1. اليوم الثاني والثالث في فندق امايا هيلز


2. لا تعليق...


3. بتقولون وش دخل الطنطاوي في كاندي؟!!!


4. (حجم الصور 3.5 ميجا بايت)


5. (حجم الصور 1.8 ميجا بايت)

اليوم الثاني والثالث في فندق امايا هيلز

في الصباح جاني السواق الجديد بسياره فان حسب الاتفاق وطلب مني تسليم المبلغ كامل 1,480$... دفعت له 1,500$ وقال لي الباقي (20$) بنسلمه لك اذا بغيت ترجع... وباقول لكم كيف صرفوني وما رجعو لي الباقي!!! :112:
مشينا لكاندي ومرينا حديقة الفيله اللي انبسطت بنيتي عليهم خصوصا وهم يتسبحون...

بنيتي تهاوش الفيل تقول له رح لامك...تخبرون ما عمرنا شفنا فيله... ما عندنا الا القطاوه اللي من جد فقدناها هناك.... خلال 14 يوم عديت تقريبا 12 قطو بس!!! ... اما اسلاك الكهرب والله يكرمكم الكلاب والغربان فمالها نهايه...
وعلى الطريق مرينا حديقة البهارات مثل أي واحد يزور سريلانكا... قابلنا واحد يقول انه دكتور وعرفنا على انواع البهارات مع اني كنت عارف اكثرها من تقارير الأعضاء قبل لا اروح... وفي الاخير حاولو يبيعونا أي شي... بس بالنسبه لي حسيت ان اسعارهم شوي مبالغ فيها شوي... من البدايه عطاني خصم 10% وهذا الخصم الخطير للمعلوميه خاص بي انا بس!!! قمت صرفتهم بان ما معي الا 3,000 روبيه والأغراض اللي نبيها تسوى 6,000 روبيه... اثر الربع ما ينتصرفون... وافقوا على طول وقالوا هات المبلغ!!!
وصلنا لكاندي ورحنا لفندق امايا هيلز... الفندق حلو واطلالته حلوه وهذي بعض الصور من شرفة الغرفه...

لقطات لمنظر الغروب من شرفة فندق امايا هيلز في كاندي

لقطتين بانوراما لمنظر الغروب مكونه من الصورتين السابقتين... لاحظ زحف الغيوم على المنطقه في وسط الصوره مقارنة بالصور الأخرى السابقه لنفس المنطقه...

لرؤية الصورتين بدقه عاليه، فضلاً اضغط على الصور ادناه لتحميل الصور...

(حجم الصور 800 كيلو بايت)

(حجم الصور 650 كيلو بايت)
الصور التاليه من صباح اليوم الثاني في كاندي والثالث في الرحله...

لقطة بانوراما من شرفة الفندق ... مافيه شي جديد...

لا تعليق...

ادري اني مصختها، لكن اذا قعدت هناك وشفت هالمنظر بتقعد تصور الف صوره... خصوصاً لما يبدا السحاب يزحف ويغزو المكان ويغطي المنطقه بأسرها ثم يبدأ المطر في الهطول (ربع ساعه عشان اكتب هالجمله... هذي مشكلة اللي يطالع قناة الجزيره)...

بتقولون وش دخل الطنطاوي في كاندي؟!!!

ماله دخل بس خفت يزعل علي وهو اللي كان يوسع صدري في الصبح... وعلى طاري الصبح، كنت انزل للمطعم واطلب منهم يرسلون لي الفطور للغرفه بحكم اني ما انام بعد صلاة الفجر ولا نقدر ننزل نفطر وبنيتي نايمه... والصراحه ان العاملين في الفندق ودودين ومحترمين جداً وماكانوا يردون أي طلب ويخدمونك وبدون طلب بخشيش...
كاندي حليوه وصغيره وما فيها شي كثير يشوفه الواحد... بالنسبه لنا كنا نرجع للفندق نص العصر تقريباً خشية من نزول المطر ... واللي ما تعرفونه ان الله بلانا بسواق عجاز كسلان ومثال على كسله اننا اتفقنا نطلع ثاني يوم من الفندق على الساعه 9 الصبح... دقيت عليه 9 الا ثلث واثر الرجال نايم وانا اللي صحيته من النوم... قال انا تعبان وما نمت زين، وش رايك نطلع الساعه 10 ونص؟... قلت في نفسي الرجال مسيكين تعبان خله يرتاح وما كنت ادري ان هالشي طبع فيه الا بعد كم يوم... :112:
عاد يوم قعدني قلت لازم اتحفكم بصوره لين يخف راسه ويشرّف...

لرؤية الصوره بدقه عاليه، فضلاً اضغط على الصوره ادناه لتحميل الصوره...

(حجم الصور 3.5 ميجا بايت)

شرفنا الاسطه 10 ونص ونزلنا لكاندي... رحنا لحديقه بوتانيكال قاردن ... الحديقه حلوه وكبيره وشرحه لكن الجو كان حر مره وما يساعد على الجلسه... رحنا لبيتزا هت وتغدينا هناك ثم فرّينا شوي وفي الأخير رجعنا للفندق...
لقطة بانوراما من منطقه تشرف على كاندي

غثيتكم بهالبانوراما... صح؟!!!
لرؤية الصوره بدقه عاليه، فضلاً اضغط على الصوره ادناه لتحميل الصوره...

(حجم الصور 1.8 ميجا بايت)

فيه شغله لاحظتها ويمكن لاحظها بعض الأعضاء اللي هي ان كل السواقين يهمهم ان الشخص يزور اماكن صناعة المجوهرات... في كاندي ونوراليا وبنتوته وكولومبو بشكل مو طبيعي... ما اتهمهم بشي لكن واضح ان لهم نسبه فيما لو شرى احد السواح أي شي...
رجعنا لكم مره ثانيه بالغروب والبانوراما ...

فيه عيب صغير في فندق امايا هيلز وان كنت منيب متأكد من وجوده في فنادق كاندي الا وهو بعده شوي عن الديره... مع ان واحد من الأخوه الأعضاء ذكر ان مطعم بيتزا هت قد وصل له الطلب في الفندق...
ان كتب الله ورحت مره ثانيه اباجرب فندق ريجنسي... كان الفندق محجوز بالكامل وقت ما رحت... ومثال اخر على كسل السواق اني يوم طلبت منه يوديني اشوف فندق ريجنسي قام يصرف ويقول ان المسافه بعيده والطريق فيه اعمال حفر وسفلته ومو من ضمن جدول الرحله ومن هالكلام اللي كنت اصدقه في البدايه بعدين عرفت ان نصه تصريف...

اخي الغالي قرقور...
الحمد الله على السلامه....
تقرير رائع....واسلوب جميل ..اكتشفنا من خلاله كاتبا مبدعا...
وصور اكثر روعه....واخراج متميز....
(بالمناسبه ما هو البرنامج الذي تستخدمه في اخراج الصور )
الموضوع سيكون اكثر تميز...عندما تذكر تفاصيل الاسعار..وابداء رايك حول ايجابيات وسلبيات الاماكن والفنادق....
سجلني اول المتابعين...

تسلم على هالتقرير الحلو ياحلو
بس نفس الوكالة هذي راسلتهم واتفقت معاهم
ورحلتي بتكون شهر 7 الجاي
لو تكرمت قول لي شنو مشكلتهم حتى اغيرهم

صورة اية في الجمال اكمل ونحن بانتظارك

farees4ever
شكرا اخوي فارس على مرورك وتعليقك...
بالنسبه للإيجابيات والسلبيات سيتم ذكرها تباعاً ان شاء الله...
اما بالنسبه للصور، فقد استخدمت الفوتو شوب + فريم ماستر + (ارك سوفت لتركيب صور البانوراما)...

خالد حلو
مافيه حلو غير خالد الحلو...
والله اخوي خالد فيه اكثر من شغله ضايقتني بعد ما وصلت هناك... وراح اعدل مشاركتي الأولى عشان اختصر عليكم المشوار وتصير الاسباب موجوده في بداية التقرير...
لكن افضل شي انك ما تستعجل وتغيرهم حتى تقرا وتشوف اذا اقتنعت بكلامي... ممكن تكون الاسباب اللي ضايقتني مو مهمه عندك... لكن انا انصحك انك تشوف اكثر من شخص وتشوف اسعارهم وخدماتهم...
افضل انك تشوف مثلاً عبدالعزيز ومظفر وسينتكا وزهراني قبل لا تفكر انك تلغي الاتفاق...

1. نصيحه....

من اهم الأسباب اللي ما راح تخليني ارتب حجوزاتي في السفره القادمه ان شاء الله مع هالوكاله:
1. مثل ما ذكرت في الأعلى ان السواق مشى وتركنا في نوقومبو بيتش على اساس انهم بيجيبون لنا سياره فان حسب الاتفاق... لكن كان يفترض انه يقعد معنا حتى تجينا السياره الثانيه!!!
2. ذكرت فيما سبق ان المبلغ المتفق عليه للسكن والمواصلات كان 1,480$ ... دفعت للمحاسب 1,500$ وقال ما معي دولارات عشان ارجع لك الباقي، لكن ابشر بفلوسك ترجعلك اذا وصلتو لكولومبو... خلال فترة الرحله كنت على اتصال بالأخ اللي اتفقت معه واسمه سانجايا وكان يقول لي راح نتقابل اذا وصلت لكولومبو...لما وصلت كولومبو كلمته وقال الآن انا مشغول لكن اكيد راح نتقابل في المطار قبل لا تمشي... رحت للمطار ويوم كلمته تعذر بإن عندهم مشكله مع سواح من روسيا وانه أسف لأنه ما قدر يقابلني ومن هالكلام اللي ماله معنى... لكنه تزهل انه يرسل الفلوس على حسابي بدون تأخير... الصراحه انا طابت نفسي من هالوكاله لا سواقينها ولا مسوؤلينها... قمت ارسلت له رقم الحساب اباشوف وش اخرتها... والى تاريخ كتابة هالتقرير لي الآن 13 يوم ولا شفت ولا ريال!!!!
3. خلال فترة ال 14 يوم، كانوا يبدلون السواق كل فتره... اول يوم سواق... من اليوم الثاني وحتى وصولنا لبنتوته سواق... من بنتوته لكولومبو سواق... اخر يومين سواق!!!
4. السواق اللي طلعنا معه في غالب الرحله تقريباً كان صراحة كسول بمعنى الكلمه... اذا طلبت منه يروح لمكان كان دايم يتعذر بان البنزين غالي وان الطرق مهيب زينه او المسافه للمكان اللي ابيه بعيده ومن هالكلام... ومثال على كسله اننا اتفقنا نطلع ثاني يوم من الفندق على الساعه 9 الصبح... دقيت عليه 9 الا ثلث واثر الرجال نايم وانا اللي صحيته من النوم... قال انا تعبان وما نمت زين، وش رايك نطلع الساعه 10 ونص؟... قلت في نفسي الرجال مسيكين تعبان خله يرتاح وما كنت ادري ان هالشي طبع فيه الا بعد كم يوم...
5. مثال ثاني على كسل السواق في آخر يوم في هوناس فولز كنت مواعده نحرك لنوراليا الساعه 9 وقبلها كنت متفق واياه يجي ياخذني من عند الشلال (اللي يبعد عن الفندق حول كيلو وشوي) عشان نشيل عفشنا ونمشي... دقيت عليه وقلت له تعال خذني من عند الشلال... قال طيب 5 دقايق وانا عندك... قلت اجل امشي شوي لين يوصل... قطعت نص المسافه بدون ما يبين... اتصلت عليه ثانيه... يا جاندي وينك تراي وصلت لمصنع الشاهي... قال خلاص هذاني محرك... قربت من الفندق والاخ ما جا... في الأخير يوم وصلت للفندق اثر الأخ قاعد يحتريني عند الاستقبال!!! لا ومن زين الطبايع يقول لي وينك؟ تأخرت؟!!!
6. اثناء وجودي في فندق هوناس احتجت اشتري مضاد حيوي لبنيتي ... كلمت السواق وقلت له نحتاج نروح لصيدليه... قال مافيه الا ننزل لكاندي... قلت خير يا طير ننزل لكاندي... قال لا... انت المفروض تجلس في الفندق لين تنتهي الثلاث ليالي وانا ما اقدر انزل لكاندي الا باذن من المكتب... قلت الرجال عبد مأمور ومعه حق... العلم عند معازيبه...اتصلت على الشخص اللي رتبت معه حجوزات الفنادق وشرحت له الوضع... قال اذا تبي تنزل لكاندي لازم تدفع لأن جدول الرحله يقول 3 ليالي استراحه في الفندق... قلت له وكم احتاج ادفع؟ قال لي تدفع على الكيلو مبلغ ما اذكره صراحه لكن كان عالي مره!!!! وهذا خامس مطب اكله من هالوكاله...
7. لما وصلنا لبنتوته ونزلنا عفشنا واستلمنا الغرفه، اتصلت على السواق عشان نروح نجيب غدا... قال لي انا خلاص مشيت وبعد 3 ايام اذا بغيتو تروحون لكولومبو بيجيكم سواق ثاني!!!... اتصلت على سانجايا، قلت له ما يصير هالكلام!!! قال ان الباكج ينص على راحه في الفندق لمدة 3 ايام وخلال هال 3 ايام ما يفترض اني اخلي السواق عندك و ان المشكله انك مو فاهم وش في الباكج... عقب هالكلام انا طرطعت وقلت له انا مو راضي ابد عن طريقة تعاملكم وانا اسف على اختياري لكم ومن هالكلام وانتهت المكالمه... بعدين قلت ياولد راجع وش مكتوب في الباكج... قريت والا مكتوب : التوجه الى بنتوته بعد الإفطار وبعد الظهر راحه في الفندق... لقيت الكلام المكتوب عكس اللي هو يقوله... اتصلت عليه ولا رد... ثم خلال 3 ساعات تقريباً اتصلت عليه 4 مرات وعلى فترات متقطعه لكنه مارد... ارسلت له رساله وكتبت له وش مذكور في الباكج... بعد ساعه تقريبا اتصل علي وتعذر بان جواله كان في المكتب وانه توه يرجع للمكتب وان الكلام اللي مذكور في الباكج مكتوب بالخطأ وكلام طويل عريض لا يسمن ولا يغني من جوع... في الأخير انتهت المكالمه بدون فائده كالعاده... ويشهد الله ان هذا اللي صار وان الحق كان معي...
8. كان مذكور في الباكج ان فيه رحله نهريه في بنتوته في نفس اليوم اللي نوصل فيه... قلت للسواق عن الرحله قال انا ما عندي خبر ولا ادري عن شي... كلمت سنجايا وقلت له ترانا ما رحنا للرحله النهريه وترانا نبي نروح بكره... قال خلوها في اخر يوم... قلت له نبي نطلع بكره احسن بحكم ان اخر يوم بنمشي على الظهر... قال ما اقدر اطلع لك سواق عشان ياخذكم لمكان ركوب قوارب الرحلات النهريه!!!!... والله لو اني اطره ما جاوبني كذا... وانتهت المكالمه بهوشه ثانيه وبدون فائده...
9. من دناءة السواق اللي اخذنا من بنتوته الى كولومبو اني نزلت اصرف دولارات فقام ونزل معي وقام يرطن مع واحد من اللي في المحل وتوجهت انا مباشره لشباك التحويل وسالت الموظف عن سعر التحويل... ما رد علي الموظف لكن اللي رد علي السواق وقال ان سعر التحويل 106... فهمت اللعبه وعرفت انهم اتفقو على العموله... ما قلت شي لان الفرق كان روبيتين وما يسوى وما راح يتعدى سعر البيتزا اللي شريتها له من بيتزا هت... لكن النفس الخسيسه تظل خسيسه... لما طلعت للسوق لقيت سعر التحويل 108 روبيه/دولار...

نصيحه....

اذا رغب ان تكون السياره تحت الطلب 24 ساعه فتأكد ان الشي هذا مذكور في الاتفاق... قبل لا اكتب الموضوع هذا راسلت اكثر من عضو وسألتهم عن طريقة اتفاقهم مع المكاتب اللي رتبوا معهم... اكثرهم ذكر لي ان الشي هذا كان مكتوب في العقد ... والشي هذا ما كنت ماخذ حسابه قبل لا اسافر لأن في اكثر التقارير كان الأخوه يذكرون ان السياره تحت الطلب 24 ساعه...
وبالمناسبه، واجهت عائلتين من السعوديه او الكويت في بنتوته وكان سواقينهم من ربع زهراني وكان السواقين موجودين غالب الوقت في لوبي الفندق بانتظار اي اتصال او مشوار من معازيبهم...
اذا نويت السفر لسريلانكا ورغبت بالاتفاق مع اي وكاله انصحك اولاً بمراسلة...
عبدالعزيز
او
زهراني
او
مظفر
او
سينتكا...

fedo80
العفو اخوي فيدو... ما شفت ردك...
على الطبيعه اللي هناك يروح وقتك وانت تصور وتصور وتصور...
مجرد ما تاخذ اللقطه، ترجع وتصورها مره ثانيه...

أهلا بك أخى القدير قرقور
بصراحة اللى خلانى اشاهد موضوعك هو أسمك
أسم غريب + صورة لك غريبة
قولت نشوف مواضيعة شكلها أية أكيد بتكون مميزة ومختلفة مثل أسمة
وفعلاً الموضوع من بدايتة أكثر من رائع
بس قولى أية معنى قرقور
مع تحياتى
جارتك من بعيد
من البوابة المصرية
رسامة مصرية