هلا اخوي ... وزين ما سويت باختيارك لتايلاند
وانا ابقتبس لك ردي لاحد الاخوة
ابو يزيد كيف حالك ... انت يبيلك قعده
انا دائما ما انصح اللي يسافرون لتايلاند انهم يسافرون بالاقساط تقولي كيف اقولك على ثلاث مراحل
المرحله الاولى : تقص التذاكر قبل الرحله ب 3 شهور 5000 ريال تقريبا لشخصين على طيران الاتحاد
المرحله الثانيه : تحجز الفنادق عن طريق الانترنت تقريبا 5000 ريال او اقل
قبل موعد الرحله بشهرين
المرحله الثالثه انك تدبر 5000 ريال وتحولهم دولار وتركب طيارتك وتقلع مصروف باذن الله كافي وزياده
الترتيب :
1 بانكوك راحه
2 بانكوك السوق العائم
3 بانكوك سيام بارك او دريم ورلد او سفاري ورلد
4 السفر الى فوكيت راحه
5 فوكيت على الشاطيء تسدح وتمرغ
6 فوكيت فيه رحله بسيطه لعدد من الاماكن القريبه من شاطيء الباتونج
7 فوكيت رحله الى جيمس بوند ايلاند
8 فوكيت راحة واستجمام
9 فوكيت رحله الى الرافتنج = قوارب مائيه وحركات وركوب على الفيل و سباحة تحت الشلالات
0فوكيت راحه واستجمام
1فوكيت رحله الى جزيرة بي بي ايلاند
2التوجه الى بانكوك تسوق وتمشي على الخفيف
3بانكوك تسوق
4بانكوك اللي مارحت له من سيام بارك دريم ورلد او سفاري
5بانكوك قو تو هوم
اما الفنادق
في بانكوك اسكن باي فندق وقل ما قاله فيصل وهذي نصيحة واحد تايلاندي
وفعلا اول يوم سكنت بفندق دريم 3300 بات الليله وبعده طلعت وسكنت بفندق ب 1500 بات ما حسيت بالفرق لاني ما ارجع الا وقت النوم
بعكس فوكيت االي بقد ما تقدر تدفع ادفع
في فوكيت ارشح لك فندق قريس لاند سعره 3500 بات ريال تقريبا اربع نجوم وحلو مره مره (يومين)
وكذلك فندق بان لايامي سعره رخيص ب 2000 بات ( يومين
وكذلك فندق ثارا هذا رخيص 1800 بات ( 3 ايام )
كل الفنادق اللي ذكرتها قريبه مره البحر تروح للبحر مشي
اتمنى اني افدتك وانا على اتم الاستعداد بالمساعده
اما بالنسبه لزوجتك الامر طبيعي جدا وما فيه اي مضايقات باللبس العربي المحتشم
وجميع البرامج اللي ذكرتها لك حلوه ومناسبه لك ولزوجتك
اما بالنسبه للمدن انا اشير عليك تكتفي بمدينتين ... لماذا؟
لان المده قصيره ولو جعلتها بين 3 مناطق تضطر للسفر كل 3 او 4 ايام وهذ متعب جدا
واي استفسار او تعديل انا تحت الخدمة

هلا اخوي حمد
طبعا ابو الشباب فيصل ما قصر وكلامه زين على زين
وانا معاه في انك تروح بوكيت وبانكوك لأن مدتك قصيرة نسبيا
وقضية العباية والحجاب ابد ما فيها مشكلة وراح تلاقي الديرة هناك مليانة بالعرب والمتحجبات وفي اخوات محافظين على نقابهم بعد.
الحياة في تايلند سهلة وكل الامور ان شاء الله بتكون على ما يرام وراح تستانس(اي يبة اش عليك ):112:
بالنسبة للبرنامج انا افضل تجلس ليلة وحدة ببانكوك للراحة وتذهب بوكيت في اليوم الثاني على طول لمدة 6 ايام وتستمتع بالبرامج والرحلات اللي تقدر تحجزها من مكاتب الحجوزات اللي ما في اكثر منها هناك وبتشوف بعض المكاتب على شكل اكشاك متنثرة على طول ساحل الباتونج بيتش واختار الافضل منها حسب مزاجك وميزانيتك.
من افضل الفنادق اللي جربتها على الباتونج بيتش في بوكيت كان الهوليدي ان لأنه يطل على البحر وجنبه كل شي وشارعه حي، لكن جنبه فنادق سعرها ارخص وحلوة .
بالنسبة لبانكوك راح تكون حلوة للتسوق اضافة الى بعض الاماكن السياحية مثل السوق العائم او الدريم وورد...الخ حسب ما انت ترغب فيه.اما بالنسبة للسكن في بانكوك هذا يرجع الى مزاجك وميزانيتك بعد. بالنسبة لي دائما احب اسكن بعيد عن نانا _مع اني ازورها كل يوم عشان المطاعم -:36_1_51:
بالنسبة للفنادق تقدر تروح لموقع sawadee وشوف الفندق اللي يناسبك .
واي استفسار حاضرين لك يا ولد ديرتي

فيصل الأحمري
تسلم أخوي على المعلومات الجميلة والقيمة حقيقة وكلامك فادني كثير لاكن البرنامج المقترح أشوف أن بعض الأخوة في المنتدى برنامج يومين عملوه في يوم واحد .
وعندي لك سؤال ياخوي هل الوقت نهاية 6 أو بداية 7 في أشكالية بالسفر من حيث الأسعار قد ترتفع ؟
برنامجك لمدة 15 يمو الي فهمته يكفيه 15000 ريال ، هذا صحيح ولا.
ولو حطينا السفر لفوكيت وبعدها للنكاوي بماليزيا وبعدها لبانكوك وفي واحد نصحني اطلع من بانكوك بالقطار لبتايا يوم واحد من الصباح إلى العشاء تقريباً . هل يكون هذا مناسب وكم التكلفة الإجمالية تقريباً
أخوي محتاج وطن
سلمت ياخوي وتفضل نخليها 15 يوم بس لو تقدر تحط لنا التكلفة لأن المشكلة بالتكلفة ياخوي وتخبر شهر العسل في بداية المرحلة يعني أنت تكون حزتها مستنزف من كل الجهات .
ومثل ما قلت لأخوي فيصل عن البرنامج الي اقترحه لنا أحد الأخوة بس ماعندي علم بتكلفته .
اتريا برنامجك طويل العمر

أخوي سلمان
باهلا ومرحبا بيك ياولد الديره بس لو تسمح لي أخوي عاد الحين انا امون عليك خ
ياخوي المكاتب السياحية الي هناك عادي اتعامل مع كل واحد يعني عندهم مصداقية واسعارهم مشابهه ولا لازم افاصل على السعر
وكيف الأمان اهناك يعني عادي اعطي واحد الكاميرا يصور
طيب وأنا بالنسبة للبيج والمسابح ما أفضلها كثير بحكم اللبس للأجانب هناك وماراح آخذ راحتي ولا زوجتي بعد فأهم شي عندي بالفندق الغرفة ونظافتها وترتيبها الداخلي .
وليش تسكن بعيد عن نانا وشنوتطلع نانا أصلاً واش فيها بس شهيتنا ياخوي
وتبغي الصج أنا دشيت للموقع الي ذكرته بس شوي ضيعت بسبب اللغة فأخوك لغته مب بذاك الزود والله يستر إهناك لايبيعوني.
ولاعدمناك أخوي
اخوك حمد محمود

أنصحك ماتروح ماليزيا وخليها كلها في تايلند
كذلك لا أنصحك بالذهاب لبتايا
بالسلامة
وألف مبروك الزواج
أتمنى لكما حياة سعيدة

وعندي لك سؤال ياخوي هل الوقت نهاية 6 أو بداية 7 في أشكالية بالسفر من حيث الأسعار قد ترتفع ؟
شهر 6 و 7 و 8 و 9 و 10 تعتبر لو سيزون يعني الاسعار رخيصه وقريبه من بعضها في هذه الاشهر والفنادق الاسعار موحده
اما 11 و 12 و 1 و 2 الهاي سيزون ترتفع الاسعار لكثرة السياح الاوربيون
برنامجك لمدة 15 يمو الي فهمته يكفيه 15000 ريال ، هذا صحيح ولا
باذن الله انها كافيه عن نفسي
سكنت بفنادق متفاوته بين الفخامة والمعقوله
الاكل الحمد لله ما حرمت نفسي اي حاجه حلوه
التسوق كلفنا تقريبا 2000 ريال بدون هدايا
الرحلات رحت لاغلبها
ولو حطينا السفر لفوكيت وبعدها للنكاوي بماليزيا وبعدها لبانكوك وفي واحد نصحني اطلع من بانكوك بالقطار لبتايا يوم واحد من الصباح إلى العشاء تقريباً . هل يكون هذا مناسب وكم التكلفة الإجمالية تقريباً
فكره سيئه جدا لسبيبين هما :
بالنسبه لبتايا فهي جدا سيئه ولا تصلح للعوائل لكثرة العزاب فيها
اما بالنسبه للنكاوي تعوضها بفوكيت
انا اعتقد ان يوم في فوكيت عن 3 ايام في لنكاوي
لنكاوي ما فيها الا الشاطيء وفنادقها غاليه ( لاتغلط غلطة حياتي وتروح شهر العسل لماليزيا)

سلمت أخوي فيصل وبارك الله فيك ولاحرمنا من صحبتك وفوايدك
طيب ياخوي لو باسوي برنامج ل13 يوم أو 15 لتايلند على مدينتين ولا3 واخاف 3 تطلع زود
واحجز من الحين ولا قبل شهر ونصف شهرين تقريبا
وأي طيران أرخص تقريباً (ولو حجزت من البحرين أفضل ولا أحجز من الدمام )
وعن بتايا أنا خبروني على هل أساس قتلك يوم واحد دون ليلة من الصباح إلى قبيل المساء حتى حديقة النمور والسينما / العزاب راح يأذونا هناك يعني مضايقت لي ولزوجتي
والسموحة طويل العمر
أخوك الصغير

أخوي سوديرمان
اشكرك على مشاكرتك اخوي وأتمنى أنك تواصل معانا ولاتحرمنا مساهماتك
أخوي محتاج وطن أو أي حد من الاعضاء
ممكن برنامج في حدود 1000 ريال غير شامل الطيران الخارجي ولو يزيد شوي ما في مشكلة بأذن الله .
وسؤال للأخوة اجمع في فوكت أحجز على فندق واحد او فندقين أحسن وهل هناك مكاتب للبرامج السياحيح معينة ولا كلها ثقة
أخوكم