1. ماي من العطش

السلام وعليكم يا أحلى أعضاء
هذي اول مشاركه لي واتمنى انها تعجبكم
بقولكم عن رحلتي الى جزيرة فيلكا
نظمت جمعيه جامعه الكويت رحله لجزيره فيلكا
قررت اروح معاهم لان مارحتلها ولا مره بحياتي ودكتورنا طالب منا صور عن الاثار التاريخيه في جزيره فيلكا
انا قلت مره وحده اروح اشوفها واخذ له صور طبيعيه 100%
سجلت بالرحله وكانت التذكره ب5 دنانير للشخص الواحد (خصم علشان جامعة الكويت )
كانت الرحله مقرره يوم الخميس (مااذكر التاريخ) الساعه 8 الصبح يمشي اليخت
يوم الرحله :
قمت من الساعه 6 من الوناسه وما تريقت زهبت اغراضي خذيت معاي (كاميرا+بندول(سبحان الله لدوران البحر+جنطه صغيره على الظهر علشان ماتتضايقون بحملها)
ولا تنسون خلو فلوسكم معاكم لان هناك ماكو بنوك
ووصلت لنادي اليخوت بالسالميه عند مركز سلطان الساعه 7 ونص لقيت القروب كله جاهزين ومستعدين للرحله
ركبت اليخت ولمن صارت الساعه 8 انطلق اليخت بإتجاه جزيرة فيلكا
تقريبا الرحله استغرقت ساعه ونص وطول الرحله انا قاعده بالمقدمه مستانسه علبالي الكابتن
وصلنا ميناء فيلكا تقريبا الساعه 9 ونص واول مادخلت الجزيره لقيت مخفر الشرطه
وكان في تقاطع صوب اليمين يودينا للاثار التاريخيه اما اليسار ياخذنا للقهاوي والاماكن الترفيهيه بفيلكا
واللي جدام الميناء على طول هذا على مااعتقد ان قصر احد الشيوخ
وبعدين مشينا يسار صوب القهاوي لقينا مسجد جديد لونه وردي توا بانينه
وكملنا مشينا للقهاوي بس تعبنا من المشي على ماوصلنا للقهوه
يعني لو معاكم مسنين راح يتعبون من المشي لازم تأجرون ميني كار(مثل قواري خيران بس هذي تشتغل
بماكينه وتأجيرها الساعه ب10 دنانير بس انتو كلموهم ان انتو بس تبونها مدة ربع او نص ساعه ويحسبونها اقل لكم)
واحنا قاعدين نمشي نشوف اثار الغزو على البيوت والمدارس والشاليهات ووقفنا عند بقالة فيلكا نشتري

ماي من العطش

وبعدين كملنا لمن وصلنا للقهاوي وهي عباره عن قهوه شعبيه ومطعم للاكلات الكويتيه وعلى فكره فيها بيوت للتأجير وهي عباره عن بيوت شعبيه فيها حوش صغير وغرفة نوم وحمام(مكتوب عليهم بيت رقيه وبيت...الخ بدال غرفه رقم 1 او غرفه رقم 2)
وهذي البيوت تتأجر بس بالعطل يعني مايصير بأيام الاسبوع
وعند القهاوي في تأجير للقواري الساعه بدينار اما تأجير البقيات فالساعه بعشرة دنانير(انصحكم بالقاري اخذو وتجولو بكل مكان بالجزيره وعلى فكره يعتبر رياضه حلوه لتخفيف الوزن)
جدام القهاوي توجد بحيره اصطناعيه فيها بط وبجانبها تأجير الخيول والبوني للأطفال
طبعا انا اجرت لي قاري مده 3 ساعات وتجولت في بكل انحاء فيلكا رحت للمسجد عند مخفر الشرطه صليت وبعدها رجعت القاري علشان وقت الغدا
طبعا بما ان احنا مع الجامعه فالجمعيه ماقصرت قدمو لنا كل شي من مرطبات وفطاير ولما حان وقت الغدا
خذونا عند الشاطئ اللي ورا القهاوي وكان الجو حلو والمنظر احلى وفي ناس قاعدين يتسبحون خصوصا ان بحر فيلكا روعه ونظيف واحنا قاعدين على الشاطئ قاعدين نشوف الدلافين بعدين قعدنا نشوي غدانا على البحر
وبعد الغدا قررنا نروح للاثار التاريخيه فخذينا ميني كار ولمن وصلنا عند الاثار تبين ان المتحف تحت الصيانه بس لمن شافو ان احنا من جامعه الكويت قررو يدخلونا نشوف بيت الشيخ احمد الجابر
وبعدها رحنا للشارع الرئيسي وكانت الساعه تقريبا على 3 العصر ولاحظنا كثرة السيارات وبعد ما سألنا واستفسرنا عرفنا ان اي واحد يقدر ياخذ سيارته معاه عن طريق نادي رأس الارض تروح السفينه لفيلكا من الساعه 8 الصبح لي الساعه 4 العصر تمشي من فيلكا
وقبل لا نرجع قررت أأجر بقي ورحت مره ثانيه للقهوه اجرت بقي لمدة ساعه وتمشيت بالشارع الرئيسي اللي سميته شارع الخليج لكثرة السيارات اللي تتمشى فيه ولمن صارت الساعه 4 رجعت البقي ورحت للمينا علشان نرجع
واحنا راجعين كان الجو حلو ولاحظت كثرة النورس ووصلنا بسلام الساعه 5 ونص لميناء نادي اليخوت
وعلى فكره كان كل تصويري فيديو بس انشالله اذا رحت لفيلكا مره ثانيه باخذ لكم صور مفصله عن كل شي بالجزيره وسامحوني على القصور
اي صح انصحكم تروحون فيلكا قبل لا تتطور ويصير فيها مطار وفنادق وشاليهات
علشان تشوفونها قبل التعديل وبعد التعديل
كانت رحله حلوه يكفي تغيير الجو فيها وانشالله اسمتعتو معاي بالرحله
واذا عندكم اي استفسار عن فيلكا امروني
وسامحوني على الاطاله