السلام عليكم ورحمة الله
القراءة ثم القراءه
نعم انا فهمتك
وماخليت ولابقيت اي حرف عن جنوب افريقيا في المنتدى الا ومريت عليه
وهذا اللي خلاني اتوكل على الله وانوي اقضي شهر العسل في جنوب افريقيا
طبعا هذا حجز مبدأي لمدة 15 يوم قابل للزيادة حسب نصايحكم
والسفره ان شاء الله في منتصف سبتمبر زي مو موضح بالحجز فوق وبالتحديد يوم 12 سبتمبر الوصول ان شاء الله
ويوم 26 سبمتبر المغادرة وزي ماذكرت عدد الايام قابلة للزيادة قبل ما اشتري التذاكر بحول الله اذا تنصحوني بذلك
طبعا الغرض من الرحلة قضاء شهر العسل الله يمتعنا واياكم ويجعل شهورنا كلها عسل × عسل
والميزانية للان ماوضعت لها تصور بشوف كم بيبقى بعد التاثيث ومصاريف العرس وبسافر بالباقي خ
لكن خلونا نقول الميزانية معقولة حسب التكاليف اللي ببتكرمون وتعطوني فكرة عنها
والصراحة بما انها شهر عسل ودي اعرف افضل المدن اللي تنصحوني اروح لها يعني مثلكم خابرين معي بنت الحلال
لاتعرفني ولا اعرفها خ اقصد مافيه ميانه لسا وياتحشرني يا احشرها هع
يعني لو تتكرمون وتخاطبوني بلغة قومي مثلا روح للمدينة الفلانية واقعد فيها كذا يوم وبعدين الديرة الفلانية وكم يوم
وسير على البلد الفلاني لايفوتك تقعد فيه كم يوم يعني مافي شي محدد وش تنصحون اللي مثلي بيروح هناك
وبيقعد من 15 الى 20 يوم
واذا ماراح اثقل عليكم في كل ديرة توضحون لي الفندق المقترح للاقامه ولاتنسون انه شهر عسل يعني وين نروح ووين نجي
وش احسن وقت تطلع فيه ووش الوقت اللي لازم تكون فيه بفندقك بالع العافيه اسواق مطاعم كويسه ومعليش احس اني ذليتكم كل شوي قايلكم لاتنسون تراه شهر عسل
صراحه ماعمري سافرت سفره عائليه كل سفراتي يالحالي يعني مع شباب وماعندي مشكله بذاك الوقت
بس الحين الوضع تغير مع بنت الناس وماودك تطب في مواقف مالها داعي خابرين شهر عسل خ
والسيارة لازم اخذها من اول يوم والا فيه ديره لازم لها سيارة وديرة ثانية مالها داعي السيارة
انا الحمدلله لغتي الانجليزية كويسة وسواقتي كويسه بس ماعمري سقت دركسون يمين الا مره في بريطانيا وهاتك
ياشطف بالارصفه لكن لندن غير خ الحين شهر عسل الوضع بيكون خطير بالسواقه خ شكلي بتفل
على بنت الحلال تخبرون الواحد متعود الشباك على يساره خ
مدري انا سالت عن الجو والا لا بس كيف الجو في سبتمبر يقولون موسم تزواج الاسود وانا عندي فوبيا من الاسود
مع اني قريت انه فيه حركه تسويها اذا قابلت اسد وباذن الله مايجيك شي بس هالحركه مالها داعي تسويها وفيه
احد يشوفك وخاصة اني في شهر عسل ام الاحراج
على فكرة وين احصل ابن الحلال القارمن في الرياض وعليه خريطة جنوب افريقيا
سؤال على الطاير
قبل كم سنه شفت برنامج على الجزيرة الوثائقية عن جنوب افريقيا عن منطقة فيها اسمها جنة عدن الله يرزقنا واياكم
الفردوس الاعلى من الجنه برحمته عز وجل
وين هالمنطقة اذا مرت عليكم وكيف وضعها
وبالختام متوقع ان الواحد تجيه شرهات في عرسه من العالم ولازم يردها هدايا وين افضل الاماكن اللي نتسوق
فيها ونشتري هدايا الحمد لله بنت الحلال ماعندها خوات خ
هرمنا
هرمنا
من اجل ها اذه اللحضه
عشر سنين وانا اتنحش عن الزواج لين صادوني متلبس في حالة ضعف عاطفي وبيزوجوني والحمد لله انهم صادوني
والا كان تلقوني متبطح في بوابة المغرب هالوقت خ
كثرت عليكم بس مالي الا الله ثم انتم
انتم مسكوني الدرب ومالكم الا اللي يبيض وجيهكم
واول واحد يرد علي بسمي اول مولود ان شاء الله ورزقنا بسميه عليه
ويعطيكم العافيه مقدما واخر دعوانا ان الحمد لله رب العالمين