السلام عليكم ورحمة الله وبركاتة
مساكم طاعة ورضى الرحمن
كالعادة كثير من الناس تأخذ مبلغ كبير جداً في بداية السفر وتشيل همة لاينسرق لين يرجع
دياره وهالأمر يخرب عليك الوناسة والبسطة في السفر وخصوصاً ان اقل شخص دافع 5 الاف
ريال وقهر انك ماتنبسط على الآخر
حمسني لكتابة الموضوع الأخ العزيز ( قاصد ) حيث وضح طريقة ممتاز للحفاظ على المبلغ
في الجبل بونشاك
وانا لي طريقة استخدمها في كل سفراتي لأي مكان في العالم والطريقة سهلة جداً وراح تخليك تنسى
شي اسمة فلوس
فيزا تسوق الراجحي
الفيزا هي في الأساس تستخدم لعمل الحجوزات والشراء عن طريق الانترنت بدون اي رسوم للعمليات
فقط قيمة استخراجها 100 ريال لمدة سنة واذا حاب تجدد كل سنة تدفع 100 واذا مالك نية خلاص
لاتدفع وانتهينا
مثال توضيحي للطريقة :
عندي مبلغ 10 الاف ريال وانا مسافر اندونيسيا طبعاً هذا مبلغ الصرف الاكل والشرب والتماشي والخ..
اودع المبلغ كامل والكمال لله في حساب بطاقة فيزا تسوق الراجحي
وكل يوم أمر أقرب صرافة واسحب مبلغ يكفيني يومين الى 3 أيام فقط
البعض يقول يمكن تنسرق بطاقة الفيزا .؟.؟
انا اقوله لاتخاف محد بيسرقها لأن مابيستفيد منها اي شيء ابداً
لأن كل عملية تحتاج رقم سري زيها زي بطاقة الصراف المستخدمة في السعودية
والشعب الأندونيسي يعرف هالشيء والحرامي بشكل عام ماهمة الا الفلوس
اما سالفة بطاقات او جوازات آخر همة
واذا مره خايف خل مبلغ بسيط في بطاقة الصراف العادية
مثلاً 2000 ريال للطوارئ وبطاقات الراجحي العادية معتمدة
بطاقة فيزا تسوق يأخذ بنك الراجحي 25 ريال لكل عملية سحب سواء كانت مليون روبية او 500 روبية
وبطاقة الصرف العادية كل عملية 35 ريال
البطاقة معتمدة عالمياً وسبق جربتها في جميع بلدان شرق آسيا
( اندونيسيا - تايلند - ماليزيا - كوريا )
لو تحسبها مدة سفريتك يأخذ عليك الراجحي 250 ريال الى 300 ريال
لكنك ارتحت من هم سرقة الفلوس وارتحت من هم ثاني وهو ( سعر الصرف والتحويل )
طبعاً المبلغ الي تسحبه من الصرافة على حسب البلد الي انت فيه يعني اندونيسيا روبية
وتايلند بات وكوريا ون والخ ...
وجهة نظر توضيحية :
انا دافع في الرحلة اكثر من 10 الف ريال وماتفرق حتى لو 500 ريال واريح نفسي من هم الفلوس والصرف
اتمنى تكون الفكرة وصلت والمعذرة اذا فيه قصور في الموضوع
ولاتحرمونا دعواتك