- عن طريق الحدود السورية الاردنية
- المهم اول ماسويت حجز قالولي ان السكن مع الفطور ..
- المراكز الحدودية
السلام عليكم
ذهبت إلى سوريا بتاريخ 6-7-2005 والعودة كانت بتاريخ 7-7-2005
عن طريق الحدود السورية الاردنية
طبعاً أول شئ اسمحولي عن مواضيعي الي تفتقر إلى الصور .. لكن اوعدكم خير ان شاء الله ان الصور راح تنزل .. بس احصل وقت شوي والله كل شئ جاهز بس يبيله ترتيب شوي ..
طبعاً الرحلة كانت بعد ما ضبطت مع احد الاصدقاء اني باجي سوريا وهو حجز لي شقة وضبطلي الامر لكن تفاجئت اني يوم دخلت سوريا اتصل فيه 20 مرة مايرد علي .. وانا معاي الاهل وبنتي الصغيرة والمشكلة انه مايرد توهقت وحجزت في فندق الشام بالاس .. وسكنت فيه .. وكان سعره خيالي جداً بالمقارنه مع خدماته ومستواه السعر الي خذته مع الضرائب والخدمة 266 دولار !! وايد غالي بس شاسوي مع ان الغرف وايد ضيقه والفندق قديم واحسن مافيه اللوبي والله ،، ماعرف البلاد ولا اعرف فيها شئ وملزوم اني ارتاح واريح الاهل .. المهم كانت الغرفه في الطابق ال 8 وكان هناك صالة فيها طاولات طعام وكمبيوتر وبوفيه صغير ..
المهم اول ماسويت حجز قالولي ان السكن مع الفطور ..
رحت الغرفة وريحت شوي واتصلت في صاحبي الثاني وعطاني رقم سائق من بدو الجولان .. الصراحة ونعم الرجل .. اول شئ وداني سوق الحميدية .. كان زحمه وملاغه وسنداره .. غير ان جو دمشق ملوث جداً بالديزل !! المهم اني رحت السوق لكي اكل البوضة الشامية فقط .. وكلتها وراح انزل لكم صورها قريباً ان شاء الله .. وكانت لذيذه جداً وشربت عصير التوت الشامي .. ورحت صوب المسجد الاموي لكن لسوء حظي ان بنتي كانت مزعجتني ومزاجي متعكر جداً منها .. ومادخلت المسجد الاموي .. وطلعنا على طول من السوق . ورحنا على طول الزبداني وبلودان ورحنا على طول مطعم جدودنا في بلودنا فوق الجبل كان مطعم طلته حلوه والجو رائع جداً ،، تغدينا فيه لشخيص مع وجبه مليئة بالاطباق ، وكان السعر خيالي بالنسبة لي 900 ليره فقط !! شئ جميل جداً ورخيص ..
وخذت لي شقة في بلودان والله شقق حلوه وفلل حلوه قالي السائق عنها ان ب 100 دولار تجيب لي فيلا مع مسبح مع مزرعه لكن شنسوي نستفيد من خبراتنا في المرات الجاية ان شاء الله وحجزت لي شقة لكي ارتاح فيها فترة الظهيره .. وارتحت فيها وقمت الساعة 6 المغرب ورحت لبستان ملئ بالفواكه مثل المشمش والغوجه والكمترا والتفاح والعنب وجلسنا تحت الشجر مع شاي شامي وفواكه .. وبعدها طلعنا على السوق الي في الزبداني .. وطلعنا على طول إلى جبل قوسيون .. وتمشينا اهناك مع العلم ان السائق حذرنا ان نقعد في الجلسات بدون ما نسأل عن سعر الجلسة لا سعر الجلسة ياخذون عليه حوالي 2000 ليره .. المهم .. ان مشينا شوي ونزلنا إلى الشام وتعشينا في مطعم ابوالكمال ما دري ابوكامل .. مشويات مع سلطة جرجير وحركات .. ورجعنا الفندق ونمنا وصحينا الصبح وتفطرنا في المطعم الي في الطابق الاول وسوينا شيك اوت .. وفي البداية انا متفاهم معاهم ان الغرفه لازم يشلون من المني بار يشلون كل شئ ماي بسكوت كافي كل شئ ،، علشان ما اتوهق معاهم .. المهم اني يوم اسوي شيك اوت رجع علي بس 10 دولار لاني عطيته 300 دولار .. قلت له ليش !! قالي لانكم متفطرين في مطعم الفندق .. قلت له شوف .. والشرر يتطاير من عيني .. انا خذت الفندق بسعر غالي .. لاني ملزووم اريح الاهل .. وانت تجي تقولي الفطور بفلوس مع اني متفاهم معاكم ان الغرفه مع الفطور ؟؟؟؟؟؟؟؟؟ قالي اي نعم احنا قلنا هذا الكلام لان الفطور في الطابق الي انت فيه ( قصده الاستراحه ) ،، قلت له شوي .. كل فنادق العالم لو يقولون لك الغرفة مع الفطور يعني الفطور في المطعم ، ولا تقعد تعور راسي جيب فلوسي لا قسماً بالله اعفسكم انا اهنيه .. سوا اتصالاته ورد لي الباقي بالتمام والكمال .. لانه لو ما رجع لي الباقي .. راح اعرف اتفاهمم معاه لول ( شفيه القوي ) لول .. المهم طلعنا على سيارتنا علشان نشتري حلويات من داود .. وخذنا سيارة جمس موديل 2000 سوبرمان إلى الاردن بسعر 2500 ليره ..
بصورة عامة
سوريا حق الي يعرف لها جداً رائعه .. لكن الي مايعرف لها راح يضيف ويكرهها للاسف !!!
المراكز الحدودية
واحنا داخلين سوريا .. كانت الدنيا زحمه .. وخلصوا جوازي مع جواز الاهل وللأسف الشديد انهم ماعطوني الجواز إلا متأخر قعدت نص ساعه انتظر مع ان الجواز خالص .. إثر السالفة سالفة بخشيش !! لكن ماعطيتهم شئ
لكن واحنا طالعين من سوريا كانت الزحمه دبل زحمه الدخول .. خذت الجوازات وحطيت 5 دولار داخل الجواز وعطينا الضابط الي عند الكونتر الي يستلم الجوازات .. فتح الجواز الي فيه ال 5 دولارات .. شاف الفلوس .. زعق علي (((( شيل مصرياتك )))) بل بل بل .. عسى ماشر شفيه توحش .. أخبر السورين ياخذون بخشيش .. ليش عسى ماشر هاهاهاهاها .. خذت الجواز وشلت ال 5 دولارات منه وحطيتها في جيبي .. الشرطي شل الجوازات وراح للكونتر الاخير وغمز لي عطيته المقسوم خلصني في دقيقه وحده بس مع ان الناس تنطر دورها ( لول ) ..
يالله الحياه تجارب .. ولازم نجرب علشان نستفيد .. وشكراً على متابعتكم .. وان شاء الله الصور جايه في الطريج .. بس عطوني وقت .. وشكراً لكم على متابتعكم الممتازة .. وفي انتظار تعليقاتكم
وماقصرت بسردك وشرحك الرائع ......
ههه صحتين وعافية على قلبك بوظة بكداش ، أكيد طيبة ..........
بس بالفعل سعر الفندق غالى جدا ..... !!!!
ونتتظر منك الصور ....
بالسلا مة ...