1. من الجبيل الى عمّان في الأردن بالسيارة ، 1500 كلم تقريباً


2. وانت مسافر يكون الطريق ما أحلى منه لكن وانت راجع ما فيه أثقل منه


3. ‏" شرم الشيخ "‏


4. ‏* ماعندهم وايرلس ... واذا تبي انترنت فيه دايل أب بس سعره غالي ...‏


5. صورة للمطار من برا


6. صورة لغرفتنا في الفندق بس بعد الحوسه طبعا


7. صورة للشاطئ من زاوية احترافية ;)

تبغون تطيرون ل شرم الشيخ ؟!‏
كل واحد يربط حزام الامام ويناظر الشاشة اللي بوجهه
‏ باخذكم رحلة قصيرة جدا جدا مدتها خمس أيام وأربع ليالي ... ياليت لو كانت أطول ‏
أول شي باعطيكم فكره عن خط رحلتنا ... ‏

من الجبيل الى عمّان في الأردن بالسيارة ، 1500 كلم تقريباً

طبعا 90% من المسافة كلها على الأراضي السعودية ... يا طول خطوطها ... عسى من ذا وأكبر
من الجبيل مشينا 180 كلم لمدينة النعيرية ومنها 250 كلم الى حفر الباطن ومنها 240 كلم الى رفحاء ومنها ‏‏290 كلم الى عرعر ومنها 240 كلم الى طريف ومنها 140 كلم الى القريات ومنها 10 كلم الى مركز الحديثة ‏الحدودي ومنه الى مركز العمري الحدودي في الاردن ومنه 140 كلم الى عمّان عاصمة الاردن‏

وانت مسافر يكون الطريق ما أحلى منه لكن وانت راجع ما فيه أثقل منه

جلسنا في الاردن يومين في شقة أخوي بالصويفية وحجزنا من مكتب سياحي هناك رحلة لشرم الشيخ مدتها ‏خمس أيام شاملة تذاكر الطيران والفندق (+بوفيه افطار وعشا) والتوصيل من والى المطار في الشرم ... السعر ‏للشخص كان 1300 ريال تقريبا ... وكل فندق كان له سعر خاص ... يعني مثلا الماريوت كان سعره 1580 ‏للشخص (+بوفيه افطار) ... انا سكنت في الماريوت سنة 2004 فندق ممتاز بس عيبه انك تمشي مسافه على ما ‏توصل لخليج نعمه

‏" شرم الشيخ "‏

ما أبغى أتكلم عن المعلومات الأساسية كثير لأن أغلبنا عنده فكره عنها لكن من الواجب أني أعرّف عن هالمدينة ‏يمكن بيننا أحد يجهلها ... شرم الشيخ مدينة سياحية في مصر تقع جنوب سيناء على البحر الأحمر وتبعد عن ‏القاهرة 500 كلم تقريبا ... ‏
أغلب أنشطتها السياحية تدور حول البحر : سباحة ... حمام شمس... رحلات بحرية ... رحلات غوص ... ‏رياضات بحرية (جتسكي وبراشوت وبنانا والقارب الزجاجي والتزلج البحري غير اللي ما اتذكره) ...‏
وفيه أنشطة سياحية غير بحرية مثل : الدبابات ... العشاء البدوي ... ألف ليلة وليلة ... التسوق ... المقاهي ...‏
زيارتنا لها كانت في بداية شهر يوليو ، وغالبية السياح في الشرم هم الأجانب ... اذا تبون بالنسبة والتناسب بأقول ‏أن 80% من السياح هم أوروبيين وأمريكيين وشرق آسيويين ... 10% عرب ومصريين ... 10% خليجيين ...‏
‏* المدينة ما تناسب العوائل الخليجية لأن أغلب الأجانب والعرب تثقل عليهم الملابس ويضطرون يلبسون ‏خفيف...‏
‏* شرم الشيخ أغلبها فنادق ومنتجعات ‏
‏* الأسعار مقبولة كمدينة سياحية وما أشوفها غالية مثل ما يفكرون الناس
‏* شارع ملك البحرين في الشرم مثل السوليدير في لبنان والشانز في باريس ... ويجي بعده في الأهمية شارع ‏السلطان قابوس
‏* ‏
" فندق خليج نعمه"‏ (خمس نجوم)
http://www.naamabayhotel.com/Home.htm
غرفتنا كانت ثلاثية مطلة على خليج نعمة (احنا ثلاثة شباب)‏
وهذي صور للفندق من موقعهم على الانترنت
ايجابيات ومميزات الفندق من وجهة نظري هي :‏
‏* موقعه المتميز جدا واللي أرشحه يكون أفضل فندق في شرم الشيخ من حيث الموقع لأنه يقع في قلب خليج ‏نعمه واللي هي الدوان تاون ل شرم الشيخ ...‏
‏* الفندق فيه ثلاث مسابح حلوة ورايقة ...‏
‏* كانت حجزنا يشمل بوفيه افطار وعشاء في الفندق ومطعمهم رايق حيل وفيه مناظر ممتازة سواءاً على المسبح ‏أو على خليج نعمه ...‏
سلبيات الفندق :‏
‏* الفندق ما ما يقع على البحر بشكل مباشر لكن بينه وبين الشاطى مسافة 150 متر تقريبا ولهم شاطئ خاص ‏بنزلاء الفندق ...‏
‏* الجلسه في لوبي الفندق ما جازت لي حيل مع أني أقدر الفندق اللي يهتم باللوبي ...‏

‏* ماعندهم وايرلس ... واذا تبي انترنت فيه دايل أب بس سعره غالي ...‏

وصلنا المطار الساعه 3 الظهر ... المطار جديد ويقولون أن افتتاحه كان قبل شهرين ... لكنه كان مطار صغير ‏وكل الطيارات اللي فيه من النوع الصغير ... ما شفت ولا طيارة للخطوط السعودية او الكويتية او طيران ‏الامارات ! ... ‏
صورة داخل المطار لما نزلنا من الطيارة

صورة للمطار من برا

طلعنا من الجمارك واستقبلنا موظف الشركة السياحية ... ركبنا الباص وتوجهنا للفندق ... وقعدنا في الباص ‏تقريبا ساعه ونص لأن الجروب كان متوزع على أربع فنادق ... وفي كل فندق ينزل موظف الشركة وينهي ‏اجراءات تسكينهم ومن حظنا ان فندقنا كان آخر فندق

صورة لغرفتنا في الفندق بس بعد الحوسه طبعا

أول ما دخلنا الغرفة حسينا بنشاط غريب ... على طول طقينا شورتات ونزلنا للبحر – بس شورتي كان أحلى ‏لأني شاريه من الراشد وهم من طابا - ... الشاطئ والبحر نظيفين والمناظر حلوه وعالم رايحه و عالم ‏جاية قدام عيونك تخلي صدرك ينشرح وينسى تعب السفر والمطارات ... تسبحنا لما طلعت المويه من خشومنا ‏‏... وانا بوسط البحر سمعت أصوات قريبه مني وناظرت إلا أشوف واحد قاعد يخبّط بالمويه ويصيح ...واضح ‏انه كان يغرق ... : هاه يا ولد اروح أسوي فيها منقذ !... الله وناسه كل اللي بالشاطي بيقولون وش هالبطل اللي ‏اول مره نشوفه على الشاطي ! الله بييصوروني ويمكن اذا شافوني يأشرون على بعض ويسولفون عني ... الله ... ‏يا حلو طعم الشهرة يا عيال !! ... وانا اللي أسبح له طيران ... ولما قربت منه أبغى أنقذه إلا فيه واحد سبقني ‏وانقذه ... حقدت عليه ... ليه يتلقف ؟!!... خرّب علي أفكاري الغبية اللي اعيش فيها أوقات الحماس وأتهور !‏
صورة لشاطئ الفندق

صورة للشاطئ من زاوية احترافية ;)

قبل لا نرجع الفندق حجزنا حق ثلاث رحلات : رحلة السفاري (دبابات) مع استراحة الشاي البدوي – رحلة ألف ‏ليلة وليلة – رحلة لجزيرة تيران باليخت مع بوفيه غداء مجاني.... سعر الرحلات الثلاث لكل شخص 70 دولار ‏‏... ما يعادل 260 ريال ... السعر معقول ‏
صورة من داخل البحر
اتعشينا في الفندق وبعدها سهرنا في مقاهي شارع ملك البحرين الى الساعة 1 بالليل لما كبس علينا النوم ...‏ ورحنا نرقد
صورة منظر خليج نعمه اللي تطل عليه الغرفة
ترقبوا في الجزء الثاني (شغل مسلسلات مصرية) :‏
‏- رحلة للسفاري والشباب اللي طالعين من قبر !‏
‏- اثنين من المشاهير السعوديين وقفناهم وصورنا معهم وانبسطوا لأن الظاهر ماحد عطاهم وجه غيرنا !‏
‏- رحلة ألف ليلة وليلة والشخص اللي شفته وبغيت أستفرغ !!‏
S a A a A a H i