السؤال خاص لبنات الكويت والاخت روان لكني من ساعه مالقيت رد قلت اتليقف وارد عليج اختي
مجمع العربيد في الفروانيه شعله من النشاط وتشوفين الاخوات من الخليج عندهم بالهبل وعنده دراريع جاهزه لكن الناس اذواق والكل يبي يسوي موديل على كيفه خصوصا ان الاسعار رخيصه وانصحج انج تخيطين عنده خصوصا اذا كان فتره تواجدج بالكويت من ثلاث ايام او اكثر شويه
طبعا اول يوم توصلين الكويت تروحين له وتفصلين وبعدين تفاصلينه بالسعر للاخر يعني مو يقول السعر على كيفه وشغلهم نظيف وحلو وياكثر ما اروحله ويا المدام الله يخليها تنقعني بالساعه والساعتين
والمجمع موجود بالفرواينه خلف الجمعيه لانه مجمعات العربيد كثيره في الفروانيه بس قولي للتكسي اللي خلف الجمعيه وهو يعرف

هلا اختي واسفين على التأخير
اختي الغالية انا مارحت العربيد ولا مرة لكن شفت شغلهم، تطريزهم روعة لكن خياطهم مو ذاك الزود دايما صوب الكتف قصتهم يسونها غلط، انا بالنسبة لي دايما اخيط دراريعي بالجابرية في مجمع مليان خياطين موجود في قطعة 7 شارع 8 بجانب مدرسة عاتكة بنت زيد الخياط اللي اتعامل معاه اسمه أحمد، شغله لا يعلى عليه ويبدع لما اطلب منه شي على ذوقة يسويلي شغل ممتاز
اذا عزمتي تروحينله قوليلي وانا اعطيج معلومات أكثر
ترى شغله ممتاز وأكثر من ممتاز وقوليلة من طرف ام علي

هلا اختي احلا بنوته
سامحيني على التأخير
ماعندي شي اضيفه عن مجمع العربيد الصراحه اخوي ناصر كويتي ماقصر وعساه على القوه يارب
واذا بعد تبين جلابيات عندج مجمع الاوقاف
وعندج بعد المعارض بيت ديفا وكاريزما وبيت الشرق وبيت سدره مقابل سوق شرق بجانب المستشفى الاميري وعندج بعد بيت ديما وبدره ورا الكنيسه وعندج بعد بيت لوذان بجانب المارينا مول
بس مشكلة المعارض مو دايما تحصلين فيهم جلابيات يعني ساعات تحصلين جناط واكسسوارات ويكون محل واحد في جلابيات واغلبية المشاركين يكونون جناط واكسسوارات (يعني انتي وحظج بس تصدقين انا دايما اذا رحت احصل جلابيات)
وعلى فكره العربيد اسعاره ارخص من مجمع الاوقاف ومن المعارض
واي خدمه احنا حاضرين لاتترددين ؟

هذا خبري فيكم يا أهل الكويت ادري انكم ماتقصرون ودايما حاضرين للفزعة..
الف الف الف شكر لكم..وعساكم على القوة...والله يحفظكم
اخوي ناصر....تسلم وماقصرت .. اي جمعية يعني لها اسم او هي جمعية وحدة بس بالفروانية..لان انا عندي (جي بي اس ) وعن طريقة بدل المكان؟؟؟ :tongue:
ام علاوي...شكر خاص لج حبوبة ماشاء الله عليج بس انا ما أريد افصل ابا شيء جاهز..اريحلي..بس لازم اروح له هالخياط واقوله ترا ام علاوي تسويلك دعايا ..يعني لازم ترخص لها
روان......تسلمين يا الغلا وربي يوفقج...

أحلا بنوتة
في كل منطقه في جمعيه تعاوينه واحد في الكويت واذا عندد جهاز جب بي اس روحلي على شارع حبيب مناور وتشوفين الحجمعيه واظحه ومكتوب عليها جمعيه الفروانيه التعاونيه المجمع بالخلف بالضبط
وتشوفين الزحمه هناك لكن انصحج تروحين الصبح اخف وايد
وانصح بشده ان لاتنسون الجهاز ابد

اختي أحلا بنوتة
ياليت تذكرين لنا متى بتجين الكويت
لانه دايما يكون في معارض تفتح في بعض المناطق لمجموعه من المشاغل دراريع وملافع في عندهم الجاهز واسعارهم بين الرخيص والغالي
هذي المعارض يسوونها مجموعه مشاغل يجتمعون في مكان واحد يافي صالة افراح او في خيام افراح
واذا انتي بتجين هالاسبوع في معرض في العارضيه مقابل جمعيه العارضيه التعاونيه حلو ان شاء الله تلحقين عليه