1. السلام عليكم ورحمة الله وبركاته ... وكل عام وأنتم بخير .


2. جبت لكم يارواد الموقع علم غوا ونبيكم معي في هالتقرير سوا .


3. الطيران الناقل من الخليج لغوا القطرية والعربية والهندية فقط .


4. المعلم السياحي الأول : ووتر فول .

السلام عليكم ورحمة الله وبركاته ... وكل عام وأنتم بخير .

جبت لكم يارواد الموقع علم غوا ونبيكم معي في هالتقرير سوا .

طبعا ماراح أعيد المعلوم وأكرر وأعيد وأزيد شئ لا جديد فيه ، قرأت تقارير غوا من موقعنا ومن ومواقع أخرى وفيها ماهو جيد وفيها ماهو قص ولصق وتجميع كلام غير مفيد بل توريط يعني بعض التقارير غير دقيق ولا يصلح يكون مرجع لخطة سياحية ولكن التقارير يكمل بعضها البعض ولا أدعي الكمال في تقريري بل هو منقوص يحتاج لمن يعقب عليه ويغير ويعدل بعدي لمن أراد وللقارئ الخيار في النهاية ... الزبدة ندخل في الموضوع بلا هرج زايد .
تاريخ غوا معروف عند الأغلب ولكن بشكل سريع هي مقاطعة غربية جنوب بومباي كانت مستعمرة برتغالية ثم ألمانية ثم بريطانية ولكن الاستعمار البرتغالي هو الذي ظلت آثاره باقية للآن . التركيبة السكانية هندوس مسيحيين مسلمين .
عدد السكان تقريبا مليون ونص يعني عدد معقول جدا مافي زحمة واللي محلي الوضع أن المليون ونص متوزعين بين أكثر من مدينة ماهو متكدسين في مكان واحد .
الحالة الأمنية جيدة جدا والحياة الاجتماعية بين الناس ودودة والتعامل لطيف والسلام يعم المجتمع.
نصائح للتنقل داخل غوا : لازم بنطلون برمودا وزنوبة أصلية (شبشب) ومظلة لأن المطر وجريان الماء في الطريق قوي جدا ، والمظلة مو عشان المطر بس عشان الشمس لو طلعت تحرق الرقبة مو ناقصين شموس .

الطيران الناقل من الخليج لغوا القطرية والعربية والهندية فقط .

نبدأ رحلتنا : طبعا وصلت غوا الفجر على طيران العربية سعر التذكرة 2000 احجز بدري ولا راح يغلى عليك السعر طبعا أنا حجزت السكن عن طريق البوكينق وقاعد أدور الأرخص وفعلا حجزت فندقين واحد في دونا بولا اسمه sandalwood ثلاث ليالي 550 ريال مع الفطور أربع نجوم حده ثلاث نجوم وتخب عليه بعيد وموقعه موحش والتكاسي سلخ والكهرباء وقنوات التلفزيون كلها هندية وقاشلة ، والكهرباء تقطع بس الغرف حليوه .والفندق الثاني جولدن توليب في كاندلوم طبعا اسم الفندق مشهور وشركة عالمية بس أخس من اللي قبله موقعه زفت ولا نادي صحي ولا سبا والنت بفلوس وعشاهم مثل وجهم وما في أي نشاط عندهم ، بالرغم أن الفطور حلو والغرف فخمة بس ما أنصح فيه أبدا .
السكن في بانجيم وهي العاصمة ولا تفكر تسكن في غيرها أبدا ، لا احد يقولك كلانغوت أو كاندلوم أو مرغاو أو فيسكا ، خلك في بانجيم بل وأسكن في قلب العاصمة وأنصحك بثلاث فنادق
ماريوت خمس نجوم ويبعد 2 كيلو عن وسط المدينة ، وفندق فيفنتا باي تاج خمس نجوم في وسط بانجيم , وفندق فيدالغو أربع نجوم وسط بانجيم ، هاذي الفنادق بتريحك من الروحه والرده وبخليك تستمتع بالحياة ليل ونهار 24 ساعة . وخلك من اللي يقولك فندق ليلا وطقته يبعد 45 كيلو واغلب الفنادق الفارهة الهاي في آخر الدنيا بس عندهم ميزة الشاطئ الخاص ولا مقطوع الفندق عند العالم
نجي عند الورطة الثانية أنا ميح انجليزي شلون اتفاهم معهم وهم بصراحة يتكلمون الانكليزية بطلاقة ركبت تاكسي وقلت له سنتر بانجيم سلخني بالسعر لأني غشيم وصلنا وسط المدينة وقعدت أحوط وألف ما أدري شسوي ضايع بالطوشة ساعتين وأنا ماشي كذا ، جاني واحد قال تاكسي سير، هو قبله عشره قالوا لي تاكسي سير ماوقفت هذا قال تاكسي واضحه قلت بالعربي أبي أروح قال وين يبغى يروح قلت ها !!!! تتكلم عربي ؟؟ قال أيوه أنا شغل 14 سنة خبر قلت الله جابك وبس وشبكنا وياه وتعاملت معه باليوم وخليته يلف فيني غوا عن بكرة أبيها اليوم تقريبا 85 ريال من 9 الصباح إلى 6 المساء وهذا هو يارواد موقعنا صورة التاكسي ورقمه
السواق اسمه محمد إقبال رقمه 00919637094021 هذا رقمه الدولي .
من الهند مباشرة 09637094021 .
.
رجال أمين وأسعاره زينة ما أقولك أرخص شئ ولكن معقول وهو يبي يستفيد بعد بس أمين وأجودي .
بدينا رحلتنا بجولة حول مدينة غوا مدينة نظيفة نسبيا مقارنة بمستوى الهند لا أحد يقارن بأوربا وهاذي صور عامة لمدينة بانجيم وأهم شوارعها شارع المارينا متعة كورنيش وموج البحر ومقاهي وشارع مشجر وقوارب وكشكات حياة صاخبة :

المعلم السياحي الأول : ووتر فول .

هذا المكان يحتاج يوم لحاله من الساعة تسع الصبح ، هذا المكان هوشلال مرتفع متدفق يبعد عن بانجيم ساعة ونصف بالسيارة التكلفة 2000روبية بقول الأسعار بالهندي وقسم على 15 يطلع عندك بالسعودي ،بعدين تركب دباب 40دقيقة التكلفة 600 روبية ،بعدين تمشي برجولك 15 دقيقة مع مرشد وسط الغابة ب 300 روبية ،الطريق وسط غابة يستحق المغامرة ثم تصل للشلال جميل جدا وفي الطريق راح تمر على أقدم مسجد للمسلمين مسجد الصفا من 500سنة تقريبا وقف عنده وراح تمر على قرى المسلمين وبعض المساجد وقف وخذ منهم مكسرات و فواكه مانجو وموز لذيذ جدا وهاذي بعض الصور للطريق :
مع الجزء الثاني،،،،،،،،