عزيزي تستطيع السفر من بينانج إلى الكاميرون بالسيارة أو الباص والمسافة حوالي خمس ساعات والطريق جميل وبإستطاعتك المرور على منطقة تايبنغ أحد أجمل المناطق الطبيعية في ماليزيا والمشهورة بكثرة أمطارها وحدائقها الرائعة ،وبالتالي انصحك بالتاكسي حتى تتوقف في المكان الذي تريده 0
بالنسبة للأماكن السياحية في الكاميرون يمكنك مراجعة رحلتي إلى ماليزيا على الرابط
https://artravelers.com
وإقرأ الجزء الخاص بالكاميرون هاي لاند وسوي روحك فاهم زي ما تبي ولا هنت والقارئين
تحياتي

اخوي المبدع الوطواط مدري وش اقولك غير الله يخليك للمنتدى اللي مايسوى بدونك
تحياتي ويعطيك الف عافيه

اخوي عسل
أول شيء الله يوفقك
ويجعل حياتك الزوجية كلها عسل في عسل
طبعاً اخونا الوطواط خبير والكلام بعده ماراح يفيد كثير
انا راح اكتب لك تجربتي الخاصة في السفر من بيننغ إلى كاميرون
علشان تستفيد باكبر قدر ممكن من الرحلات
انا سافرت بالباص من بيننغ إلى كاميرون
وكان سعر التذكرة بالباص ما تتجاوز عشرين رنجت
التذكرة تاخذها من مكاتب مخصصة لشركات الباصات من جنب مركز كوتمار
واي واحد راعي تاكسي في بيننغ راح يدلك او اشتريها وانت رايح تتسوق في كومتار
لكن اهم شيء حاول تشتريها اول ما توصل لبيننغ
مدة السفر ست ساعات ونص .. ممكن تختار رحلة في الصبح او رحلة بعد الظهر
قبل الوصول لكاميرون بتقريبا ساعة يبدأ الطريق في التعرج والمنعطفات
حاول تنزل في فندق اكوتوريال فهو فندق جميل ولا هو غالي
اذكر اني نزلت فيه 160 رنجت غرفة مطلة على غابات
من نفس الفندق عندهم جدول سياحي عن طريق باص صغير
الشخص الواحد 25 رنجت ... يعني انت وزوجتك 50 رنجت
هذا الباص الصغير ياخذك في لفة على الاماكن التالية
مصنع ومزارع الشاي
حديقة الزهور
محمية الفراولة
محمية النحل
اخوي في الختام احب اقولك
كاميرون بحد ذاتها مافيها تمشيات مختلفة أو مميزة
لكن المكان والجو الطبيعة تكفيك عن اي تمشيات
ومسالة ان كاميورن تناسبك او ما تناسبك
فهذا راجع لطبيعتك
فلو كنت تحب الهدوء والجو الجميل والضباب اقولك روح لكاميرون
لكن لو كنت تحب الاسواق والالعاب اكيد ماراح تلاقيها في كاميرون
انا برأيي ان الواحد يعيش التجربة علشان يوصل لقناعة شخصية
لانك لو مارحت يمكن يجيك واحد ويمدحها قدامك ويحسفك
ولو محتاج اي معلومات زود عن كاميرون انا متذكر رحلتي لها
ومستعد افيدك باي معلومات عنها بقدر استطاعتي

أخوي صادق احساس يعطيك العافيه,,
ممكن تسوي لنا مقارنه في الذهاب من بينانج الى الكاميرن بين الباص والتاكسي من ناحية مدة الرحله والأمان وغيره أيظا ممكن تعطيني أسماء المطاعم العربيه بالكاميرون إن وجد وهل تتوفر أكلات عربيه في الأكواتوريال أوماهي طبيعة أكلاتهم؟؟؟
ولك جزبل الشكر

أنا بعطيك انطباعي واللي صار معاي
لكن يمكن فيه اعضاء اخرين لهم وجهة نظر ثانية
السفر بالباص يكلفك مابين 20 – 30 رنجت للشخص
لكن السفر بالتاكسي يكفلك فوق 400 رنجت للسيارة
السفر بالباص اكثر امن واطمئنان
لان السواق ما توظف في هذا المكان الا هو ماهر
كذلك هو ملزم بخط سير ووقت معين فما فيه سبب يسرع علشانه
وكذلك الباص فيه عليه صيانة مستمرة لانه تابع لشركة
طبعا الاقدار بيد الله لكن الانسان يعمل بالاسباب
التاكسي حسب كلام الشباب فيه ميزة
انه يوقف بأي منطقة تعجبك ويقولون انك توصل بوقت اسرع
وانا اشوف ان فارق الوصول مابين التاكسي والباص ما يستدعي فارق المبلغ
فمثلاً
انا ممكن ادفع فارق كبير في السعر مابين السفر بالطيارة والسيارة
لان الطيارة بتختصر لك اضعاف الوقت اللي بتسافر فيه بالسيارة
طبعا كاميرون ما فيها مطار
فيه ميزة بالتاكسي برضه انك ما توقف في محطة في منتصف الطريق
يعني التاكسي على طول يوصلك على كاميرون
بالنسبة للاكل في كاميرون
اذكر اني مرة طلبت من مطعم اكواتوريال
وكان اكل عادي مثل بقية الفنادق الاخرى
وفيه على ماتذكر بنت صينية ماخذه كشك داخل الفندق تبيع اشياء بسيطة
واكيد ان اسعارها غالية
لكن عموما ممكن انت تاخذ معاك معلبات من بيننغ
وتمشي حالك فيها خلال اليومين اللي بتقضيهم هناك
واكيد فيه مطاعم في كاميرون لكن اتوقع لازم تروح لها بتاكسي
بقى اقول معلومة بخصوص كاميرون
اول ما توصل لمحطة كاميرون بالباص
اشتري تذكرة العودة من نفس المحطة
سواء كنت رايح لكوالا او لاي مكان ثاني