هلا اخوي ليش ما تاجر لك سيارة في قطر و تفك عمرك ,

أنطر بعد ( 10 ) سنين ، راح يفتتحون ( جسر المحبة ) الي يربط قطر مع البحرين ،،
وإذا أنت مغامر ،، ترى في طريق من الخبر إلى سلوى الي هي الحدود مع قطر ،، وتختصر المسافة بنسبة 65% ،، ولا تمر لا على الحسا ولا غيرها ،،
بس الطريق بري ( يعني حصى ورمل ) يعني تبنشر لا قدر الله ، ولا تغرز ،، محد حواليك غير الضبعان والذيابه هاهاها
مرة واحد من الشباب جربه مع مجموعة شباب ، يقول وصلنا البحرين في ساعتين إلا 10 دقايق ،، من الدوحة إلى البحرين !!!
مادري أصدقة او لا ،، بس ليش لا إذا بيختصر الدرب ( قطوع ) ،،
أما عن طريق العبارة ، فأعتقد ان لين الحين مافي خط بحري يربط قطر بالبحرين ، أخبر كان في خط بحري يربط قطر بدبي ، لكن كنسلوه ، وكانت تقدر تشحن سيارتك بقيمة 750 ريال مع السيارة وكل شئ ،، وتحياتي لك

rashed2002
هلا فيك اخوي راشد
لاني رايح بسيارتي وحبيت اغير الخط قلت اسافر طبيعي بسيارتي للبحرين ومنها عن طريق عبارة الى قطر
على فكرة
( كان في عبارة موجوده في الكويت قبل الغزو تنقل اشخاص وسيارات باسعار رمزيه من جزيرة فيلكا الى الكويت والعكس )
وكنت متوقع هالشغله موجوده بين قطر والبحرين لانه المسافه بين الساحل البحريني والقطري صغيره
فقلت منها اتخلص من الدخول الى مدينه الهفوف لانه الخط الحالي يجبرك تدخلها الى مركزها وبين
ضواحيها غير جذي في خط صغير جدا حاره وحده وانت طالع منها وخطر والسبب الاكثر اهميه انك تمشي بعد خط الهفوف اكثر من 200 كم بدون ماتشوف محطة وقود او حتى استراحة بعكس بوحدريه الى كل 30 كم اتشوف استراحات ومحطات

بومحمد
ههه ناوي على ابومحمد اسافر بطريج قطوع بس والله اختصار رهيب ساعتين
اتوقع انه الطريج الحالي بين البحرين وقطر يتجاوز الاربع ساعات مع انه المفروض في الاصل مايتجاوز اقل من ساعة لو كان الشارع ستريت مثل بوحدريه ...
اتصدق إني سافرت من الكويت للبحرين بثلاث ساعات ونص ومن قطر للبحرين باربع ساعات مع انه الكويت بعيده مقارنه في البعد الجغرافي بين قطر والبحرين بس المشكله مثل ماقلت انك مجبور تدخل الهفوف وتعابل فيها ساعه على ماتطلع غير الخط الى ماتقدر تمشي حتى 40 كم فيه الى يطلعك منها

طريج الهفوف بلاحمر
على طاري الشحن 750 ريال ماسوينا شي توقعت نفس الكويت قبل الغزو بالعبارة اعتقد كان مبلغ رمزي جدا مو متذكر والله لاني كنت صغير يومها
بالفعل هناك حاجة ماسة للجسر راح يختصر بشكل كبير يمكن ماتتعدي 15 دقيقة بين قطر والبحرين عن طريق الجسر حتى لو كانت رسومه 10 دنانير او 150 ريال شوي عليه

الاخوان راشد وبومحمد الف شكر لكم على المشاركة والتوضيح :d

حاضرين لك يالغالي ، وكان ودنا نفيدك أكثر ، لكن مابيلد حيليه

بومحمد
تسلم بومحمد ماقصرت والله ... ذخر يالغالي :d

ايه و الله يا اخوان ناطرين الجسر ( هاللي مابيستوي) صار لهم سنين او اكثر يتكلمون عنه و كنه مستبشرين خير بس شكلنا بنردد ياليل مطولك لين يستوي , و بالفعل راح يختصر الجسر كثير و مو بس لقطر بعد حتى للي يبي يروح الامارات من البحرين راح يمر بقطر و بعدين الامارات يعني راح يختصر وقت كبير , و الخط مثل ماقلت مو مثل طريج بو حدرية اللي يوصل للكويت هذا صج مايضيع يعني من اول مرة رحته الحمدلله امسك الخط سيدة و توصله ما اتيودك من عقب ماتطلع من جسر الملك فهد ماتيودك الا الخفجي الحدود السعودية ووراها النويصيب حدود الكويت , و نفس الشي في الردة من تطلع من الكويت و تدخل الخفجي ما ايودك الا الجسر و فيه حدود السعودية و البحرين . و المحطات و الاستراحات كثيرة فيه بس لو يعدلون اشوي قبل الدمام الطريج اللي تكلمت عنه في احد المواضيع بكون خط لا يعلى عليه .
و بالنسبة لخط قطر و الامارات الحالي انا ماسافرت فيه بسيارتي لكن مريت فيه يوم صغير مع الاهل و الحقيقة خط بحاجة لخبرة و دراية و اعتقد انه متعب . و انشالله يعدلونه لانه اذا بنططر الجسر اعتقد بننطر وايد .

الله يديم المحبه قبل جسر المحبه