أخوي في السيتي سنتر لو زرت المدينة المائية + دور السينما + المطاعم وقاعات الألعاب الترفيهية يبي لك حوالي 8 إلى 9 ساعات متواصلة ،، باقي ال3 ساعات تقدر تقضيها في مطعم أو مقهى مفتوح في شارع الشباب بالجفير أو بضاحية العدلية الي راح تحصل لها موضوع بتوقيعي ، أو تقدر تقضي ال3 ساعات المتبقية في منتزه عذاري وهو ملاهي فيه ألعاب ترفيهية.
وحياكم الله بين أهلكم.

أخوي بحريني غير
منتزه عين عذاري وين مكانها بالضبط ؟
وبكم الدخول لها ، وهل ألعابها داخل ضمن تذكرة الدخول وإلا كل لعبة لها تذكرة خاصة ؟

منتزه عذاري يا الغالي موقعها جنوب المنامة ، بالضبط وانت داخل من الجسر استمر إلى الأمام ، بعد حوالي 15 كيلومتر راح تحصلها على جهة اليسار وانت ماشي بالشارع ، ولكن للوصول إليها لابد من الوصول إلى الجسر الواقع في الأمام قليلاً ( وهو رابع جسر راح تصادفه على نفس الشارع منذ دخول البحرين ) ولابد من إنك تعمل دوران عكسي على الجسر وبعدين تستمر شوي إلى الأمام وبعدها تدخل في أول منعطف إلى اليمين وعلى طول بعدها منعطف إلى اليسار راح تحصل محطة بترول ، واصل إلى الأمام شوي وراح تكون في مواقف سيارات منتزه عذاري.
المنتزه ينقسم قسمين ( داخلي وخارجي ) ، الداخلي في ردهة مطاعم وألعاب داخلية وقاعة بولنغ وغيرها والدخول لها بدون تذاكر ولكن الألعاب بتذاكر ، أما القسم الخارجي فالدخول له ب500 فلس = 5 ريالات والألعاب الداخلية كذلك بفلوس ولكن رمزية يعني الألعاب تتراوح ما بين دينار ودينارين ( 10 إلى 20 ريال ) للشخص الواحد.
أوقات سعيدة.

الله يعطيك العافية أخوي بحريني غير وكثر الله من أمثالك
الألعاب للصغار فقط وإلا للكبار نصيب منها
وهل هي مائية أو كهربائية ؟

يا أخوي جراف ..
الغالي .. الألعاب للصغار والكبار جميعاً ، والألعاب كلها كهربائية باستثناء لعبة واحدة وهي القطار المائي ( القطار الي يتدحرج من الأعلى بسرعة وينزل في البحيرة ) وأعتقد والله أعلم أنه يبلل ملابسك من النوع الزين حسب ما شفت
واذا حبيت الألعاب المائية أخوي عندك جنة دلمون المفقودة أو واهو ، و مدينة واهو واقعة في السيتي ممكن تزورها وتختصر وقتك السريع اذا تحب.
أوقات سعيدة.