1. وانا مثل كثير غيري سمع عن المنتدي وشاف واستفاد .

السلام عليكم
في البداية كل الشكر والتقدير لكل الاعضاء (الاخوات-الاخوة) لانه ما ينصحك الا الى يبيلك الخير مثل نفسه .

وانا مثل كثير غيري سمع عن المنتدي وشاف واستفاد .

في البداية قبل الاستعداد للسفر كالعادة السنوية الله لا يغيرها علينا من نعمة وعلى المسلمين اجمعين المحطة الاولى والاخيرة هي باريس لحبي لهالمكان ما ادري ليش ماني من هواه القهوه ولا الجلسة في المقاهي الى في كل شارع موجودة بس احب اروحلها وفيه صحبه طيبة واخوان احب ازورهم كل سنة وتعودت على هالشي من فتره .
السنة هذى غير معانا طويلة العمر (5سنوات) ومن الصيف الماضي وهي تهدد وتتوعد انى لازم اروح باريس ولندن مثل العام مع كثرة المحاولات في ارضاء غرورها والسفرات لبيروت معشوقتي الثانية ودبي لاكن كل المحاولات بائت بالفشل وتوزيز ار اص يشهد على بس الشكوة لله .
فا هالمره بتكون غير يعني لازم ندقق اكثر بيكون فيه ديزني ؟ سبق وزرتها قبل سنتين . ولازم ترضى علينا طويلة العمر . والسفرة هالسنه بتكون اطول لانه ما عندنا احد يعاتبنا كل ما كلمنا او انك مخلى بنيتك ومسافر .
قررت انها تكون شهر ونص اول ما تخلص طويله العمر نمشي على طول وكلمت الجامعة وتاكدت متى يخلصون ههه ( في كي جي 1 ) وقررت انه تكون باريس ودزني وبعدها نرجع باريس او نطلع نفر ونشوفلنا مكان هادي وبارد نقعد فيه لو اسبوعين .
بديت اسال عمنا قوقل وكل شوي المسافرون العرب طالعتلى دخلت عليها وكنت اشوف فرنسا وميلان فقط هذا التخطيط شوبنق 3 ايام كالعادة والله يعين و يصبرنا هاليومين الى بنروحها .
بالصدقه صديق مقرب لي كان يكلمني على حجز سويسرا وانه ملاقي صعوبة بالطيران (على فكره عندنا السنه هذى بالسعودية الخطوط وموظفينها يشتكون بحكم قصر الاجازة وتعارضها مع رمضان ) سالته عن سويسرا بحكم انهم من الملاك هناك بس للاسف الرجل اعرفه زين يعرف كم مطعم وكم قهوه ما راح يفيدنا رجعت لعمنا قوقل وبديت اشوف شي ما سبق وسمعت عنه .... انترلاكن سالت ثلاثه من ملاك سويسرا ربعي ما فيهم احد عرفها . اشوي ابوعزيز طالع اول موضوع عن سويسرا خبيره سويسرا هايدي (كل الاخوة خير وبركة وخدموني كثير بس هذى الاسامي علقت في ذهني بكثر ما اشوف مواضيع ).
الشغل بداء يحمى الشغله فيها ديره جديدة وسيارة انا من الناس نادر ما اخطط بحكم قله تنقلاتي وباريس ما عندي مشكله بالسكن فيها .
توكلت على الله وقلت سويسرا هالسنه لازم اعرف وش موضوعها اكيد هالناس كلها شايفه شي انا ما شفته وبحكم اني انسان كلاسيكي اكيد بتعجبني واذا ما عجبتني رحت اي ديرة ثانيه النمسا قريبه والمانيا بعد ما عندي مشكله قلت خلها بدون ترتيب وقبل ما اطلع من باريس ابحجز وفعلن وصلنا باريس واخيرا ست الحسن والجمال شافت باريس وتم تسخير كل الامكانيات في سبيل اظهار باريس على اجمل حله للترحيب بالملكة جوجو الاولى وكنى اربع مرافقين وريحنى في باريس 3 ايام وكانت مليئة بالزيارات لمحلات الايس كريم وماكدونالدز (البطاطس+الكاتشب ) الوجبه الرئيسية عند طويلة العمر وزرنا دزني واستمتعت انا اكثر صراحه لاني هالمره لعبت كثير وبعد اربعة ايام حافلة بالطوابير وميكي ماوس وميمي والاميرة النائمة تم الخروج من دزني بسلام بدون اي عتب او احساس بالتقصير وكانت راضيه علينا وهي المره الاولى واستبشرت خير توجهنا لباريس واسترحنا يومين واخذنا سيارة واستعدينا للسفر بدون تخطيط اخوي نصحنى في مدينه اسمها besancon على طريق سويسرا وقبل ليون ومدينه تعتبر سياحية الشاهد انى حجزت في فندق لمدة يوم ابكتشف الديرة وامشي لسويسرا زرنا المكان مددنا يومين زيادة بحكم اننا لقينا العاب لطويلة العمر وهي الى طلبت التاجيل يوم زيادة وهاليومين كلها اقعد بالليل افتش وين اروح وقع اختياري على انترلاكن قلت ازورها وقريبه 250 كيلو من موقعي وحجزت في فندق انترلاكن وقضيت اجمل 4 ايام في هالديرة الحلوة وجاء دور ميلان عشان ما تغار طويلة العمر الكبيرة من طويلة العمر الصغيرة وتم الهجوم على ميلان لمدة ثلاثه ايام وكالعاده من اسوى زياراتى هي ميلان اعتذر لكل محبين ايطاليا بس هي كذلك شوارع تجيب الهم وكلها محفره شعب غجر ما يفهم ولا عنده اسلوب ديرة موضه عجزت استوعب هالكلمة وشلون ديرة موضه وفيها ناموس قوي ؟؟؟ جسمي يشتكي في كل مكان من لدغات الناموس وكمل الناقص , نرجع ونقول انها شر لابد منه بحكم السبب المهم الى ذكرته . وانا كل يوم ادخل المنتدي واقرى مواضيع حتى عن الاسواق استفدت .
انا الان موجود بلوقانو وبعدها على ديرة ثانية ان شاء الله وهذا بفضل الله سبحانه ثم بفضل كل اعضاء هالمنتدي المتميز انا ادري انه مو اول واحد يقول هالشي ولا اخر واحد ....... الف شكر لانكم كنتوا في الموعد نصحتوا وكتبتوا تجاربكم كلها وما قصرتوا مع احد :x1::x1::x1:
ابوالجود من معشوقتي الجديدة سويسرا
اسف للاطاله وكثرة الاخطاء الاملائية بس الشكوة لله