ركبنا الطياره الى جاكارتا وكانت مريحه جدا درجة رجال الاعمال وكان مقدي اول مقعد فما قدرت اصور الكبينه من ورا
والمعذره بخصوص الصور هذا انا شابك الجوال في اللبتوب وقاعد ينزل الصور, الى الان ما كملت
ومثل ما ناتوا شايفين حتى الكتابه اي كلام وغير مرتبه لان اللى يكتب وهو مسافر ما يبغى يروح عليه الوقت وهو مقابل اللابتوب بعكس اللى يكتب بعد الرحله يكتب من قلب فتحملونا
المهم وصلنا جاكارتا وانا قد زرتها 3 مرات لقيت واحد بيوصلني الى فندق مانهاتن ب 200 الف بعد المكاسر
سعره غالي بس شكله ابن حلال ويتكلم انقليزي زين فقلت له اعرف ان سعرك غالي بس يالله تستاهل
خلال الطريق اللي استمر ساعه سولفنا كثير واتفقنا انه يجيني بكره 6 الصباح يوصلني للمطار عشان رحله بالي ب 150 الف
فندق مانهاتن سكنته قبل نظيف و خمسه نجوم على كلامهم والشباب اشبعوه تقارير فما فيه داعي انزل له صور
الموقف الثاني:
لما جيت اسوي شيك ان وانا حاجز غرفه عاديه قالوا مدخن قلت ( يا هالتدخين اللي ذبحنا من اول التقرير) قلت ايه قالو بانسويلك اب قريد على سويت لان مافيه غرف عاديه للمدخنين الان
وش هالفله من بدايه الرحله وانا اب قريد تعبت
فالزبده حاول تكون مدخن قد ماتقدر في هالبلد
بدلت وصليت ونزلت على امباسادور مول جنب الفندق 5 دقايق مشي عشان احول عمله
طبعا كل اللى معي دولار وكان سعر الصرف 9680 حولت كل اللى معي ورجعت
نسقت على مساج في الفندق ونزلت كان المساج ساعتين ب 300 الف تقريبا مية ريال
من دخلت واللي بتسوي المساج تناظر من اولي لاخري كانها من الشغالات الاندونيسيات الي يجون السعوديه عيونهم قويه
شوي وتقول هنا المساج ولا في غرفتك؟
وانا اتعوذ من ابليس واقول الله يعدي هالمساج على خير الله يكفينا شرها, لا هنا
كنت شبه نايم في المساج بعد التعب والسفر بصراحه جا في وقته
ولما جيت طالع تقابلني نفسها وتقول اجيك الغرفه نسولف بعدين تعطيني شوية فلوس
يلعن ام الخمسه نجوم اللى تعرفها يا مانهاتن حركات وصخه في هالفندق, قلت شكرا عندي رحله الصباح ومسافر
الصباح صحوني الفندق افطرت سريع سريع واخذت الكوفي سفري في التكسي
اول شي قالي السواق اكيد معك صديقه هنا او في بالي (سمعتنا ماش)
قلت لا, قال ليش ما كلمتني وانا اظبطك
افا وانا معطيك فلوس اكثر من حقك عشان هالدقن وفي الاخير طلعت ...
قلت له انا متزوج وفي الاول والاخير احنا مسلمين
اعتذر وقال كذا دايم يسوون السعوديين يروحون الجبل وياخذون بنات ومن هالعلوم الشينه
قلت موبكلهم فيه ناس وناس واللي فيهم خير اكثر ان شاء الله
الفائده من الموقف: اذا سويت مساج تعوذ من ابليس
وان شاء الله يجيك اب قريد في العوده

الحين انا في بالي اللي هي الهدف من الرحله
استرخاء واستجمام زرتها قبل كم مره
وسكنت قبل مثل كل السعوديين في كوتا سانور سيميبياك ونوسا دوا
بس ماقد سكنت في اوبود
قلت هالمره لازم اسكن في اوبود وتنطق مثل ماكتبتها ليس ابود وانما اوبود
منطقه رائعه محاطه بحقول الارز من كل مكان الوجهه منتجع جديد وصغير تقريبا 80 الى مائة غرفه وافتتح من 3 اشهر فقط يعني نظيف جدا اسمه الايا ريزورت ALAYA RESORT
موقع مره ممتاز بين الاسواق وقريب من غابه القرود Monkey Forest غرفه جدا واسعه 45 م للغرفه العاديه مع بلكونه
فطوره موب مره لانه موب بوفيه وانما بالطلب الحمد لله
بصراحه ما قدرت انزل الصور على اللابتوب متى ماقدرت بانزلها
رحت لمكتب سياحي قريب من الفندق بعد الفطور ابغى احجز سفاري عالدبابات مدتها ساعتين يعطونك دباب رباعي كبير وتدخل بين الادغال والقرى في مناطق ماتدخلها السيارات
السعر 84 دولار
بس قالوا دامك لوحدك مانقدر نوصلك ونرجعك خذ تاكسي وقلت بلاش ادور غيركم
كان حر الساعه 11 ظهر ورجعت الغرفه واستلمت اللابتوب اكتب لكم
برظه مهم تجيب معك افلام جديده لان مافيه قنوات عربيه ولا حتى انقليزيه الا ديسكوفري شانل
ان شاء الله نوافيكم بالجديد لاحقا والصور اذا قدرت انزلها عالكومبيوتر اضفتها
الحين ابي استغل الوقت الباقي قبل الليل

الحمد لله على سلامتك اخوي ... ما شاء الله جريء رايح لوحدك ؟
جربتها من قبل اروح لحالي بس ما انبسطت ابد والرسول صلى الله عليه وسلم لم يكن يحب السفر مفرداً ( يعني الواحد يروح لحاله والله اعلم )
ياليت لو تنزل روابط السكن في جاكرتا وبالي وتذكر الاسعار لنا لان الصيفية على الابواب
ترجع بالسلامة ولا تنسى اذكار الصباح والمساء والله يحفظك من كل شر

وعليكم السلام ورحمة الله وبركاته
وترجع بالسلامة ان شاء الله ، وتجربة السفر لوحدك حقيقة مخيفة بعض الشيء ؛ خاصة في أندونيسيا لأنها تحتاج الى مجموعة
ننتظر الصور قدر الامكان ، وتعود سالما بمشيئة الله تعالى .

شكرا اخ طارق واخ حسام
بصراحه حلاة السفره لما تكون لوحدك تمشي على رأي واحد مافيه احد ينغص عليك
وبصراحه ما اشتقت الا للمدام والبنوته بس لولا ان فيه ظرف خاص بزوجتي ولا ما كان رحت من دونهم
عموما من دخلت اندونيسيا لا خوف ولا شي بعكس مطار ابوظبي كنت خايف احد من المجموعتين اللى ذكرت يغلط علي وماراح اصبر وارد عليه وفي الاخير نرجع على اول طياره بس الحمد لله عدت
بالنسبه للفنادق واسعارها
فندق مانهاتن زوين, غرفه عاديه الليله بمليون روبيه على بوكينق والسويت اكبر شوي ولا يفرق كثير بالسعر عن الغرفه هذا الموقع على بوكينق
https://www.booking.com/hotel/id/manhattan-jakarta.ar.html?aid=1300939
الفطور 7 من 10
الغرف والنظافه 8 من 10
الخدمات 6 من 10
الموقع 7 من10

فندق الايا
اربع نجوم بس افضل كثير من مانهاتن مع انه 5 نجوم
عيبه الفطور والنت
الفطور والنت 5 من 10
الغرف والنظافه 9 من 10
الخدمات 9 من 10
الموقع 9 من 10
يتكون الفندق من 3 ادوار كل دور فيه 15 غرفه المجموع 45 غرفه
مثل ما ذكرت جديد ومع انه في منطقه زراعيه الا اني ما شفت في الغرف اي حشرات, في الغرف طارد للحشرات تشبكه بالكهرب وبرضه تقدر تكلمهم يرشون مبيد في الغرفه متي ما بغيت مع اني ما احتجت لأي الطريقتين.
الغرف نوعين مايفرق بينهم الا البانيو ومساحة الغرف 47 م اللي ببانيو ب 600 ريال الليله واللي بدون ب 500 ريال
https://www.booking.com/hotel/id/alaya-resort-ubud.html?aid=1300939
هذا موقعهم على بوكينق
وهذا موقعهم الرسمي
http://www.alayaubud.com/
موقعهم ارخص بشي بسيط عن بوكينق تقريبا 30 ريال

والله اكثر من ساعه احاول ارفع الصور بس سرعة النت سيئه في الفندق
تصبحون على خير

يعطيك العافية أخوي .... واصل مشتاق لتفاصيل رحلتك كون رحلتي قريبة وايضاً على طيران الاتحاد
تحياتي لك

رحلة موفقه اخي الكريم ،، لكن بخصوص نصيحتك بأن يتأخر الراكب عن الصعود فأنا اخالفك الرأي لانها اذا صابت معك فاحمد الله والا العادة يعوضونك برحلة ثانية ،، لذلك خلك عند البوابه وكن اول الصاعدين ،،
بالنسبة للتاكسي من المطار ،، التاكسي الرسمي انا اخذته كثيرا الى منطقة الامباسادور ب 85 الف روبيه،، ودائما النصيحة خذ تاكسي رسمي ،، لان ( الكداده ) السائق الطيب من بين 100 سيء ،، ودائما يصطنعون المشاكل للمسافرين ،،!!
رحلة موفقه