الرحله كانت فجريه يوم 13 - 7 - 2008 الساعه 3 الفجر تقريبا
المفروض نقلع 3 بس لازم تاخير ساعه عشان نعتز بخدمتكم
وصلنا مطار روما الساعه سبع ونص الصباح تقريبا ..!
اخذنا تاكسي الى الفندق ب75 يورو (جعله ما يربح )
الفندق هو ( The Westin Excelsior )
ب330 يورو في الليله بس معليش شهر عسل
هذا اللينك حقه
http://www.starwoodhotels.com/preferredguest/property/overview/index.html?propertyID=70
طبعا اول ما حجزت ارسلت لهم ايميل قلت لهم ابجي بدري ترا وتراه شهر عسل وكانت روما من تاريخ 13 -07-2008 الى 17-07-2008
ما قصروا والله اول ما وصلت لهم جلسنا ساعه في اللوبي قالوا شوي بس ننظف الغرفه
وبعدين دخلنا الغرفه وكان فيها هالشي بمناسبه الهوني مون

المهم جلسنا شوي يوم طلعنا رايحين ل Spanish Steps
او بالايطالي
Piazza di Spagna

وطبعا الشارع اللي بينهم فيه كل الماركات Via Condotti

شوفوا بعد هالحركه في محل LV
http://uk.youtube.com/watch?v=DkzAx60Rrq4
اول يوم طبعا بس دوران في هالمنطقه والساعه 10 رجعنا للفندق عشان ننام تعبانين كنا مع السفر

صحينا وطلعنا على 12 الى Spanish Steps
ومنها رحنا ل Trevi Fountain على رجولنا
وهي النافوره اللي يقولون عنها اللي يذب فيها فلوس يرجع لروما ثانيه (مع اني ما اذكر اني ما ذبيت المره الاولى فيها فلوس والحمد لله رجعت لها )
http://uk.youtube.com/watch?v=YWvchK0gwS4
تشوف الناس عندها وما غير يذبون هالفلوس
وفي الليل رحنا ل Piazza Navona
او ساحه الرسامين

تابعونا وش صار من بكره في سبانش ستيب مع البنقالي

اليوم الثالث صحينا بدري بس طلعنا كالعاده 11
اول شي رحنا اخذنا هالكوفي وستروبيري تورت قبال الفندق
بس من جد احلى ستروبيري يمكن يذوقه الواحد في حياته

وبعدها رحنا ل Colosseum
او المسرح الروماني

ومنها للاثار اللي جنبها ومنها Forum Romanum

وبعدين رحنا نجلس على Spanish Steps
واحنا جالسين على الدرج يجيننا ذاك البنقالي وهو يبيع بيره!!
البنقالي : سلام عليكم ..!
أنا : وعليكم السلام هلا ..!
البنقالي : معليش انا يبيع بيره والله معليش
أنا : وجالس اقول وش دخلني انا مانيب ربك ابحاسبك
والبنقالي ما غير يعيد معليش والله انا اسف
حرمتي: طيب ليه ما تبيع مويه مدامك تقول معليش ؟؟
البنقالي : انا لو بيع مويه محد يشتري هذا نفر كلوه كافر بس يشرب بيره
أنا :
يوم جاء بيروح البنقالي قال لي : انت سعودي ؟؟
قلت : لا ( مدري ليه جا في بالي انه بيغني انت سعودي طيبك جاوز كل حدودي )
يوم البنقالي عصب وجالس يقول : ليه طيب انا يقول لك اسف ومعليش ليه ما فيه قول من اول انتا ما فيه سعودي وبدا يبعد
أنا :
وبعد ما خلصنا من هالموقف بدت تظلم الدنيا رحنا تعشينا وبعدين رحنا ل Pantheon

جلسنا شوي وبعدين اخذنا ايس كريم من اشهر محل هناك وبعدين رجعنا ننام

كالعاده طلعنا الساعه 11 بس كنت مقرر نركب الباص
بس قبلها تمشينا في الفيا فينتو ورحنا ل Villa Borghese
هي عباره عن حديقه كبيره وفيها متحف وفيها جلسات

واحلى شي اعجب زوجتي فيها هالسيكل استجرنا واحد زيه اثنين جنب بعض وفيه مكينه يعني ما يتعب ب 10 يورو الساعه

وبعد ما خلصنا دوران فيها رحنا ركبنا الباص السياحي كان قريب مره من فندقنا
ونزلنا في Vatican
طبعا عشان يدخله الواحد لازم يصير متستر موضوع شورت ما فيه موضوع شي مزلع هم بعد ما فيه

ومنه طلعنا وكمل الباص فينا دوران ..!
تقريبا اغلب الاشياء مرينا عليها من قبل واحنا نمشي
بعدين تعشينا ورجعنا نرتب شناطنا عشان نروح ل فينسيا
صحينا من بكره ورحنا ل محطه القطار اللي اسمها Termini

احلى وأهم ما في روما :
1- Via Veneto وهو زي الشانز كلها قهاوي وجلسات وفيه Hard Rock
2- ملاهي luna park
3- Spanish Steps/Piazza di Spagna وهو الدرج الاسباني وانت جالس فيه تشوف Via Condotti اللي عباره عن محلات ماركات ومنه تمشي وتوصل ل Via Frattina و Via Borgognona نفس وضع Via Condotti
4-Villa Borghese وهي حديقه كبيره ومتحف وجلسات بعد فيها
5- Colosseum وهو المسرح الروماني وجنبه اثار كثيره بعد
6- Lido Di Ostia وهو شاطىء وجلسات فيه بس تراه بعيد شي
7- Trevi Fountain/Fontana di Trevi هي اشهر نافوره فيها وهي اللي يقولون اللي يذب فيها فلوس يرجع لروما
8- Castel Romano Outlet هذا هو الاوت ليت اللي في روما
9-Piazza Navona وهي ساحه الرسامين
10-Vatican الله يهديهم بس هذا اللي اقوله
11- Pantheon وهو ساحه وجنبه اشهر محل ايس كريم جيلاتيني
12- Castel Saint Angelo عباره عن البيت الدائري ومتحف فيه
احلى ما في روما ان المحلات السياحيه جنب بعض وكل شي تقريبا توصله برجليك والعربان ما تشوفهم واجد
اكثر شي في روما ساحاتها و في كل ساحه فيها نافوره النافوره مويتها بارده يعني ما تحتاج تشتري مويه الا مره وحده بس بعدين اجلس عب علبتك والديره الواحد يشتاق ان زارها ويحبها بعد
ايطاليا بشكل عام بتاكل فيها البيتزا حلوه مره ويمكن احلى بيتزا بتقوها بس المكرونه لك عليها لانها بارده لازم تقول لهم خلوها حاره
تاكسيهم عرابجه بشكل فوق الخيالي ولا تتوقع ناس تتكلم معك بالانقليزي كثيرين ابد ابد ابد
اخر شي يمكن يقدر يقوله الواحد عن روما صدق
كل الطرق تؤدي الى روما

أرباب معليش انته كمل هاذا تقرير .. بسرعه معليش ! ما في تأخير ^_____^
ان شاءاالله حياتكم كلها عسل في عسل ..
بسألك بالنسبه للجو في شهر 7 ما كان حار؟؟؟!

يعطيك العافية اخوي سنيور ...
جلسنا شوي وبعدين اخذنا ايس كريم من اشهر محل هناك وبعدين رجعنا ننام
ياليت تذكر الاسم أو على الأقل المكان

*المها*
أرباب معليش انته كمل هاذا تقرير .. بسرعه معليش ! ما في تأخير ^_____^
إن شاء الله
ان شاءاالله حياتكم كلها عسل في عسل ..
شكرا
بسألك بالنسبه للجو في شهر 7 ما كان حار؟؟؟!
روما يومين كان الجو فيها حلو ومطر ويوم نصه حر ونصه غابت الشمس ويوم كان شمس والله
الهلالي
يعطيك العافية اخوي سنيور ...
الله يعافيك حبيبي
ياليت تذكر الاسم أو على الأقل المكان
Giolitti

اولا هلا بالكل
ثانيا :انا بسافر لايطاليالاول مره بحياتي وبنفسي بعد راح ازور احد الاصدقاء هناك لكن المشكله بانه كاتب برسائله اسم المنطقه ginova ,,ولما حجزت التكت طلع اسمها ginoa بدون v
وعلى حسب وصفه لي بالمكان هو نفس الوصف لكن انا شاك باسم المنطقه(رحت ملح)ان وصلت لمنطقة غيرهالاني راح أخطط ايطاليا كلها لاجل اوصل جنوا
افتوني ايها الملاء ويا خبراء السفرات عن ايطاليا لاني بوصل بالاول روما ترانزيت لمدة خمس ساعات بعدها استقل طائره لجنوا،وش راح اسو بالخمس ساعات بالمطار وهل توجداسواق يمكن ان اذهب اليها او اخيس بالمطار احسن لحين موعد الطائره (ياويل ويلاه رخصت ياصمت الالم)وعلى فكره راح اسافر في نهاية نوفمبر ؟؟؟؟؟ انتظر ردكم ياحباب

طبعا طلعنا من روما الى فينسيا بالقطار
فينسيا فيه محطتين قطار اول وحده لا تفكر تنزل فيها ...
اسم محطه القطار اللي في فينسيا الاصليه هي Santa Lucia
هاذي اول الصور اذا قربت مره من فينسيا الحالمه

طبعا اول ما طلعنا من المحطه وزوجتي شافت المدينه
قالت ياي ما تخيلتها بهالزين كله
اخذنا تاكسي ذي ذا تقريبا الى الفندق

سكنا في فندق The Westin Europa & Regina
من 17 -07 -2008 الى 20-07-2008
سعره 300 يورو في الليله والفيديو هنا في صوره
http://uk.youtube.com/watch?v=F12UF78GP2M
الفندق حلو مره ومكانه بعد بطل
يمكن الواحد بالذات في هالديره ما يقدر يقول شي كثيير لان الصور فيها تدل على اشياء اكثر
كانت الفتره ثلاث ليالي
واحنا رايحين للفندق مع التاكسي شفنا هالشي جمجمه من قواطي : )

هاذي صوره ل Grand Canal اللي هو الدائري حقهم او طريق الملك فهد : )

طبعا اول يوم تمشينا حول الفندق ورحنا لساحه San Marco
وهي اشهر ساحه في فينسيا وتشوف العالم يأكلون الحمام

وجلسنا في الساحه الى الليل وبعدين رجعنا للفندق عشان ننام