سفرتي لسويسرا كانت من تاريخ 15 يونيو لغاية 1 يوليو, اي تقريباً 15 يوم. الاسبوع الاول كان في بيتينبرج, من كثرة البرد, الحرارة وصلت لغاية 3 درجات و امطار تتوقف للحظات قليلة و تستمر لساعات. قمة البرودة لدرجة اني اضطريت اني اشتري جاكيت برد و قفازات و انا الي من الابتدائية ما لبست جاكيت برد. كذا, انسان استمتع بالبرودة.
اليوم الي غادرنا فيه انترلكن, كان اول يوم نشوف فيه شمس. و عينك ما تشوف الا النور. رحنا لوقانو لمدة اربع ليالي و بعدها محيط منطقة لوزيرن و لمدة اربع ليالي. و الحقيقة ان سويسرا او احتمال اوروبا بشكل عام تمر حاليا بنزلة حر مفاجئة. يعني اثناء تواجدنا بلوزيرن وصلت الحرارة لغاية 34 و بالتالي مقولة "نريد انام على اجواء الطبيعة" بتكون لها عواقب وخيمة. حاولو قد ما تقدرون تسكنون في منطقة مرتفعة او اذا حابين وسط المدينة ان السكن يكون فيه مكيف.
طبعا كثير بيقولون ياخي شوفيها, احنى متعودين على درجة حرارة 40 و اكثر و هني احب اقول ان فيه فرق كبير بين شمسنا و شمسهم. هنا اول ما تطلع يبدأ جسمك بالتعرق, هناك بيصيرلك مثل الكواية, حرارة و مافي عرق و النتجية: حريق. طبعاً لا تخلي الحر يعكر الرحلة. لا, اطلع و تفسح و ارجع بذكريات.
نفس المناطق الي رحتها انا الاهل زاروها السنة الماضية, تصوير الفيديو فيه مطر و غيوم و هذا الي خلاني اعتقد انها نزلة حر اتمنى ان تنقشع سريعاً.