- شرايك بوحمدان.
- كان يوقف السيارة في أماكن صعبه متروكه لأنه صعب الايقاف فيها.
الحمدلله كانت رحلتنا الى اسبانيا ممتعه وموفقه..قضينا فيها يومين في برشلونه و8 ايام في ماربيا..
والمعلومات اللي خذيناها في المنتدى ممتازة ومفيده وياليتنا طعنا الشاب لما قال سكنوا فندق البينابولا..لأن فعلا موقعه ممتاز في البورت..السكن كان في شقق مطله على البحر. سعر الشقه شخصين 135 يورو في اطول مبنى في ماربيا ....الشاطيء ممتاز بس ما أنصح بالسباحه فيه..سبحت فيه مره..أمواج قويه جدا...وعضني شي في البحر سبب لي حساسية وبقعه حمرا ظلت معي طول الرحلي في يدي.
في برشلونه سكنت في الرامبلا وهي منطقة ممتازة ورائعه وقمنا بزيارة عدة اماكن هناك من ضمنها نادي برشلونه العريق والميناء والدوان تاون الخاص بكاتالونيا.
في برشلونه لا تحتاج لأستئجار سياره. حيث يوجد باص سياحي. قيمة التذكره 18 يورو لليوم بأكمله ويتوقف في عدة محطات في برشلونه وهي المهمه في المدينه وكل 5 دقائق يتواجد باص في المحطة.
وكان الجو ممطر في ثاني يوم لنا والجو حلو بصراحه والمدينه ذي انا حبيتها وراح أزورها مره ثانيه بأذن الله. بخصوص الاسعار..أنا ارى انها معقوله في برشلونه للاكل والتنقل والسكن
ماربيا:في هذه المدينه المشاكل اللتي تواجهك هي:الغلاء. انا اغلى من المدينه ذي ما شفت..وقوف سيارتك غالي أكلك غاي...سكنك غالي يعني مستوى الشقة اللي سكنت فيها مو لهناك ولا أعطيها نجمتين بعد..و135 يورو
بس بصراحه ما زهقنا منها...نتعشى في بعلبك وكنعه ونتمشى في البورت ولفينا شواطيء رائعه جدا في ارجاء ماربيا.
القيادة مشكله في ماربيا لأن المواقف فعلا صعبه ومشكله...بس كان خويي صراحه سواق (طاره) على ما يقول هزبر
شرايك بوحمدان.
كان يوقف السيارة في أماكن صعبه متروكه لأنه صعب الايقاف فيها.
طبعا صار لنا موقف أول يوم ماربيا أستاجرنا السياره ورحنا على طول الشقه بننام بعد ما لفينا المدينه ذاك اليوم وجينا حصلنا موقف بصعوبه بقرب الفندق وكنا ما ندري عن المواقف اللي بفلوس ووقفنا مع نا شفناهم موقفين قدامنا..مع ن احنا شفنا علامه..كانها ممنوع الوقوف أو مواقف خاصه بس قلنا الحين الساعه 2 بالليل وراح نقوم بدري بكره ما يمديهم الشرطه يعطونا مخالفه..المهم رحنا نمنا وثاني يوم الصبح قمنا ما حصلنا السيارة,,,بس يا زين اجرائاتهم في 10 دقائق كنا دافعين 120 يورو ومطلعين السياره. (على فكره أجار السيارة 35 يورو) وندفع للمواقف 35 يورو اجرة مواقف يوميا.
على العموم المدينه حلوه وصارت لنا مواقف طريفه فيها...( خويي الله يهديه دايما يضيع الاغراض وتصير له مواقف حلوه)
ياكثر الفيراري هناك..زي الكامري عندنا...كل واحد يوقف الفراري ويروح لليخت تبعه....عالم عايشه.
التعامل كان ممتاز من الشعب ومن الشرطه ومن جميع النواحي
الدوله رائعه وتستحق الزيارة...كان ودي ازور لشبونه..لكن الميزانية تحطمت في اسبانيا
وعودا حميدا
تحياتي ،،،