- بسم الله الرحمن الرحيم
بسم الله الرحمن الرحيم
ابدي الموضوع بأسم الله الواحد الأحد............ انا واحد كنت أسمع عن رومانيا وايد من الشباب اللي عندنا بالكويت وعيال خالتي ولعبت السالفه في راسي من السنه اللي طافت وسألت عن الديره وشفت صور ومعلومات عنها وعفت خريطتها ودليت الطريق اللي بين المدن وانا لي الحين ما رحت
ولما قرب الصيف وصارت الصجيه الكل يقول من الربع الضاهر اني ماني رايح........
وانا كنت راكب راسي وصامل بروحه لو بروحي وقام معاي رفيجي الخاص (عبدالله) وقال انا معاك رحنا المكتب السفريات وضبطنا نفسنا ولا المكالمات ما توقف على التلفون وكلهم يقولون: بكم التذكره وشلون الرحله ويسئلون وانا اعرف ربعي لين اخر شي يقررون وين يروحون تصورو قبل السفره بشهر اثنين قبلها بيومين صرنا 14 شخص قروب ماشاء الله اللي بالمطار عبالهم رايحين نشجع نادي رياضي
والعجيب اللي فينا احنى 14 ولا واحد فيهم اسمه نفس الثاني وكلهم يطمحون الى الضحك مافيهم اللي رايح يتثقف..... المهم طرنا على الخطوط الرومانيه (تاروم) من دبي لأ نه من الكويت مافي ديريكت وصلنا دبي وعفيستنا نايمين بالممر تقول لاجئين لما فرجت علينا وطرنا بتجاه بوخاريست تاخذ الطياره 5 ساعات تقريبا وكنا متواعدين مع واحد ينطرنا بالمطار روماني يتكلم عربي عنده خبره في السياحه مع العرب يتكلم الخليجي عموما ما يفهم بالمصري وغيره محترم الى اخر درجه وأمين لدرجه التذاكر عنده طوول الرحله اللي كانت 25 يوم كان ناطرنا بالمطار على باص وسياره لأنه ماشاء الله ما يكفوون وكنا حيل مستانسين لأنه الديره كنت اتمناها صج ومن قلب وتقريبا 6-8 من القرووب اول مره يسافرون الى اوربا يعني بالعربي اضحك والقروب كله حد يتكلم انجليزي الى 4 بس واشوى اني منهم
بعدها طلعنا مع الروماني ( دورو ) الى مدينه تسمى كونستانتا الساحليه على البحر الأسود وفيها هناك منتجع اسمه مامايا واللي فيه اكثر من 70 فندق على البحر ويجمعون فيه السياح من كل اوربا وذلك لموقعه الممتاز بين بحر وبحيره وممشى عجيب انا اللي ما احب المشي تمشيت لأنه عيونك ما تشوف اللي يكسرها الكل يجذب مثل ما قالو خضره وماء و(وجها حسن)........ فيها المنطقه الكثير من المطاعم والمقاهي وتصدقوون انه عندهم شورما حلوه حيل وعليهم بحر يرد الروح وتأجير سياكل ودراجات هوائيه وفي الليل حيااة اخرى...... ما يوقف الروتين مثل المناطق الأخرى في رومانيا وعموما في اوربا لا على العكس تزيد المعيشه بالليل وتشتغل البولينغ الرائع حقيقتا يكوون FULL في الليل والألعاب الناريه والأماكن الرومانسيه على البحر وديره كثر ما اوصف عنها ما اقدر على شان اذا طولت بسوالف فيها راح ابكي سكنا في فندق اسمه الدولفينول وكانت الليله للغرفه الدبل 50 دولار والتربل 60 دولار رخييص عموما وفندق جميل والعمال يرحبون فيك وانت طالع وداش
بعد مرور اربع ايام في مامايا قررنا نروح براشوف وكنا حاجزين الفيلا بالتلفون بعد وصولنا الى براشوف كان الجو برد لقينه الفيلا موجودين فيها ناس كانو المفروض يسافرون بس حجزهم تكنسل كويتيين قلنا مو مشكله دورنا سكن مكان قريب وصعبه تلقه سكن ل 14 شخص من حسن الحظ لقينه قريب يم السنتر وكل ما فيها جيد بس مو كافيه نامو البعض على الأرض ماكو مشكله متعوديم من المخيم كان اجارها 160 دولار باليوم قعدنا فيها 5 ايام وبعدين رحنا للفيلا الكبيره 6 غرف منهم5 لشخصين وتكرمون 5 حمامات وحووش تنور لشوي وكل شي فيها مطبخ صالتين واجارها 100 دولار تصدقوون براشوف ديره تقول انك في القرن 17 طريقت البناء فيها عجيب خاصتا السنتر............
السنتر عباره عن ساحه كلها محلات وكوفي شوب ومطاعم وتعتبر محلاتهم حيل رخييصه مقارنتا بأوربا او الخليج والمطاعم بعد نفس الشي التمشي فيه يرد الروح مناظر خلالالالابه ويوجد هناك مطعمين عربيين للمشويات والأخر كويتي طبخات خليجيه كبسه لحم ودجاج وروبيان وسمك ومجبوس وكل شي يطري عليك بالكويت او الخليج العربي اسمه كازابلانكا اما الكويتي ابونواس مفتوح 24 ساعه
يوجد ترفليك في براشوف تستطيع ان ترى براشوف بالكامل من فوق مكان حلو........
الشمس عندهم تغيب الساعه 9:30 او 10 عاد من تغيب الشمس ليما 12:00 يعتبر كل شي صكر بالسنتر او غيره عاد اللي له بنوادي الليليه يروح اللي ماله يرد الفيلا احنى الصراحه كنا نتمشى عشان كنا مفتقدين البرد موشايفين خير وقتا واللي يقول انه الديره ماكو امان كذاب انا رحت اماكن الرومانيين يخافون يروحون ماكو شي امان حيل الروامنيين نفسيتهم حلوه مع الغريب واحنى هم ما نغلط انا قبل ما اروح توعتها نفس الأفلام تخرع وعصابات طلع كلام فاضي طيعوني..........
رحنا اماكن ورحلات وايد مثل بيانا براشوف وركبنا الخيل هناك واكلنا من الغزلان اللي يحبهم قلبك شوي وطبيعه ما تتصورونها في بيانا براشوف .........
ورحنا مدينه سبيو لأنه فيه قمت جبل فيها ثلج واحنى ما شفنا خير رحنى على طول وكنا نبي نشوي على النهم اللي لو اوصفلكم اياه تجذبووني والله انه كنه نشرب من الماي اللي كان ابرد من اللي بالبراده او الثلاجه حطينه الرقي على النهر والبيبسي وغيرها عشان يبردون واحنى نشوي اللحم والدجاج اللي لقيناه ذبح اسلامي اما اللحم خروف احنى شريناه حي وحللناه وكانت شويه حلوه وما تنسوي والله....... بعدها كملنا للثلج واستانسنا اهناك .........
ورحنا منطقه اسمها بشتين وهاذي تبعد عن براشوف 100 كيلو تقريبا فيها ترفليك يعتبر ثالث اعلى ترفليك بأوربا 2800 متر فييه قمه عجيبه وحلوه وكله سياح من اوربا هناك تصدقون انه تذكره الترفليك 200000 لي يعني 2 دينار كويتي رخيص حيل
ورحنا مدينه بران اللي تبعد 160 كيلو تقريبا من براشوف وفيها قلعه دراكولا المشهووره وكلها سياح اهناك يتفنتكوون احنا مالنه بهسوالف نبي بس نصور اهناك ونشوف ما نبي نسأل وفيه سوق يبيع ملابس واغراض عليها اسماء ورسومات دراكولا
ورحنا منطقه كودليا اللي فيها بحيره حلوه ومكان عجيب لصيد السمك وللمغامرات بالغابه مثل ما احنى سوينه تهنا بالغابه بس الله ستر علينا قدرنا نطلع 14 شخص قبل المغرب .......
واخيرا بعد ما طلعنا من براشوف اللي قعدنا فيها 17 يوم رحنا سنايا لنسكن بمنزل (دورو) صديقنه الروماني وكان ياخذ على الواحد 10 دولار وله غرفه يعني شوف الرخص واهو already يأجر بيته مو عشان يعني احنه نعرفه وسنايا ديره صغييره بس حلوه حيل فيها قلعه الملك الروماني ومنطقه بارده حيل لأنها على جبل تصدقوون انه القلعه بابها من ذهب مكتوب عليه بسم الله الرحمن الرحيم ...........
المنطقه فيها تأجير للبقيات (دباب) حده حده حده حلو بس يطلب منك انك تورييه الليسن الأجازه
وروح وين ما ودك تروح وفيها مطاعم جميله وهادئ وسوق وكل شي الديره هاذي اللي تشم الهواء النقي صح قعدنا بالمنطقه هاذي 4 ايام قبل ما نرد الكويت واحنا رادين كل واحد ايده على خده من الزهقه نبي نقعد بعد 25 يوم ما كفت.................. وردينه بالسلامه ما صار علينه اي شي بالمطارات ولي يبي يسأل اي شي انا حاضر من عيوني اخوكم عاشق رومانيا
