عايزة اشارككم رحلتى للقرية الفرعونية, اولا القرية تحفة جدا رحتها مرتين فى يومين ورا بعض واعذرونى لو كان تقريرى دة منغير صور ان شاء الله هنزل الصور قريب اوى. جبت بعض الصور من النت علشان اقرب لكم الصورة اكتر.
اول يوم زيارة كان الخميس اللى فات بعرض اسعار مخفض ( التذكرة الاولى) زيارة القرية ومقبرة توت عنخ امون و متحف هدية ( احنا اخترنا متحف الاهرامات) ب 35 جنيه الفرد. المهم دخلنا القرية الساعة 11 الصبح واول حاجة اى زائر بيبدأ بيها هى زيارة القرية. ركبنا مركب ومفيش معانا تور جايد يشرحلنا الشرح كان عن طريق تسجيل فى اعلى المركب بدأ المركب يتحرك ويمر على اكتر من تمثال يمثلوا ملوك والهه مصر القديمة زى ايزيس واوزوريس وتحتمس وحورس وامون وغيرهم كتير وكل ما نمر على تمثال التسجيل يشرح فترة عصره واهم احداثها.
بعد كدة بيمر بيك المركب على مشاهد يؤديها ممثلين احياء بملابس فرعونية المشاهد دى منها مشهد سيدنا موسى ومحاولة اخته انقاذه من فرعون بألقاءه فى اليم, مشهد الزراعة والنحت والنجارة والتحنيط والصيد والشعر والرسم عند المصريين القدماء وكل دة بالممثلين والملابس الفرعونية.
بعد كدة نزلنا من المركب وبدأنا نمر على معبد و منزل الرجل الفقير وقصر الرجل الغنى ومحتوياته و كيف كان يقضى الرجل الفقير يومه وكذلك الامر بالنسبة للغنى وشكل بيته والحديقة الخلفيه ليه وكمان الاختلاف بين زوجة الفقير وزوجة الرجل الغنى. بعد كدة اخدنا 20 دقيقة راحة قعدنا فى الكافتيريا وبعد كدة كملنا اخر جولة فى الرحلة و رحنا المتحف ( الاهرامات) وهناك بتعرف كل حاجة عن بناء الاهرامات مع وجود اشكال مجسمة تشرح مراحل البناء والنظريات المختلفة حوله. انتهت الرحلة الاولى وبصراحة كانت ممتازة جدا جدا, بالنسبة للزيارة التانية كانت يوم السبت وكانت لحضور مهرجان الالوان وحفل محمد قماح ومحمد نور رحنا الساعة 10 ونصف الصبح وبصراحة كانت اول مرة احضر مهرجان الالوان دة وتحفة اوى العيب الوحيد ان المكان مش كان يناسب الحدث ( من وجهة نظرى ) وان
محمد نور لم يحضر لكن غير كدة الحفل كان جميل وكانت فرصة ليا انا واصحابى اننا نستمتع بوقتنا. انتهت رحلتى الساعة 5 ونصف وكانوا بجد اجمل يومين فى حياتى واستغربت من وجود مكان بالجمال دة فى مصر بالسعر دة وبيضم عدد المتاحف الكبير دة والمصريين يقضوا اجازتهم برة والاغرب ان فيه ناس متعرفش ان فيه مكان اسمه القرية الفرعونية اصلا.