السلام عليكم وتحية طيبة للجميع .
أسال الله أن يتقبل منا ومنكم الصيام والقيام وأن يجعلنا ووالدينا ووالديكم من عتقائه .
في البداية أحب أشكر جميع من استسقيت من نبع علمه و ارتويت من نهر معرفته وشربت من عذب تجربته في حله وترحاله ، فكلم كل الشكر والتقدير ووافر الود والاحترام ..
من دواعي سروري يشرفني أن أنثر بين أيدكم هذا التقرير المتواضع تراه والله تعبني بالحيل (( يعني موب عشانه أربع صور موب متعب امزح لاتصدقون )) الله يكون بعون اللي يكتبون تقارير طويلة والله كنت أحاسب الدعوة سهلة لكن ما أقول إلا ياجعل كل من أفاد وأعان وعاون الفردوس الأعلى ..
عموماً هذا التقرير جداً جداً متواضع وفيه مشاكل كثيرة .. لكن والله يوم قريت تاريخ تسجيلي في هذا المنتدى الرائع استحيت لي حوال الأربع سنوات ولا قد نزلت تقرير . وقلت لازم أنزل تقرير لو صورتين بس أهم شيء أنزل شي جديد نوعاً ما قد يستفيد منه أحد .. بالرغم ولله الحمد قد أفدت كما استفدت من الكثيرين ..
فندق كوال الحمراء الرياض ..
يقع على طريق الملك عبدالله بين سنتربوينت ومطعم البحصلي ,, وهو أربع نجوم
الفندق رائع وممتاز واعتبره من وجهة نظري المتواضعة واحد من أفضل الفنادق في الرياض لعدة أسباب .
1-الفندق جديد ماله إلا أقل من اربع شهور
2-مقارنة بالأسعار هو الأفضل
3- تجاوب ورقي تعامل الكادر في الفندق بالرغم فيه واحد قلق مرة لكن البقية رائعين((وخصوصاً الهندي فديت قليبة ))
4- النت مجاني
5- الهدوءءءء
6- الغرف وسيعه يطرد فيها الخيل
من تدخل الفندق ممكن ما تتقبله أو مايعجبك خصوصاً الأشخاص اللي يحكمون على الفندق من البهو لكن في الحقيقة الغرف لها أنطباع مغاير عن منطقة البهو أو الإستقبال ..
الأسعار
أنا أخذت غرفة ديلوكس ب490 ريال من موقع بوكنق ..
بس يوم رحت لهم قالوا لا سعر الغرفة ب750 ريال بس الحمد لله كنت طابع الحجز وتفهموا الموضوع تفادياً للمشاكل ,, لا وأزودكم من الشعر بيت طلبت منهم يسوون لي ترقية في الغرفة وبيض الله وجههم ما قصروا ..
عموماً هذه بعض الصور خذتها من الجوال والمعذرة كل المعذرة على رداءة الجودة والصور ..
هذه أطلالة الفندق على النوافير الراقصة على شارع الشانزليزية .. (( قصدي شارع الملك عبدالله ))
وأليكم أسعار الغرف بس الأفضل تحجز عن طريق موقع الفندق الرسمي أو من موقع بوكنق ,,
هنا المكتب والتلفزيون .. وفيه جلسه حلوة للمصارحة كما مساحة الغرفة مناسبة للمصارعه في حال أن المصارحة توصلت لحلول مسدودة ..
هذه صورة غريبة عجيبة قعدت أتأمل فيها كثير ,, يا سبحان الله بالرغم كنت جاي من سفر طويل قرابة ثمان ساعات بالطيارة وقبلها ساعة بالقطار وأنتظار بالمطار حوالي ساعتين لكن يوم جا وقت النوم نمت أربع ساعات على هذا السرير الرائع والمخدات التي إحتوت بين جناباتها ريش النعام وصحت ولا عاد جاني نوم .. بعدها بيومين رحت للمزرعة وجلست فيها يومين أول يوم نزلت المسند في المجلس بعد صلاة الفجر وأنزل الشماغ على وجهي ونمت نومة السعداء ماقمت ألا الساعة 3 العصر سبحان الله ,,
تذكرت حينها أمرين
الأمر الأول أمير المؤمنين عمر بن الخطاب رضي الله عنه عندما كان نائم تحت الشجرة ,,
والأمر الأخر سالفة أنك تقدر تشتري بالمال السرير لكن لا تستطيع أن تشتري النوم ..
وأليكم رابط الفندق من booking
https://www.booking.com/hotel/sa/coral-al-hamra-riyadh.ar.html?aid=1300939
ورابط الفندق الرسمي
http://www.coral-international.com/alhamra-riyadh/index.asp
هذا التقرير وأتمنى أن يحوز على بعض رضاكم .. وأي استفسارات أنا تحت أمركم ..