- وهى كالتالى :
- انشطه في الجو الممطر في انترلاكن والاسواق اللى بعيده عنها ..
- من الاماكن الجميله اللى زرتها بالسيارة:
بداية اود ان تكون مشاركتى الاولى لكم مفيده وتبيض الوجه لآنى صراحه اتصفح المنتدى من فترة طويله بس بدون مشاركات عموما الله يسهل ..
هذى رحلتى الثانية اللى اسافر فيها مع زوجتى بعيد عن روتين السفر السنوى مع العائلة .. كانت المده المخصصه تقريبا 16 يوم منها 14 يوم في سويسرا للطبيعه والهدوء (وشويه تسوق)ويومين في فرانكفورت للسوق فقط .
اتميت حجوزات الطيران والفيزا (شنغن) وحجزت شقه في مدينة انترلاكن في الوسط السويسرى ( انا من مؤيدى الشقق حيث انها نفس سعر الفنادق تقريبا واوسع وخدماتها انفع -خصوصا المطبخ) مدة 14 يوم وحجزت سيارتى OCTIVIA من EuropCar بواسطة شبكة الانترنت كلفتنى تقريبا 800 فرانك سويسرى ( استخدمت كود الخصم 15% للشرق الاوسط وهو 44727554) وطريقة استخدامة موجوده بالمنتدى.
المهم كانت السيارة بدون النيفيقيتر واجرت واحد من مطار فرانكفورت من محل اسمه Rent a Phone موجود بالدور الارضى ومعروف وكلفنى سعر ارخص من EuropCar المهم ما اسبق الاحداث انا الى الان بالكويت ما سافرت ...
جهزت اغراضى وكانت رحلتى على الخطوط الكويتيه الى فرانكفورت وبعدها على اللفتهانزا الى زيوريخ ، وصلت زيورخ الساعه 6 المغرب تقريبا وسكنت في فندق اسمه PARK INN وهذا الفندق يتبع مطاعم ماكدونالدز لدرجه تاج السراير اللى بغرف الفندق على حرف ال M عموما الفندق فوق الممتاز ويستاهل ويقع ضمن مدار المطار ( تقريبا 2 كيلو ميتر من المطار وكلفنى التاكسى 25 فرانك سويسرى !! .. التكاسى جدا غاليه وعلشان جذى افضل تأجير السياره بهذى الدول)
اصبحت ثانى يوم ورجعت مع باص الفندق للمطار واخذت سيارتى واجرت النيفقيتر ( السياره لمدة 12 يوم كلفتنى 800 فرانك والنيفقيتر كلفنى 200 فرانك ونوعه Tam-Tam ) وحركت نحو مدينة انترلاكن الضحى ووصلتها خلال ساعتين تقريبا مع ان المسافه اقل من 150 كيلو بس الطريق جبلى .. المهم حطيت اغراضى بشقتى واخذت جوله بالمنطقة اللى كانت غرقانة باليابانيين والهنود .
الانشطه اللى كانت في انترلاكن تنقسم لقسمين :الانشطه في الجو المشمس في انترلاكن:وهى كالتالى :
1) التسكع في البحيرة على ظهر يخت موجود امام محطه قطار INTERLAKEN-Ost وهى جدا ممتعه اذ تستغرق الجوله ما يقارب ال3 ساعات بتكلفة 50 فرانك للشخص اذا على الدرجه الاولى و36 فرانك اذا على الدرجه الثانية.
2) تل فريك اسمه (Heimwehflum) واخرته تنزل من فوق على الزحلاقيه وهى ممتعه جدا واحتمال كبير (تدمن) عليها التذكرة ب12 فرانك للشخص الواحد واذا اخذتها من اول مره لكذا مره بسعر ارخص ( المرتين ب18 فرانك والثلاث مرات ب 24 فرانك) موجود على مدخل انترلاكن.
3) قطار يصعد لأرتفاع 1322 متر لمنطقه اسمها Harder Kulm ويقع هذا القطار امام محطه القطار interlaken-Ost كذلك .
4) اللى بخاطره ينحذف مع براشوت (مظلات) من اعلى القمم بانترلاكن وطبعا اذا كان اول مره راح يكون معاه مدرب وتكلف تقريبا 200 فرانك ومكاتبهم متروسه في شارع انترلاكن العام امام Grand Hotel والحديقه.
5) التمشى بشارع انترلاكن اللى فيه الحديقه وفندق grand ممتع ودايما مزدحم بالناس حتى الساعه 12 بالليل على توقيتهم مع ان السوق يسكر بال7 الا ان في محلات ما تسكر الا عقب ال10.
وهذى اكثرها اذا مادليتوها يمكنكم تزورون فرع information في محطة قطار Interlaken- west ويساعدونكم بس عموما اللى عنده سيارة النيفيجيتر راح يساعده.
بالنسبه للمطاعم في انترلاكن اكثرها مطاعم بيتزا والله يعينكم على المارغاريتا فيها مطعم ماكدونالز عنده احلى fish mac + vegi mac ( طعم الحلال يفرق ) وفيها سوبر ماركت اسمه Coop هذا له افرع كثيره تخيل ان في انترلاكن بس فيها 5 افرع تقريبا ويفتحون ليما الساعه 11 بالليل .
اذا كنتوا مجموعه انصح ان كل واحد ياخذله خط تلفون سويسرى بدل الجوال واذا بتكلمون الديره عليكم بكروت الاتصال الدولى موجوده في مكتب البريد DE POST احسن نوع كروت للخليج اسمه Flash ب20 فرانك تكلمون فيه ما يقارب 120 دقيقه.
سيارتى 6 سلندر كنت اترس ب 95 فرانك ويعطينى 55 ليتر(ديزل) امشى فيها ما يقارب 900 كيلو ...
انشطه في الجو الممطر في انترلاكن والاسواق اللى بعيده عنها ..
1) mYstry Park وهى عبارة عن 8 سينمات علميه جميله تلقونها بعدة لغات منها الانجليزى وتحتاج تقريبا 4 ساعات عشان تدشون كل افلامها وتكلفة الشخص تقريبا 48 فرانك واذا عقب الساعه 2 الظهر تصير التذكرة ب 28 فرانك غير المواقف ب 5فرانك.
2) مافيها اسواق تسوى صراحه فكنت غالبا وقت المطر اخذ الاهل للأسواق برا انترلاكن ومنها :
1) shoppy land : وهذا السوق يقع بعد مدينة Bern ب 6 كيلو متر بطريق زيورخ في قريه اسمها (Moosseedorf او Schonbühl) ويبعد تقريبا 60 كيلو متر من انترلاكن.
2) Emmen center: وهذا السوق يقع في مدينة Luzern ويبعد تقريبا 70 كيلو متر من انترلاكن وهو اكبر مول في سويسرا .
الاسواق والمحلات عموما تفتح من الاثنين الى الخميس من ال9 الى 6:30 والجمعه تسكر الساعه 9 بالليل والسبت من الساعه 8 الى الساعه 4 العصر.
3) مغارات وكهوف منطقه st. Beatus فيها مرشد سياحى ومضاءة وفب حواليها مطاعم والعاب للاطفال .. المكان حلو
من الاماكن الجميله اللى زرتها بالسيارة:
مدينة قشتاد Gstaad : وتبعد تقريبا 70 كيلو متر روعه بالطبيعه وفيها تل فريكات كتيره جدا وهى منطقة مزاج وهدوء بس طريقها متعب شوى لانه جبلى وفيها كذا تل فريك وفيها حديقه الزهور.
مدينه لوزيرن luzern اللى تبعد 70 كيلو متر من انترلاكن وكذلك مدينة لوزان الشهيرة Luassan تبعد تقريبا 150 كيلو متر من انترلاكن ما فيها جمال اكثر من بحيرتها حيث ان المدينتين لهما عامل جمالى مشترك وهو البحيره والقهاوى اللى حواليها والتمشى حولها.
مدينة جنيف Geneva تبعد 217 كيلو متر من انترلاكن (خط سريع) وفيها بحيرتها الشهيرة ونافورة جنيف بوسط البحيرة والقهاوى اللى حواليها جميله جدا وفيها سوق ممتاز ودايما تلقى فيه تخفيضات وفيه كل المحلات العنلاقه اللى تطرى على البال من ماركات وشركات وفيها مطاعم بيتزا بشارع السوق (اسمه شارع المولاخ) وتلقى مطاعم البيتزا مقابل محل H & M. واقرب موقف سيارات لشارع المولاخ هو mont blanc parking (اسمه الموقف الجبل الابيض على اسم الماركة الشهيرة)
وطبعا جنيف فيها نفس الرحله البحريه حول البحيرة مدتها 3 ساعات وقطار للسياح يفتر حول البحيرة بنص ساعه وسعره رمزى 7 فرانك.
احلى رحلة في سويسرا عموما هى الرحله الى اعلى قمة في اوروبا Jungfrau وهى الرحله تكون بالقطار من محطه interlaken-ost واسمها Top of europ على ارتفاع 3454 متر وتكلفتها اذا شريت التذكرة من المحطه ب190 فرانك للشخص ومدتها ساعتين رايح وساعتين راجع غير الوقت اللى راح تقعده في القمه اللى تحتاج تقريبا ساعتين وتقدر تاخذ التذكرة بسعر ارخص اذا شريتها من المحلات برا المحطه مثل محل (kirghhofer) مقابل الحديقه في شارع انترلاكن الرئيسى. وهذى الرحله تحتاج الى بالطو وملابس ثقيله وكامرة للتصوير
وهذى قمة اوروبا فيها مطاعم وفيها بلكونه عجيبه تكشف المنطقه وفيها قصر جليدى غريب ومدهش .. طبعا فيها سوالف التزلج وكذلك عندهم الكلاب-الله يجلكم- اللى تجر العربانات غير مرصد فضائى وانشطه حلوه ماتنمل.
في رجلات كثيرة تطلع من مجطة قطار انترلاكن الى الجبال وعناك عده قمم روعه اقل ارتفاعا من رحلة Jungfrau او Top of europ ماراح يكون فيها شى اكثر من المناظر الرائعة والجو البديع والهدوء والتأمل وهى على عجاله :
1) Kleine Scheidegg - Eigner وهى على ارتفاع 2061 متر
2)wengen هذى قريبه من انترلاكن وعلى ارتفاع 1274متر وفيها تل فريك (35 فرانك للشخص) يصعدك الى منطقة اسمها mannlichen وهذى على ارتفاع 2230 متر .. جدا جدا جدا جميله
3)Grindelwald- First وهذى على ارتفاع 2186 وفيها بحيرة وسط جبال ثلجيه .. منظر رائع
طبعا قطارات الجبال اللى تطلع من محطة interlaken-ost لها مواعيد دقيقه وفي تقريبا قطار يطلع للجبال كل 30 دقيقه غير قطارات اللى تروح للمدن الثانية ... وانا شفت قطار اسمه Golden-pass هذا يطلع من جنيف الى انترلاكن الى منترو الى زيوريخ ويمر بلوزيرن ولوزان وكذا منطقه .. هذا للى له خاطر يتمشى بالقطار لمدة يوم كامل ويشوف الطبيعه والجبال والخضرة والوديان وصراحه ماجربته.
هذا كله صار ب 14 يوم حيث انى مستقر في شقتى في انترلاكن واطلع بالسيارة وين ما احب او حسب ظروف الجو والطقس.
وبعدها شلت اغراضى الى مطار زيورخ وسلمت السيارة وطرت الى فرانكفورت وصادفنا هناك موجة حر ورطوبه تضيق الصدر اخذت تاكسى من المطار الى فرانكفورت ب27 يورو وسكنت هناك في فندق NH قريب من فندق الماريوت الضخم ومع الاسف ما كنت موفق بهالاختيار لان السوق كان بعيد عنى وكنت احتاج الى تاكسى (يكلفنى 10 يورو على الدرب الواحد) عشان اوصل السوق ( هذى غلطه انا اتحملها لأنى سمعت كلام موظف السفريات !! العاده انى استعمل برنامج اسمه microsoft AutoRoute وهذا يوضح كل شى عن اى موقع في اوروبا مثل الفنادق والاسواق واسماء الشوارع وكل تفاصيل بس هالمره طافت على)
المهم ان سوق فرانكفورت يقع في شارع اسمه zeil street وهذا معروف عند اى واحد هناك.. احلى ما شفته هناك في فرانكفورت المطاعم الايرانيه (مثل مطعم حافظ عند محطة القطار) والمطاعم التركيه لآنى صراحه كنت فاقد اللحم حيل تسوقنا فيها مايقارب ال48 ساعه وعقب ركبنا الطيارة الى الكويت .
انا شريت من محل H&M و C&A في سويسرا واحتفظت بالفواتير ولما وصلت فرانكفورت شريت من نفس المحلين هناك وقدمت الفواتير القديمه معاها واخذت ال TAX free من فرانكفورت -كنت اسمع ان مايصير بس مشت معاى. عموما وقت الصيف شهر 7 يكون موسم تخفيضات عندهم.
هذى على عجاله تفاصيل سقرتى الى سويسرا ، اتمنى اذا احد وده يستوضح عن شغله انه يتفضل ويسأل او اذا في شغله نسيتها احاول اساعده قدر المستطاع.
اخر كلمه احب اقولها ان سويسرا غاليه حيل وراح تصرف فيها مبلغ يوصل اكثر من الدبل اذا سافرت مثل هالسفرة الى النمسا او فرنسا .. انا من ناحيتى ارتحت اكثر في النمسا لان كل الانشطه والاماكن السياحيه (ملمومه) مع بعض واقرب خصوصا في كابرون-زلمسى واللحم المذبوح بطريقه شرعيه متوفر ، وشوارعها اضبط من شوارع جبال الالب السويسريه . بس التغيير ما يمنع
بس ممكن سؤال ولاعليك امر
انت خذيت فيزه الشنقن طيب عادي دخلت فيها سويسرا بدون فيزه سويسريه لاني بالنمسا حاليا وراح ارجع لديرتي من زيورخ وراح اقعد فيها يومين وماعندي الى فيزه الشنقن اقدر ادخل سويسرا بدون مشاكل
لاني سمعت اني سويسرا مش من الاتحاد الاوربي تكفى وانا اخوك ترد علي