طريقة طلب الفيزا بالصور
السلام عليكم و رحمة الله و بركاته
شلونكم
هذا اول موضوع لي في البوابه الحبيبه بوابة بريطانيا حدي مستانسه
و ان شاء الله ما راح يكون اخر موضوع ...
انا ان شاء الله رايحه في يوم 18/4/2009 ل بريطانيا للعلاج ... و ما راح أتكلم عن العلاج لانه ممنوع مواضيع العلاج بالمنتدى
بس شفت كثير يسألون عن الفيزا و طريقتها و شروطها ....
راح أقولكم طريقة الفيزا العلاجيه ... و أكيد السياحيه و الدراسيه تشبه لها
و طبعا راح أشرح بالصور ....
الاوراق المطلوبه للفيزا ...
اذا رايحين علاج نفسنا ... لازم تأخذون ورقة الموعد من ادارة العلاج بالخارج ... هذي هي :

و بعد هذي الورقه ... ورقة طلب فيزا :

و طبعا الجوازات : أو صور عنها ..

و صور شخصيه خلفيتها بيضه ... نفس حجم صور الجواز .. 4 6x
بالحجاب ... لا أحد يقط حجابه
كشف حساب من البنك لآخر 6 أشهر
و شهادة راتب ... تبين شكثر معاشك
جهزتوا الطلبات !! ألحين نروح ل المركز البريطاني للتأشيرات :
يفتح من الصبح يمكن الساعه 9 و يسكر الساعه 4 العصر

مكانه عند البنك المركزي :

لما توصلون ل المركز ... طبعا يقولون لكم حطوا التلفونات صامت ... و يفتشونكم قبل تدخلون
بعدين يعطونكم استمار تعبونها ....
تعبئة استمارة طلب الفيزا :

و الله الاستماره تخرع ... كأنها امتحان .. ألف صفحه و كلها انجليزي ... انا الحمدلله زينه بالانجليزي بس فيها اشياء مو مفهومه ... و كان باقي نص ساعه و يسكرون ... قلت للموظف اللي هناك عبيها لنا قال ممنوع
قعدنا انا و زوجي نعبيها و اللي ما عرفناه خليناه ... و ردينا للموظف ... لقينا الهندي اللي عنده يعبي ل ناس :112:
يوم شاف اننا شفناهم ... عبى لنا الورقه
و طبعا نص الكلام اللي كتبناه غلط أكيد قال عننا هذول مو كفو يروحون لندن
و بعد ما عبى لنا الورقه ... عطانا رقم و نطرنا دورنا ...
و لما جى دورنا ... عطيناهم الاوراق المطلوبه و كل شي
و دفعنا الفلوس ... 30 دينار للشخص
يعني انا و زوجي ب 60 دينار
لمدة 6 شهور
قلت ما فيه اكثر من 6 شهور
قال العلاج لهم فقط 6 شهور
و بعدين رحنا ل غرفه مسكره ... أخذوا مننا بصمة العين و بصمة الاصابع
و قالوا بعد 3 أيام تجون تأخذون الفيزا ... و عطونا وصل عشان لما نجي نأخذ الفيزا
و فعلا 3 أيام بالضبط و خلصت الفيزا
و هذي هي :

و نفس ما شايفين ... مبين فيها تاريخ بداية و انتهاء الفيزا ...
احنا طلبنا انها تبدأ من 18/4/2009 ... يوم السفر ان شاء الله
و بعد ما طلعت الفيزا ... رحنا حجزنا التذاكر ...

و الاسعار نار :112:
الله يخلي لي امي الغاليه ... حجزتهم من وراي
و ما بقى الا اننا نسافر .. ان شاء الله
نسيت اقولكم ... سألت من ورى امي عن اسعار التذاكر ... و طلعت التذكره الوحده = 185 دينار
ان شاء الله ما اكون نسيت شي ...
و ان شاء الله راح أتواصل معاكم من هناك قد ما اقدر ... و اكتب لكم تقارير عن اي مكان نزوره
على قولة زوجي ... الاخت رايحه سياحه مو علاج
أدعوا لنا نروح و نرجع بالسلامه ...
و ادعوا لنا بالذريه الصالحه
ربي هب لي من لدنك ذريه طيبه انك سميع الدعاء
ربي لا تذرني فردا و انت خير الوارثين