هيثكليف
12-05-2022 - 08:57 pm
السلام عليكم ورحمه الله تعالى وبركاته
اولا مساء الخير والاحساس والطيبه لكل الموجودين واللي بيقرون موضوعي ذا
ثانيا اريد من جميع الاخوان وخاصه الشاب والمنقلب الفزعه لاني محتاس وابي مين يدلني
اولا قدر الله على وباتزوج ونويت اقضي شهر العسل في اسبانيا ( وش شهره ماعندي الا 11 يوم وباداوم
قلت وبعد مشوره ناس كثير في اسبانيا قالوا لي خذ خمسه ايام في برشلونه واربعه في ماربيا ويومين في مدريد وتعال حظر الله لايهينك وداوم زي الناس
قمت حجزت على اللوفت هانزا وامري لله وطالع في 27 ابريل شكله برد ربي يعين وباخذ 5 ايام في فندق magesticفي برشلونه
واربعه ايام في فندق guadalpin benus في ماربيا ويومين في wellington في مدريد وحسب ماقالولي مكتب السياحه ذي فنادق مره حلوه وعروض مغريه ومدري ايه
المهم يا اساتذه الله لا يهينكم ابي استفسر عن
كيف اسافر من برشلونه لماربيا ومن ماربيا لمدريد ضروري وش حكايه القطارات السريعه via تنصحون فيها والا لا وهل توصل لذي الاماكن ؟؟
ابي تعطوني وين اروح تكفون مابي اتفشل قدام زوجتي تقول لي اسال وانا اقول كله مرتب لا تخافي واخاف اتوهق
وش المتاحف اللي تنصحون فيها ووش الملاهي والاسواق يعني ابي شيء يقول انا ومايهمكم باجيب لكم من هناك اللي تبون بس افزعوا لي تكفون
ابي قصور المسلمين زي الحمرا وغيره والمتاحف من وين احجز لها وكيف اروح في ذي المدن او المجاورات
وياليت تفيدوني تكفون تراها تهز الرجال
وسلامتكم
هلا أخوي
وراك محيوس الله يهديك .. هدي الوضع .. وتراي الدنيا تمشي على ركاده
أول شيء مبروك الزواج .. والحب الحلال وكل شيء حلو بعد الزواج .. وأحلى شهر عسل بإذن الله.
شف وأنا أخوك
شهر العسل ... يبي له شيء مهم ... يبي له ركاده وتهدئة أمور .. وسعة عصر وفله .. وأنك تصير مرتاح نفسياً قبل كل شيء..لأن زوجتك إذا شافتك مرتبك نفسياً ومحيوس أنحاست معك .. وإذا شافتك مرتاح على الاخر ومبسوط راح تنبسط.فهدي أعصابك..
يعني هذي نصيحه على الطاير
شيء ثاني .. 11 يوم .. حلوه .. وبأعطيك تقسيم أحسن وأجمل بصراحه.
5 ايام في برشلونه ... و6 أيام في ماربيا والجنوب الأسباني.
وكنسل مدريد .. لأن مدريد ما فيها شيء يستاهل.
وأنت رايح شهر عسل .. فأصرف دراهمك في شيء يستاهل.
أو تصير رحلتك .. 5 أيام في برشلونه .. و3 أيام في سان سباستيان و3 في مايوركا.>>جزر حلوه ويمدحونها.
وأنت بالخيار والرأي لك.
كيف اسافر من برشلونه لماربيا ومن ماربيا لمدريد ضروري وش حكايه القطارات السريعه via تنصحون فيها والا لا وهل توصل لذي الاماكن ؟؟
نصيحه بالطيران أريح لك بما أنك شهر عسل وتحتاج راحه.
وخذ هذا موقع على النت .. خطوط طيران ابحث فيها ودور المناسب
http://www.iberworld.com/
ابي تعطوني وين اروح تكفون مابي اتفشل قدام زوجتي تقول لي اسال وانا اقول كله مرتب لا تخافي واخاف اتوهق
وش المتاحف اللي تنصحون فيها ووش الملاهي والاسواق يعني ابي شيء يقول انا ومايهمكم باجيب لكم من هناك اللي تبون بس افزعوا لي تكفون
ابي قصور المسلمين زي الحمرا وغيره والمتاحف من وين احجز لها وكيف اروح في ذي المدن او المجاورات
المواضيع كثيره مره
بس عليك تفر المواضيع وتشوف أهم الأماكن...بالنسبة لبرشلونه والجنوب الأسباني .. لا تبحث كثير
على طول رح موضوعي .. وتلقى فيه كل الأمكان المهمه في برشلونه والجنوب الأسباني
يعني انا رايح رحله استكشافيه .. مو ترويقه .. وتعرف اللي يكتشف يروح أكثر الاماكن المهمه.
مع خالص احترامي