1. قام ابوي خاف على الصغار وامي قالت لا ابد مهنا روحه لها والكل ايدها..


2. المهم يوم طلعنا وقف ابوي وامي ساعه عند الي تبيع العسل


3. المهم وين بعد رحنا وين م ايه


4. المهم نزلنا بوسط هالمطر بصراحه انا اموت بهالاجواء مطر ورود وجو حلو ..


5. بس احس كاميرون تستاهل التجربه لو لمره وحده .. ولو انها بعيده

بعد ما ودعنا قنتنق مشينا بالطريق الى كاميرون هاي لاند... هذي اول مره نزورها ...
وكنا حنلغي الروحه لها .. لان واحنا بافاموزا ناس قالو لابوي لا لاتروح ترا طريقها صعب جدا وترا وترا.. ولدرجه المبالغه قالو انه عند اللفه يضطر السواق ينزل يحط حجر ومدري وش عشان تتوازن السياره..

قام ابوي خاف على الصغار وامي قالت لا ابد مهنا روحه لها والكل ايدها..

الا انا .. قلت ياعالم الطريق مافيه شي يخوف باذن الله تعالى .. وهالمنطقه يمدحونها كثير ويكفي فوتناها مره مو نفوتها هالمره بعد..
فكانو بيحولون من كاميرون الى لانكاوي ... انا كنت ارغب بلنكاوي بالمره واحبها جدا جدا جدا لانها رائعه .. لكن جدول الرحله خلانا ننكسلها هالمره لاسف .. وكنت حضعف يوم قالو خلاص نروح لشي عارفينه وهو لنكاوي ولا شي نجهله.. قلت ابد مافي ونروح لكاميرون يعني نروح.. المهم واقنعت الكل انه نروح الى كاميرون
المهم نرجع لسالفتنا .. مشينا بالطريق من جنتنق بهالفان الي وش ملحه ... :rolleyes:
والكل كان ضايق صدره انا تركنا قنتق وضايق صدرهم لانهم خايفين من الطريق مايدرون وش تاليتها.. وانا بصراحه من جوا خفت شوي لكن مابينت وقلت ان شاء الله خير... فالي نام والي كان مسرح وانا من ضمنهم كنت افكر بقنتق وافكر بكاميرون
وارسل رساله للباحثه اقولها وين انا فيه .. صايره مراسله من هناك ارسل لها كل ماسويت شي ... واخرتها يوم رجعنا قالت تصدقين ماوصلتني رسايلك اهيء تهيء
المهم بدينا بطريق كاميرون هاي لاند .. وش هالطريق؟
وناسه طريق عادي جدا ومافيه اي شي يخوف ابد .. طريق رايح جاي ولا احلى منه ولله الحمد
واحنا بالطريق لفوق نتفرج على الخضره والسحب والجو الخيال سبحان الله طريق ولا اروع
ثم وقفنا عند ناس يبيعون الدوريان ..
نزلت مع ابوي واخواني اشوف هالناس طلع لنا عجوز منتهي من كووخ صغير وصار يورينا طريقه الصيد الي بالنفخ يحط عصا بفمه وينفخ ويطلع شي مسموم ..
المهم رحت اطالع جوا الكووخ لقيت اهله متراصين فيه شي يحززن مساكين طليت عليهم بسرعه ثم جا كلب جمبي وانحشت
المهم جينا عند الدوريان .. قال ابوي ها موب غثتنيا بالدوريان يالله خوذي وعطاني قطعه..
جالست اطالع بالقطعه منظرها استغفر الله مدري وشلون قايل مدري شلون مسكتها .. بس مقدر اقول شي لاني انا الي امدح فيها من اول ماركبنا الطياره
المهم ذقت شوي منها وانا ساده خمشي مااتنفس لقيت طعمها مقبول .. مدري لاني توقعت الطعم اشيين بكثير
المهم كملت هالقطعه وانا ابتسم وابوي يقول ها حلوه؟ وانا اقول تهبل
اهم شي ابوي وواحد من اخواني عجبتهم اما امي والباقين قالو لا تركبون السياره بالدوريان :rolleyes:
بس والله طعمها موب لذيك الدرجه شين .. لازم تذوقونه لو مره عن الحسافه وعشان تجربون اشهر فاكهه هناك
المهم ثم ركبنا السياره ومشينا شوي ووقفنا عند شلال بالطريق.. ماشاء الله تبارك الله منظر الشلال رائع.. جلست اتامله ياسبحان الله شلون تنزل هالمياه بهالصفاء والعذوبه ووقفت على حجر كبير ثم لمست المويه بيدي وكانت بارده وتفتح النفس ..
بعد ماخصلنا من الشلال ركبناا وكملنا الطريق ... ثم وصلنا
واو وش هالخضره وش هالمسطحات الخضرا وخاصه مزارع الشاي
وكله كوم والجو كوم بعد ماضاق صدرنا ان طلعنا من قنتق وجوها .. لقينا جو حلو مثلها
المهم وصلنا متاخر للفندق .. كنا حاجزين في ستروبري بارك..
اخذنا فيه اربع غرف ...
الجو على كلام ابوي اسمه هتان ... رذاذ مطر تخيلو هالجو روعه صراحه
الغرف انا كنت اتمنى انها تطل على هالمساحات الخضراء
لكن كانت تطل على حديقه صغيره للفندق
الغرف نظيفه ماعليها لكن كنت متوقعتها احلى ..
المهم اتفقنا مع السائق حسن انه يجينا من بكره عشان يمشينا
نمنا وقمنا الصباح كالعاده ...
فتحت الشباك واطل على الحديقه والجو الراائع واتمتع برذاذ هالمطر الين يقومون الباقين
ثم قامو الكل ونزلنا نفطر بالفندق
يم يمي كان فطورهم كان لذيذ خاصه البان كيك
وبعد ماخلصنا رحنا نتجهز الين جا حسن
الفندق ممكن ينظملك تورينق يعني لفه على المناطق الموجوده بكاميرون
لكن حسن قال انا اعرف المناطق كلها فرحنا معاه
المهم لما جا ..
رحنا لمزارع الشاي وقفنا السائق عند هالمسطحات الخضراء..
وونزلنا وصار يحكي لابوي عن عمر هالمسطحات وانها من مدري كم سنه
وان صاحبتها الحين بنت (ياحظها )
سبحان الله مساحات شاسعه مغطاه بهالشاي
ثم ودانا لمصتع الشاي
دخلنا جوا... اول مره اشوف مصنع للشاي ..
ابد كنكم داخلين في بياله شاي من قوه ريحه الشاي
حتى الآتهم يقول السائق انها من زمان
تفرجنا عليه ثم دخلنا نشرب من شايهم
شرينا من عندهم شاي صيني راعيه المحل تمدحه جبنا منه كم حبه
المهم جلسنا في هالمقهى وكان عندهم كراسي تطل على على جبال خضراء
جلسنا فيها ثم شربنا هالشاي وما كان ناقصنا الا فصفص
المهم قضينا من الشاي رحنا نشوف الزهور ... عاد انا قلت روحو وخلوني هنا ... واو كذا نوع من الورود
صحيح انا كنت متخيلتها شكل ثاني بس برضو ماعليها طلعت حلوه ... فيها انواع كثيره من النباتات اشكال والوان
وعندهم ورود كبيره اعجبتني مره لفينا بالمحل كم لفه وطلعنا ادواره ثم نزلنا..
واتذكر هناك يبيعون مطارات مويه تزانن عليها رسوماات افلام كرتون :rolleyes:
المهم يوم تجمعنا رحنا لحديقه الفراوله .. برضو انا تخيلتها مساحات كبيره ونقطف منها الفراوله بس طلعت لا ندخل جوا مكان ونتفرج عليها يمي يمي اشكالها كانت لذييذه الحبه وش كبرها قطفنا شوي وذقناها طعمها لذيذ... يوم طلعنا كانو يبيعون مربي بالفراوله والعسل طبيعي طبعا ويبيعون الفراوله.. اخذنا منهم كم علبه من المربى ومن الفراوله.. وطعم المربى لذيذ فعلا ..
ثم طلعنا ورحنا لمناحل العسل ... واحنا نمشي نشوف النحل يمشي حوالينا قمت سالتها المسؤوله قلتلها عادي النحل مكشوف كذا؟
قالت ايوه اذا ماطقيته عادي مايحارشك قلت طيب ...
درنا فيه شوي وكان فيه ورد حلو منظره بس مرتفع شوي يبغاله طلعه .. طلعت بشمه وليتني ماطلعت كان في زي الطين او مدري وحل مدري وشو ..
اشوى محد جمبي ولااحد شافني قاعده انزل بشويش وانا ميته خوف لاني ممكن ازلق بهالطين ويازيني طايحه انا وعبايتي

المهم يوم طلعنا وقف ابوي وامي ساعه عند الي تبيع العسل

لانهم يتكلمون معها عن العسل وانواعه وفايدته.. وهي تقول انه عسلنا طبيعي ميه بالميه وينفع لاي شي وكل شي جابت له وصفه بالعسل .. عارفه كلمات سعوديه بحته .. يوم سالها ابوي وش عرفك؟ قالت دايم يجوني سعوديين يشترون من عندي .. المهم ابوي عبا من هالعسل يمكن كرتون ..
ثم طلعنا ورحنا حديقه الفراشات .. ننزلها نزول بالدرج زي المناحل المهم طبعا تنزل تلاقي الفراشات تطير حولك زي حديقه الفراشات بكوالا وبينانغ ..
المهم وقعت فراشه وش كبرها على يدي ولوونها يجنن اسود مع اخضرواصفر المهم وعيت تقوم هالفراشه وانا بتشقق من الفرحه ماخليت احد الا ووريته .. حتى صورتها عشان اوريكم لكن ماطلعت واضحه الصوره
جلست اتفرج على الفراشات وهي مازالت على يدي الين ركبت السياره وهي على يدي .. ثم قبل نمشي قلت لالا حرام برجع اطيرها مع اهلها .. ونزلت بسرعه وحطيتها على ورقه شجر .. ورجعت للسياره..
طبعا عند كل مكان فيه محلات تشتري منها للذكرى واحنا كل مادخلنا محل اخذنا هالميداليات والخرابيط وصرت اعلقها بشنتطي طلعت شنطتي كنها محل ميداليات

المهم وين بعد رحنا وين م ايه

رحنا لمحل ثاني للزهور اسمه روز ستور اظن ... هذا فيه ورود كبار تجنن لما جيت اشمها غطت نص وجهي مره حلوه اغلب وقتي عند هالورود .. والمحل هذا فيه كذا دور .. المهم طلعت استكشف المكان .. وكل مالقيت شي زين ناديت اهلي من فوق ثم يلحقوني
طلعت اخر دور طليت منه واو منظر روعه روعه روعه احس اني طايره بالهوا لان مكاني فوق مره واطل على خضره وسط الغيوم والجو برد خفيف مع رذاذ مطر
وكان بهالمكان درج طويل يودي لقمه اعلى من الي انا فيها بعد ... مشيت نص هالدرج ثم امطرت بقوه .. وكان معي الصغار فقلت يابنت ارجعي بس بلا هبال ..
وفعلا رجعت وكان بهالقمه في بيت صغنون تدخل فيه من جوا وفيه ناس كاتبين ذكرياتهم فيه.. كتبت فيه مون فلور ومنتدى العرب المسافرون مابقا مكان الا وكتبتكم فيه:rolleyes:

المهم نزلنا بوسط هالمطر بصراحه انا اموت بهالاجواء مطر ورود وجو حلو ..

المهم ركبنا السياره وبعد هاللفه كنا ميتين جوع .. رحنا منطقه نسيت اسمها صراحه ولقينا فيها مطهم ماري براون ... نزلت وطلبت الاكل ثم رجعنا لفندقنا واكلنا .. وكان الكل دايخ لانا قايميين بدري ومن الصبح واحنا ندور .. فالي نام والي جلس يطالع التلفزيون والي يناقز من غرفه لغرفه ..
انا طلعت برا الغرفه وجلست على الدرج ومسكت مصحفي وجلست اقرا وسط هالجو الرائع ..
اشين شي انه ماكان فيه ارسال واحنا بالكاميرون مااعرف ليه اتذكر اني انقهرت ابي ارسل للباحثه ومافي ارسال ابداا
المهم كانت مشيتنا من بكره ..
قمنا الصباح وافطرنا كالعاده ثم استنينا حسن وركبنا العفش ومشينا لبينانغ ...
واحنا بطريقنا لبينانغ .. وقفنا عند كهف مدري وش كان اسمه .. بس بجد كهف رائع جدا ليتني اقدر اوريكم صور الفيديو ..لاني صورت بالعادي ماطلعت واضحه
سبحان الله كهف عجيب طبعا اذا دخلت يدخل معاك مرشد لهالكهف ... وكل شوي يأشر على رسمه معينه في الكهف ويقولنا هذي الرسمه زي ايش؟
لقينا رسومات كثيره في الكهف من حيوانات الى شكل انسان هذه احافير طبعا كونتها الامطار على مر السنين ..
وكل شوي نطلع هالدرج الي وش طوله خالتي شافت الدرج قالت روحو الله يسهل عليكم بستناكم بالسياره..
المهم مشينا وهو يحكينا وضحكت عليه لما اشر لنا على شكل كنه رجال ملتحي وجمبه شكل حرمه .. قالنا هذا وشو؟
قلناله حرمه وعجوز؟
قال لا ذيس از اسامه بن لادن اند هز وايف يعني هذا اسامه بن لادن وزوجته
المهم وصلنا فوق في الكهف لاخر الدرج .. وسبحان الله هناك منطقه صغيره مجوفه لما تمر من تحتها يهب عليك هوا ولما تطلع ولاكان فيه شي؟
بس بهالمنطقه الصغيره هوا
قال المرشد هذا هو الكهف كله يجتمع بهالتجويف فلما نمر منه نحس بالهوا
وبرضو فيه شي غريب... قطرات مويه تقطر من فوق رغم انه مافيه مويه؟
والمرشد يقول من زمان وهالمويه تقطر
سبحان الله ..
المهم رجعنا ويقابلونا بهالدرج طلاب مدرسه جايبنهم المدرسه رحله هنا .. مالت علينا وعلى رحلاتنا ان كثرت ودونا لبيتزا هت
المهم نزلنا وكان فيه ناس يمشون بالكهف من تحت عند المويه يعني .. قال المرشد تقدرون تمشون من تحت وتستكشفون ويبغالها سباحه وفيها طلعات ونزلات والرحله تستغرق 3 ساعات .. قال ابوي لا شكرا الله لايهينك
وركبنا السياره وكملنا طريقنا لبينانق
وبينانق في حلقه قادمه ان شاء الله لانها مطوله قعدنا فيها 5 ايام تقريبا
على فكره كاميرون مافيها اشياء ترفيهيه للصغار فهي تنفع للكبار اكثر .. الكبار هم الي يستمتعون بالجو والخضره اكثر.. واتوقع فيه اشياء ماشفناها لان ماطولنا فيها بس يوم ورجعنا ..

بس احس كاميرون تستاهل التجربه لو لمره وحده .. ولو انها بعيده

ونسيت اقولكم شي عن افاموزا بعد .. فكره انبسطو فيها اخواني الصغار .. جبنالهم الوان وفرشنا لهم مفرش ابيض وسط هالخضار وخليناهم يلونون ويكتبون شعورهم .. ماتتخيلون قد ايش انبسطو فيها .. وتبقى ذكرى حلوه لما نرجع :rolleyes:
ميخالف طولت عليكم سلام عليكم