MrFahad
18-11-2022 - 09:48 am
االسلام عليكم يااخوان!
حنا 5 شباب رايحين ان شاء الله لابها بكرة وللاسف هذا اول زياره لنا ومانعرف شي بصراحه! بس كل الي شايل همه هو السكن للعزاب حاب احجز ياشباب!
واقولها لكم ع بلاطة كل واحد من الشباب معه بس 500 ريال ( وواحد معاه بس 150 ريال < اص ااستر عليه ) وراح نكون في ابها 6 ايام والله ماحسبنا شي وشكلنا بنخربها!
استفسار ثاني ، الي هو وسيلة النقل في ابها ، حنا ماعندنا سياره ، ماادري كيف النقل يعني فيها تكاسي او تنصحوني اني استاجر سياره ، وكم العمر المسموح لمن يريدون ان يستاجرو سياره!؟ كم اقل شي! < طفران ض1
اخر استفسار مادري حنا فكرنا نستاجر خيمه ونسدحها في جبل السوده بدل مانستاجر شقة وتكلف علينا! < مدري وش رايكم ياجماعة الخير!
^^^^^^^^^^^^^^^^^^^^^^^
قايلكم مخربينها من بدري
وجزاكم الله خير! =)
رحلتكم هذه تذكرني بذكرى الأترام الصيفية عندما كنت أدرس في الجامعة ,
كان الأهل يروحوا الديرة وأقعد أنا والزملاء وكان الوالد الله يطول بعمرة يحاول يقنعني أروح معاهم
فأرفض بحجة الحاجة لأخذ ساعات إضافية في الجامعة , فكنت حريص على الجلسة والله مو علشان الدراسة بس علشان جو الصيف ,
وكان هذا حال الأصدقاء كلهم يروحون أهاليهم في الصيف لزيارة أقاربهم في الديار ويحضرون المناسبات ويهربون من زحمة الصيف وكنا نخيم في الحبلة طوال فترة الدراسة اللي تستمر طول الصيف ,
ونقعد فرحانين ومستانسين وكان تحصلنا كل يوم هاجين ديرة مرة السودة ومرة المسقي ومره القرعاء ومرة طور آل يزيد ,
وثاني يوم الصبح نقعد مفهين ونايمين في قاعة المحاضرات وكانت حياتنا فلة ووناسة فقدناها الآن مع كثرة لالتزامات الاجتماعية .
وكان طول اليوم مسوين فيها فزاعة
هذا ندلة على مكان وهذا نساعدة في تحجير سيارته وهذا ننصب معاه الخيمة وهذا نعطية ملح وذاك نأخذ منه شوية حطب ونروح نسمر معى الشباب اللي في الخيمة اللي جنبنا إذا شباب خيمتنا ناموا و نعزمهم ويعزمونا ,
أيام حلوة بالرغم من قوة الطفرة أحيان كثيرة مع تأخر المكافئات وبعد الأهل
أذكر إن مرة واحد من الشباب من قوة الطفرة شغل سيارته وأخذ معاه واحد منا وراحوا على مزرعة وطمروا فيها ( الله يغفر الذنب ) وجابوا رمان وتين وحطب وقعدوا يبيعوه عند الخيمة واللي كان يروح المطار يوصل مشوار والا مشوارين ويجيب فلوس وكان الجيب واحد,
(( أيام والله أدفع فلوسي كلها وترجع )).
طولت عليكم
ولكن المهم هنا أنكم بالرغم من قلة فلوسكم تستطيعون تفلونها 100%
وصدقني راح تنبسطون على الآخر لو عرفتوا تصرفون بشوية تدبير
مثل أنكم تأخذون عزبتكم كاملة معاكم من خيمة ولوازمها ومعاميلكم من أدوات الطبخ والشاهي
وتتركون الإجارات في الشقق وتقعدون بالبر
وكل يومين في مكان أول يومين في السودة ويومين في الحبلة ويومين في القرعاء ولا طور اليزيد
وتضبطون مع صاحب سيارة خاصة يجي ينقلكم من فترة لأخرى يعني راح يكلفكم اليوم بمصاريفه كاملة أقل من 300 ريال إذا عدتكم كاملة
وأبعدوا عن الأسواق و المولات لأنها ببساطة عوايل ومصاريف وما راح تقاومون المعروضات .
والله يوفقكم ولا تتراجعون مرة
والله لو إني موجود في أبها حالياً ماراح أقصر معاكم
كان وفرت لكم السيارة وجبت لكم عدة الطبخ من إسطوانة وخلافة ولكن شبه الضوء زينه . وأعذرونا