- عائلتك يعني لا ضرر ولا ضرار 00
- 1- اعكس انطباع حلو عن ديرتك 00
بسم الله الرحمن الرحيم
احبتي واخوتي
اسعد الله اوقاتكم بكل خير
هالموضوع قبل لا اكتبه كان يقرقع بقلبي كثير
وحبيت ان هالرسالة توصل من القلب للقلب والمقصود بهم في هذه الرسالة فئتين غالية على قلوبنا
هم العوائل والشباب
نجي للفئة الاولى الا وهم عوائلنا واحبابنا واقول لهم
1- قبل لا تسافر ادرس امورك كلها بشكل جدي واحسب حساب الصغيرة والكبيرة00
2- لاتقول الديرة رخيصة وتقعد تصرف حلالك في غير حقه 00
3- عند اختيارك للسكن وخصوصا في الجبل او ماجاورها لا تكن ضعيف القلب ومن يعطونك السعر تسلمهم رقبتك
وعذرك ان معك عائلة ترى الديرة واسعة والاماكن ماوقفت على مكان معين ابحث حتى تجد مايسناسبك ويناسب
عائلتك يعني لا ضرر ولا ضرار 00
4- اسعار الفنادق قد تكون ثابته او متغيرة بنسبة قليلة في مواقع الحجز او عن طريق مكتب كاها شف الانسبن لك ولو لقيت البديل وبنفس المستوى وبسعر ارخص لا تردد في الحجز 00
5- لاتسلم رقبتك للسائقين هناك وتخليهم يفرضون عليك اسعار مبالغ فيها او يحددون لكم وين تروحون ووين تجون ترى المنتدى بمشرفيه واعضائه ماقصروا حطوا لكم ارقام السائقين الثقة من خلال تجارب وثقة الاعضاء وكذلك الاسعار اليومية شاملة الضرائب فلا يجيك سواق يقول لك اليوم 600 او 700 وتقول من عيوني ترى معي عائلة ترى تقدر توفر سائق وبالسيارة اللي تناسبك وبنفس الاسعار المتعارف عليها فلا تطمعون الخلق فينا 00
6- لاتخجل من اي شئ مايعجبك حاول انك توضحه وتوضح وجهة نظرك واعتراضك بشكل محبب وان ماجاز لك شئ ما انتهى العالم وترى بين البائع والمشترى يفتح الله يعني الله الله بالمكاسرة الين تاخذه بالسعر المقبول 00
7- عند التوجه للجبل من العاصمة حاول ان يوم المغادرة مايصادف الويكند عندهم علشان ماتتعب روحك وتتعب اسرتك اللي مالهم ذنب وانتظار لساعات طويلة تجعل من رحلتك رحلة نكد 00
نجي للفئة الثانية الشباب واللي نسبتهم اعلى بكثير من نسبة العوائل وتواجدهم هناك
1- اعكس انطباع حلو عن ديرتك 00
2- الشباب ينقسمون قسمين شباب والله انهم يردون الروح وينحطون على الراس ولا عندهم خمبقة
والنوع الثاني الله يصلحهم معطين الدنيا اشكل هالقسم نقول يا ابن الحلال ياولد الاجاويد اذا الله ابتلاك بشئ وعندك امور لا تجاهر فيها حاول تستر نفسك وحاول يوم تطلع وتروح وتجي تخاف الله ولا تجاهر بالمعصية وياليت كل واحد فيكم يحط نفسه مكان اي انسان او عائلة رايحة تسافر وتستمتع هل بترضى انت واهلك تشوف هالامور تصير امامك ؟؟؟
اتحدى احد يقول ايه راضي الا أنسان مريض ولا عنده احترام لمشاعر الآخرين 00
3-كونك مسافر وماخذ معك كم الف او جمعية او مكافاءة والمبلغ بينقسم عليك هذا مو معناه انك تزاود في الاسعار
ولا منطق انك تقول انا بعيش ملك 00 محد قال لك لاتحرم روحك سافر واسكن وانبسط لكن بعقل هالامور ممكن تضر خوان كثير لك يبون يسافرون هالامور ممكن تزيد جشع واستغلال الربع هناك 00
4- عليكم بالمكاسرة في كل شئ ترى حلالك وفلوسك ماجات من الباب للطاقة جاتك بتعبك وعرقك فحرام انها تروح في اشياء وامور مالها قيمة والسبب ابي اتونس 00
5- البعض وليس الكل الله يصلحه يوم يسافر وهو معلق بين السماء والارض انواع الفله والوناسة والكحول طيب ليه
ماسئلت روحك بينك وبين نفسك لو صار شئ وشلون بلقى ربي ؟؟؟ ياليت هالشئ مانشوفه ابد ربعنا في المطارات والبارات انواع الفله وان دخل الطياره شايل البطول معه وش تبينا نعرف بالله ( يعنني راعي شراب مثلا ) ؟
6- راعوا مشاعر الاسر والعوائل اللي بالشقق والفنادق يعني لازم تروح تفطر وبنت الليل بحضنك ولازم تتكي في اللوبي وهي بحضنك ولازم تروح سوق وهي بحضنك يعني بالله هذه صورة طيبة عن ربعنا ؟؟؟ اذا ماستحيت من رب العباد ولا من روحك وهذا اللي صاير 00 لكن لو شفت واحد من جماعتك او زميل عمل محترم راح تخجل منه ومن نفسك وتقول وش اللي انا مسويه 00 نقول لك استر نفسك والي يرحم من جابك 00
7-السفر متعة وراحة بال واكتساب خبرة ومعاصر ثقافة شعب حاول تستغل هالشئ وتستفيد منه ترى السفر مو كاس ومرقص وبنت ليل بس 00 !!!!!!!!!
حبيت اضع هالنقاط والدعوة عامة لجميع الاخوة والاخوات لكي يدلو كل شخص بدلوه ويشهد الله ماكتبت هالموضوع علشان نكون مثاليين او من هالقبيل لكن فينا عيوب وتقصير نسئل الله ان يهدينا ولكن هالكلام من القلب للقلب والمستفيد بالنهاية كلنا جميع مب انا وانت وهو وهم 00
دمتم بود
ابو راكان
