السلام عليكم ورحمة الله وبركاته
أخي العزيز انت أي مدينة تبي تروح هذا أولا
ثانيا الجو يعتبر لطيف نوعا ما أما من ناحية الأمطار الله أعلم على حسب المنطقه والمدينه
ثانيا من ناحية الفيزا حتى بنتك الله يحفظها لك لابد لها من فيزا والتكلفه تقريبا ان كانها ماتغيرت الواحد ب 285 ريال
وقت سفرتك بتكون أسعار الفنادق إن شاء الله أقل من شهر 7 و8 و9
وإن شاء الله مبدئيا التكلفه ممتازه والله يبارك فيها بس علمني في أي مدينه بتروح وياليت تعطيني الموعد بالتاريخ الميلادي وأشوف لك أسعار الفنادق وأعطيك أفضل الموجود من جميع النواحي
تحياتي لك وباانتظار ردك وموفق يارب في سفرتك

شكر لك يا عزيز على ردك السريع
أولا أنا أول مره أطلع لأوربا وبصراحة ما أعرف المدن بالظبط اللي ودي اروح لها في أسبانيا بس بصراحة ودي أروح لمدريد وبرشلونة والأماكن اللي متوفر فيها الالعاب المائية عشان بنتي الصغيرة
ثانيا أنا سفرتي ماحددتها بالتاريخ الى الآن لإني ماحجزت بعد بس غالبا راح تبدأ مابين 28/9/2009 إلى 30/9/2009 هذا يمكن راح يكون بداية سفرتي اللي يمكن تمتد مابين 10 إلى 14 يوم تقريبا
وسؤالي يعني تتوقع 25000 ريال تكفي ل 14 يوم شاملة كل شي ( تذاكر - وسكن معقول - وفيزا - ومطاعم - وتمشيات )
وشكرا على ردك واهتمامك بموضوعي وسعدت جدا
تحياتي

الله يعينك ويسهلك دربك

• أسعار الفيزا - أنا دفعت يوم الخميس الماضي للسفارة الفرنسية 317 ريال عني و317 عن زوجتي أما طفلتي فلا شيء (أقل من 3 سنوات مجاناً)
• تذاكر الطيران - بامكانك الحصول على تذكرة مخفضة , ادخل موقع الخطوط السعودية واقرأ عن عروض اوروبا أو اتصل على رقمهم الخاص بالحجوزات واسأل عن كيفية الحصول على عرض واسألهم ماهي الدرجة v
• الطقس ربيعي نهاراً وبارد مساءً
• القريشات اللي معك تكفي وزيادة بإذن الله

أي سؤال أنا جاهز لأني ساعي بسفرة تشبه سفرتك بإذن الله وفي اكتوبر

ألف شكر لك أخوي fatheroflions أنا بصراحة اللي مخليني متردد لإسبانيا هو الطقس يعني ماودي يكون أمطار وبرد لان الأجواء هذه ماراح تناسبني اطلاقا
بعدين اذا سفرتك قريبة من سفرتي طيب وش تنصحني فيه بالفنادق أنا أبي شي حلو ومرتب ومو مشكلة اذا كان 3 نجوم ووشلون أحجز من النت أفضل والا من مكتب حجوزات ؟؟
طيب اذا سمحت لو توزع لي المدن اللي أروح لها لمدة 14 يوم مع اخذ بالاعتبار مدينة مدريد وبرشلونه وماربيا وهل هذي المدن تكفي لرحلة مدتها 14 يوم .
وفيه سؤال بعد كيف راح يكون التنقل بين هذه المدن هل فيه هناك قطارات مابين هذه المدن ؟
وفيه ملاحظه بسيطه ترى ميزانيتي 25000 ريال مع التذاكر ( للمعلومية ) هل هي راح تكفيني ان شاء الله
وألف شكر لك وعلى ادلاء رأيك ( المهم )

1. ولما بإذن الله تطلع الفيزا نحجز أنا وياك من البوكنق براحتنا

قبل كل شي حاول تحصل سعر تذكرة مناسب لحجز طيران لان العملية رح تفرق واجد
انت وزوجتك وبنتك ممكن تحصل على الخطوط السعودية رياض مدريد رياض تذكرة بسعر (المجموع الكلي) 3000 ريال وحولها هالشي كان متوفر الشهر الماضي لكن الان صارت فرصة الحصول على هالسعر صعبة شوي وكلما قرب موعد السفر كل ما زاد السعر
روح دور على تذاكر واشتري فوراً , وإذا لا سمح الله ما طلعت الفيزا فبإمكانك الارجاع وما رح تخسر إلا خمسين ريال عن كل تكت
ليش أنا ركزت على هالامر ؟ لأن ميزانيتك 25 ألف شاملة التذاكر , ولو ما حجزت تذاكر بدري قد تضطر لدفع تذاكر لك ولزوجتك ولبنتك بحوالي 8 آلاف ريال وحولها وهذا الفرق يكسر الميزانية ويخربط أبو الحسبة كلها
تعال لحجز الفنادق ,,, روح لأي مكتب سفريات (كلهم جشعين) واحجز لكامل المدة في فندق واحد وفهم الموظف إنك قد تضطر لإلغاء هذا الحجز في أي وقت واشرط عليه امكانية هالامر لأنك عن طريق مكتب السفريات رح تقدر تخلص الموضوع المتعلق بالسكن والكونفيرميشن وما إلى ذلك بشكل أسرع مما لو قعدت تحجز عن طريق البووكنق وتحير نفسك و الخ

ولما بإذن الله تطلع الفيزا نحجز أنا وياك من البوكنق براحتنا

بالنسبة للمدن والتنقل فيها ومنها واليها ,,, إنت مضطر تبدأ من مدريد لأن الخطوط السعودية في ذلك الشهر لا يوجد لها رحلات بإتجاه اسبانيا إلا لمدريد
تنزل بمطار مدريد وتقعد يومين والثالث تستأجر سيارة وتنزل على طليطلة من الصباح بدري ومنها على طول تنزل على الجنوب على أحد المدن التالية (فنخرولا ميخاس ماربيا ملقا بنالمدينا) وتقعد فيها 7 ليالي واليوم الثامن تطلع على برشلونة تقعد 4 ليالي واليوم الخامس تطلع على مدريد بالسيارة وتسلمها هناك وترجع سالم غانم
هذي تقريباً 14 يوم ومعدل الصرف فيها مع احترامي للجميع سيكون بمعدل 1200 ريال باليوم خمسمية سكن وسبعمية سيارة وديزلها وأكلك وشربك
مدن الجنوب رح اعطيك فندق فطور وعشا بحول ال350 ريال بس امش بالخطوات خطوة خطوة
لك كل التحية

طيب ان شاء الله أنا راح أقص التذاكر بعد اسبوعين وبعدها راح اقدم على الفيز بس من وين اطلع الفيز و وشي هي الشروط وبعدين انت خوفتني يوم قلت اذا لا سمح الله ماطلعت الفيزا تقدر ترجع تذاكرك ...
السؤال وش اللي يخلي الفيزا يمكن ما تطلع ؟؟
ممكن تعطيني بعض الأسباب اللي تخليها ما تطلع هذا شي ..
الشي الثاني انت ما قصرت بردك وادلاء المعلومات بس فيه حاجه وأنا مصر عليها حالة الطقس يعني بالعربي انت لما قلت انه ربيعي نهارا وبارد مساء يعني هل انه فيما معناه انه بالليل لابد من لبس ثقيل نحتاج لبعض الجاكيتات مثلا في الليل ؟
وان شاء الله راح أوافيك بكل اللي راح يصير معاي وبعدها مثل ما تكرمت علي انك تساعدني في حجوزات الفنادق ... أنا تعبتك معاي بس اعذرني لاني بصراحه ماعمري قد حجزت عن طريق النت واحتاج والله لمساعدة كبيرة في هذا الشي
وألف شكر لك على تواصلك
تحياتي لك

قل آمين ا ابو ريما ان الله ييسر امرك بهالروحه .. وتروح وترجع وانت فال ابووها

احجزو على هالموقع ارخص بوايد
طيران+الفنادق + السياره
انت تختار على كيفك
جربو وارخص بوايد
انا حصلت رحله الى برشلونه ل14 يوم +فندق 5 نجوم +الطيران الفرنسي ب 13 الف درهم تقريبا
هذا الموقع: http://www.expedia.com/

اخواني
fatheroflions
و
سلام 90
هل ترونه من المناسب اصدار الفيز خلال فترة الصيف؟!!
بأذن الله ساسافر لأسبانيا خلال نفس الفتره وانوي التقديم على السفاره الأسبانيه مع دخول شهر رمضان ان شاء الله...