولاد طبعاً
المشكلة ما أعرف المدن السياحية القريبة من بعضها واللي تستحق الزيارة واللي المفروض ارتب جدول الرحلة على اساسه
قلنا ناخذ السيارة من ميونخ لان سياراتهم جديدة وأسعارها معقولة ونفس الطلب اللي نقدمه نحصله
الله يكتب لكم الاجر ساعدوني في سير الرحلة

ما شاء الله عليكم ، كل ما اقترحنا لك اقتراح قلتي قد رحناه ههه
شوفي يا خيتي
الي فهمته منك إنه النمسا ما قد زرتوها
أنا من رأيي إنك تدخلين كل قسم ،، فرنسا وسويسرا وألمانيا والنمسا
وتشوفين التقارير الي فيها وخطط الرحلات وأيضا لا تنسي تدخلي قوقل ماب عشان تعرفين مخطط سير رحلتك وأيضا المسافات بين المدن
وبعدها اطرحي خطتك وشوفي آراء الأعضاء
وإن شاء الله تلاقين خطة تناسبكم

انا من راي أخوي ،، أفضل شي دام الوقت بدري قراءة التقارير وتشييك مواقع المدن والمسافات ع الجوجل مابز ،، فيها تعب بس المتعة تغطي على التعب .. وتسجيل الملاحظات والمعلومات مهم جداً ..
والنتيجة معرفة معلومات كثيرة ،، واكتشاف أسئلة جديدة ماكانت في الحسبان ,, وبعد كذا تنحصر الأسئلة في موضوع موحد ...... والجميع مايقصرون ...