اول شي نبدأ وانت على الأجواء ترى اندونيسيا تدخل لها بفيزا يعني لازم تفيز وطريقة التفييز بالطيارة ان شاء الله يعطونك كرت دخول تعبيه بدقه فيه معلومات مثل الاسم رقم الجواز وغيرها من المعلومات وفي موضوع في البوابة يخص كرت الدخول ويوجد ترجمه كامله له المهم اذا نزلت بحفظ الله ورعايته تلقى مكتب على يمينك ويسارك لإجراءات الفيزا المهم تدفع الرسوم وهي 25 دولار لمدة شهر وراح يلصقوون الفيزا بجوازك ويرجعون لك كرت الدخول المهم وانت طالع عند اللي يختمون الجوازات راح يختمون لك على كرت الدخول انتبه له مثل جوازك ولاتضيعه لأنه وانت ان شاء الله راجع راح يطلبونه منك وعشان تفتك من وجع الراس انتبه له المهم انتهينا من اجراءات المطار تروح مكتب كاها اللي في المطار اسئل عنه كلهم يعرفونه واحجز فندق لليلة واحدة في جاكرتا انصحك تحجز في استون راسونا او جراند توبيك اذا حصلتها فل دور فندق غيرها الفنادق مليانه في جاكرتا المهم لاتطلع من المطار الى وانت حاجز الفندق اذا حجزت الفندق تلقى يسار مكتب كاها مكتب لسيارات الأجرة عنده سيارات كبيرة وصغيرة خذ لك سيارة حسب اغراضك المهم لايتجاوز سعره ال 200000 روبية انتبه وانا اخوك المهم اذا وصلت الفندق بحفظ الله ريح ونزل اغراضك و اذا كنت في النهار رح لسوق الاتريوم عشان تحول فلوسك الى روبية تلقى الصرافين في الدور الرابع افضل سعر غير عنده العملة اما اذا كان في الليل لاتروح لأن الصرافين يصكرون الساعة 8 ...
اذا كنت ساكن في جراند توبيك لاتروح سوق الاتريوم لأن جنب الفندق سوق وعنده ايضا تغير عملة اما اذا سكنت في استون راسونا رح لسوق الاتريوم .....
المهم في صباح اليوم الثاني تكون داق على السواق ويجيك الصبح عشان تروحون للجبل المهم ترووحون للجبل وشف مجمع جايا كاراتا او غيرها المجمعات كثيرة المهم اليوم الأول لك بالجبل تريح وتجيب لكم شغالة عشان تطبخ لكم ورح اشتر لك تيس وفي صباح اليوم الثالث رح لحديقة سفاري يبي لها يوم كامل تمش في حديقة الحيوانات واركت التلفريك وتفرج على عرض الكوبوي واذا كان فيك نشاط اطلع للشلالات الموجودة في سفاري وفي اليوم الرابع رح لحديقة الزهور اليوم الخامس مر البراشوت ومصنع الشاي الاخضر واشرب لك فيه كاس شاهي وفي اليوم السادس اطلع لبحيرة اسمها ليدو وتغد في مطعم الأسماك فيها وفي اليوم السابع من الصبح بدري اطلع لباندوق ترى مشوارها ثلاث ساعات مع السواق مر فيها المياه الحارة والبركان وفي اليوم الثامن شف لك كم مكان بالجبل تمش فيه وفي اليوم التاسع ارجع لجاكرتا وقبل تروح لجاكرتا في الجبل مكتب كاها احجز منه الفندق قبل تروح لجاكرتا المهم رح لجاكرتا وفي اليوم العاشر على الساعة 11الصبح اطلع لمدينة آنشول الترفيهية وزر فيها الدنيا فانتسي واتلانتس وعالم البحار ومر مطعم بندر جاكرتا هذي كلها بمدينة انشول وفي اليوم 11 ارجع لمدينة انشول ومر القوارب اللي تنظم رحلات للجزر واختر لك جزيرة واطلع لها وفي اليوم 12 عاد اذا كنت تبي تروح لسورابايا او شف لك مكاان ثاني الأماكن الحلوة بالجبل وجاكرتا وباندوق تقريبا خلصت المهم اذا افترضنا انك تبي تروح لسوربايا تكون مجهز حجزك من يوم توصل جاكرتا اول يوم من المكتب اللي جنب سوق الاتريوم تصرف في السوق وتمر المكتب تحجز منه ...المهم اجلس باقي ايامك في المكان اللي راح تحددها مستقبلا .....
في جاكرتا انصحك تاخذ لك وجبة في مطعم ابو نواس مطعم عربي رائع جدا ويوجد ايضا مطعم عربي آخر اسمه السندباد لكن افضلها ابو نواس ....
وبهذا اكون قد بينت لك لمحة بسيطة مختصرة عن رحلتك واترك لك حرية الاختيار انصحك اطبع الصفحة او سجل الأماكن لأن الانسان معرض للنسيان واسف اذا قصرت معك والأخوان اللي عندهم خبرة اكثر مني ارجو النظر في الجدول الذي وضعته وابداء ملاحظاتكم لكي يستفيد اخوانا الغالي ......

1. صراحة بلد جميل ورائع


2. ورائع واحترام من الاندونسيين يفوق الخيال ماكلفتني الا 12 الف بس


3. وان كان ودك تروح بعيد يبيلك اكثر من 14 يوم


4. صدقني اني جلست 11 يوم والله اني تمنيت اني جلست اكثر

هلا باخوي رومنسي
بصراحه انا رحت لاندونيسيا سنة 1427 هجري وصراحة كانت روعه انا وزوجتي فقط وهي
( اول روحه لي + ماعرف شئ هناك ابدا غير اللي عرفته عن طريق هذا المنتدى الرائع + مااعرف اللغة الانجليزيه + مكوث 11 يوم ) وش تتوقع كانت الرحله
والله والله والله كانت اروع من الرائع والحمد لله انها ميسره وكل الناس هناك يعرفون عربي ولاتخاف اذا وفقك الله بسواق محترم واغلبهم محترمين وهذا رابط لارقام السواقين
ابي اسم سائق في جاكرتا https://artravelers.com

صراحة بلد جميل ورائع

ورائع واحترام من الاندونسيين يفوق الخيال ماكلفتني الا 12 الف بس

وانا احس اني مبذر من جد شامله كل شئ ( التذاكر والسكن والتنقلات والهدايا وسعة الصدر وكل شئ في هالرحله ) لان اندونيسيا ارخص من ماليزيا بكثير ولكن ماليزيا تفوق اندونيسيا بشئ واحد وهو سحر الطبيعة ، مو معنى هذا ان اندونيسيا مافيها شئ لا بل والله فيها مناظر جدا رائعه
وش الاعمال اللي سويتها والتجهيزات قبل الطلعه
ابي اقولها لك باختصار :
1- احجز مبكرا على الخطوط السعوديه افضل بكثير حتى وان كانت غاليه
2- استخرج تاشيرة من السفارة الاندونيسيه مبكرا لان يبيلها يومين
3- اطلع على هذا المنتدى لانه افضل منتدى يتكلم عن اندونيسيا واقراء فيه عن المناطق الجميله واكتبها عندك صدقني انك بتحتاجها هناك
4- دق على احد هالسواقين ونسق معه الاستقبال ( وصدقني كل ماكان معاك سواق محترم كل ماكان رحلتك اروع )
5- بعد القراءه وتجميع الاماكن الحلوه وزع هالاماكن على جدول لمدة 14 يوم
بالنسبة وهي وجهة نظري ان اللي بيروح 14 يوم فقط يكفي انه يضع جدوله على اربعة مناطق فقط في اندونيسيا وهي ( جاكرتا وهي يبيلها 5 ايام - الجبل بنجاك 5 ايام - جزر الالف اللي حول جاكرتا مثل جزيرة اير وغيرها2- باندنق 2 ) هذا اللي مايوده يبعد عن جاكرتا

وان كان ودك تروح بعيد يبيلك اكثر من 14 يوم

صدقني اني جلست 11 يوم والله اني تمنيت اني جلست اكثر

على العموم هذا اللي عندي واحذرك من كلالالالالالالالالالالالالالالالالالالالام الناس ومنها ( غير آمنه - مافيها شئ زين - ترى بعض الفنادق غير آمنه - انتبه تعطيهم وجه - انتبه ترى فيها سحر ) والله ان كلامهم هذا انه ماعندهم ماعند جدتي كلالالالالالالالالالالالام فاضي وغير صحيح وانت رح وجرب
صراحه الكلالالالالالالالالالالام طويل وانصحك انك تتصفح هالمنتدى وتبحث فيه والله انه افادني كثير
واتمنى لك رحله موفقه

اتمنى لكم رحله موفقه ,,

ماشاء الله عليك يازيد وغشيم من الرياض.
بتفصيل الممل.
لاهنتم. وان شاء الله اخوانا استفاد من مشاركاتكم.
وشكرا

ابوفهد 2008
مشكور على تعقيبك الجميل اخوي الغالي ابو فهد .......

زيد وغشيم الله يبيض وجيهمك ماقصرتوا
لكن وش التذاكر الرخيصة يعني مثل طيران سما والاشياء هذي تنفع
او عن طريق البحرين ممكن احد يفيدني بالطيران الرخيص لأندنوسيا
وش الأفضل اخذ معي من السعودية دولار او ريال

اخوي رومنسي
بنسبه لتذاكر اكيد راح تحصلها ارخص من الصيف. وانا وانصحك بطياران اتحاد الامارات من الدمام.
واذا ماديتك زينه عليك باالدرجه الاولى......ترى لهم مميزات حلوه.....ولهم قاعة انتظار في دبي راقيه مع بوفيه مفتوح مجانا.
وايضا لا تنسى شاشات العرض في الطياره لكل راكب شاشة عرض لترفيه.
انا افضل انك تاخذ دولارات. واذا وصلت اندونيسيا اصرف لك 200 دولار من الصرافين اللي باالمطار......وبعد ما تروح لسكن في جاكرتا وترتاح. روح لمجمع الاتريوم راح تحصل صرافين في الدور الرابع او الخامس اسعارهم ممتازه لصرف.
وشكرا

موضوع في غاية الجمال
والاجمل الردود من اهل الخبرة

ابو فهد الله يعطيك العافية يالغالي
بالنسبة للطيران تقول من الدمام افضل طيب انا ساكن بالرياض ومالفرق بين الطيران من الدمام والطيران من الرياض
يالت تعطوني تليفونات طيران الاتحاد والطيران الآخر طبعا ابي اقل الاسعار اذا امكن
والله ماقصرتوا الله يعطيكم الف عافية