السلام عليكم
في البدايه احب اشكر الاعضاء اللي ساعدوني في سفرتي وتنبيهي لبعض الاشياء
انا لسه راجع من لندن صارلي حوالي 17 يوم في لندن واستفدت بعض الاشياء اللي ممكن
يستفيدون منها الاعضاء في سفرتهم .. وكان ودي اني انزلهم الشرح بالصور
لاكن لعدم وجود وصلة بين الكاميرا والكمبيوتر راح اقولكم الشرح كتابه وبالتفصيل
اتمنى تستفيدون منها وان شاء الله اقدر اجاوب على اللي اقدر عليه ..
اولا في البدايه في مطار هيثرو الكبير ..
1 - في البدايه كانت سفرتي على درجة رجال الاعمال ..
ووصلة الى هيثرو عبر طيران القطريه ... للملاحظه يااخوان
اللي يسافرون فقط على الدرجه الاولى لهم معامله خاصه وتخليص في المطار
هذا بالنسبه للقطريه مااعرف للطيرانات الاخرى ..
لاكن يااخوان بعد ماتوصلون المطار خليكم مع الناس اللي ماشيين ولاتضييعون الطريق
مع ان الطريق مايضييع ابد
بعد ماتوصلون الى ساحه فيها تخليص الجوازات ..
بتحصلون اكثر من طريق ...
طريق خاص مكتوب عليه للمسافرين من دول الاتحاد الاوروبي ..
وطريق للمسافرين من الدول الاخرى ..
راح تصطفون في طابور طويل ومتعرج لاتخافون ترى يتحرك بسرعه لان فيه كاونترات كثيره
انا في بدايه الامر حسيت نفسي متورط بس طلعت طريقتي صحيحه
انتظروا في الطابور وانتبهوا النساء اللي لابسين براقع ونقابات تكشف عند الكاونتر للموظف
والرجال او النساء اللي لابسين نظارات شمسيه اتنزل نظاراتها لاني كنت لابس نظارات شمسيه
وطلبوا مني انزالها ونفسيتهم شينه ..
المهم بعد مااتخلصون راح اتروحون الى الشنط وبتحصلون اكثر من 20 مكان للشطن شوفوا الشاشه
تبعت الشنط والرحلات القادمه وشوفوا اي رقم دولتكم القادمه منها وبتحصلون شنطكم
المهم بعد ماتطلعون انصحكم تتصلون بشخص ينتظركم بأسم عربي وسيارة يساعدكم على الخروج
لان هذا الشي اللي انا سويته
2 - انا سكنت في فندق الكامبرلاند اللي يقع بين تقاطع شارع الاكسفورد وشارع الاجوارد رود
المهم الفندق جميل وسلس وكل شي متوفر امامكم
امام الفندق يقع مطعم ماكدونالد وعلى يمينه كنتاكي وبيتزا هت
وامامه الهايدبارك وبقولكم شلون اتروحون الهايدبارك بطريقه صحيحه ولاتتعرضون للحوادث ..
ماانصحكم في مطعم كنتاكي لان نصحني شخص عربي اهناك ان اكله يحتوي دهن خنزير ..
وحتى ماكدونالد غريب وعجيب اكله مش الى اهناك الا البيتزا جميله جداا بس لازم تنتظرون دوركم
3 - طريقة الذهاب الى الهايدبارك .. بعد مااتطلعون من باب الكمبيرلاند الرئيسي بتحصلون اماكم اشاره اقطعوها متجهين الى الامام وبتحصلون مطعم ماكدونالد على يمينكم خلوه وبتحصلون امامكم ممر ارضي
ادخلو تحت الارض واول مدخل على اليسار ادخلوا معاه واتجهوا بعدين المدخل اللي على اليمين وبعدين الى الامام وبعدين المدخل على اليسار وبتحصلون انفسكم في الهايدبارك وفي الرجعه اسلكوا نفس الطريق .
4 - الاجوارد رود هو الشارع الحوي او الشارع العربي بالاخص كل شي تبونه من اكل بتحصلونه اهناك
اكل عربي اقصد ... بما فيه مطعم رنوش اللبناني وسيدي معروف المغربي ومطاعم مصريه وقهاوي
المهم انصحكم بشاورما في مطعم رنوش جميله في الليل ..
5 - الاكسفورد يحتوي على اسواق مثل نيسكت ومارك سبنسر ومحل موسيقى وافلام والعاب بلاي ستيشن عجيب هو محل اسمه H M V ...
6 - طبعا الكل يسأل عن الباصات الحمراء وكيف يركبونها ... هذا بشرحها لكم بشكل مبسط
في البدايه كيف اتقصون تذكره للباص .. لكي اتروحون المكان اللي تبونه ..
اول ماتطلعون من فندق الكمبيرلاند ادخلوا على اليسار في شارع الاكسفورد .. بتحصلون امامكم
مطعم كنتاكي قبل مطعم كنتاكي بتحصلون على اليسار اندرقراوند او القطار تحت الارض
ادخلوا معاه اول ماتدخلون بتحصلون شبابييك على اليمين روحوا لاول شباك قولوله نبي بطاقة
للريد باص او الباص الاحمر لمدة اسبوع .. وبتكلف اعتقد 13 باوند
بتحصلون البطاقة لونها اصفر ..
بقولكم كيفية استخدامها ...
اول ماتركبون اي باص من المدخل اللي من الامام بتحصلون دائرة صفراء عند السواق فقط مرروا البطاقة
اللي معاكم عليه وبتطلع صوت ويضييئ لون اخضر فقط في لمحة بصر وبتتعودون عليها وروحوا واجلسوا
7 - طريقة الباصات وكيف اتعرون وين رايحة ووين جاية ...
الطريقة بسيطة وسهله كل موقف باص بتحصلون امامه لوحة بيضاء مكتوب عليها ارقام الباصات اللي اتوقف
في هالموقف .. وبتحصلون عند كراسي الموقف لوحة الكترونيه مكتوب فيها كل رقم باص يوقف عند هالمحطه الا وين يودي ..
انتم مثلا تبون اتروحون البيج بين مثلا .. اسئلوا اي شخص واقف عند موقف الباصات
سؤال برئ قولوا لهم كم رقم الباص اللي يودي الى البيج بين وبيقولون لكم ..
طيب اذا كان الباص اللي يودي لهم مش موجود ؟؟؟
بتحصلون خريطة في موقف الباص مكتوب فيها ارقام الباصات كلها ووين محطاتها ..
طيب انتم اذا مااتعرفون وين موقف الباصات ... اسئلوا اي شخص ووين يوقف باص رقم كذا وهوا يقولكم
8 - بالنسبة لي انا رحت للهارودز ... محلات قويه وجميله وغاليه ..
ورحت لسوق يسمونه سوق عبدة الشيطان هو كله كشكات ومحلات عجيبه بتعجب اللي يحبون الهدايا
والاشياء البسيطة ..
رحت لمتحف الشمع اللي يسمونه مدام توساد ..
ورحت البيج بين وعين لندن وقصر البكنجهام ..
9 - بشرحلكم الحين شلون اتروحون للاماكن هذي بطريقة حلوه وبدون تعقيد ..
على فكره ياشباب اي مكان اتروحون له ترفيهي وسياحي مثلا عين لندن او متحف الشمع ..
ترى بتصفون في طابور طويل وعريض .. بس انا بقولكم طريقة سهله اتريحكم من الزحمه والطوابير
االطريقة ...
بعد ماتطلعون من الكمبيرلاند ادخلوا يسار في شارع الاكسفورد ..
بتحصلون مدخل الاندرجراوند او القطار تحت الارض
لاتنزلون معاه بتحصلون واحد على يسار المدخل داخل كشك صغير هو يبيع لكم تذاكر دخول كل الاماكن
السياحيه في لندن .. ترى نفس سعرهم ويكفيكم عن الطوابير الطويله اللي بتأخركم كثيير
0- انا عن نفسي رحت لمدينة العاب برى لندن اسمها Thorp Park ....
عجيبه هالمدينة وفيها العاب مائية وفيها اكثر من قطار الموت والعاب خطره وانا عن نفسي استانست
ونفسي اروحلها اكثر من مره ...
بس على فكره ترى وقتها قصير جداا تفتح الساعه 9 الصبح واتسكر الساعه 6
واحيانا تفتح الساعه 10 واتسكر الساعه 5 ..
يعني اذا بتروحون لها روحوا لها من وقت على شان تستفيدون منها ...
1- لمحبين الالعاب الالكترونيه .. والعاب الجيم والسيارات والبولينغ وكذا ...
انصحكم في محل في منطقة البيكاديلي واسمه تروكادور ... وترى مب بعيد من الفندق ..
2- في الاجوارد رود ... يكثر الشحاذيين بكثرة لدرجة انكم بتعيفون حياتكم منهم ..
واكثرهم من العرب وباكستان والبوسنه والهرسك ... ومايشحذون الا من العرب يعني اذا شافوكم ماشين
وحتى لو معاكم اجانب على طول يروحون لكم ..
انصحكم نصيحة اخوية لاتعطون لهم شي امشوا ولا كأنكم شايفينهم ...
لان انا سمعت ان بعض الشحاذيين الحكومه البريطانية تعطيهم رواتب وسكن ...
يعني لايكسرون خاطركم ولا شي ...
3- انتبهوا في الاكسفورد وخصوصا البنات ... لان بعض المحلات يوجد فيها متسوليين يسوون انفسهم
اصحاب المحل ...
يعني لاتحاسبوون في اي محل الا من عند الكاشيير لاتعطون احد نقدي في يده الا في الكاشير ..
ان شاء الله مانسيت شي ... لاكن اوعدكم اذا تذكرت شي او نصيحة بقولكم ... وفي الجزء الثاني بشرحلكم بعض الامور وحتى بشرحلكم طريقة المغادرة الى المطار وكيفية التصرف في المطار
تحياتي لكم