طراد القصيم
يعني تبي تضحك على بنت الناس وتقول شهرعسل 10 ايام ياخوي الشهر 30 يوم ماهو 10
ههه
امزح معك ياخوي
نقول لك زواج مبارك وجمع الله بينكما على خير ورزقكم الذريه الصالحه .
نرجع لموضوعنا
النثريات اليوميه لاتتطابق بين الناس مثلا انا ممكن امشي حالي وجبات سريعه وانت تبي جلوس بمطعم تحت الشموع و 15 % خدمه و....... الخ )
اعتقد والله اعلم ان النثريات لن تقل عن 500 ريال يوميا للشخص الحكيم
ندعوا لك بالتوفيق برحله ممتعه

الغالي المزيد تقل تقرا الي بقلبي ههه
قسم بالله اول ماكتبت الموضوع وطلعت قلت الحين وشلون 10 ايام وشهر عسل ماتجي ههه
ياخي خلها على ربك ترتيب السفر لعب فيني لعب غير ترتيب الزواج
اول ماقررت كنت بروح تركيا وكنسلتها وبعدين قررت اروح سويسرا وقصيت التذاكر عن طريق الاتحاد للطيران
بعدين كنسلت وخسرت على كل تذكرة 400 ريال وقررت التوجه لتايلاند وحجزت وقصيت التذاكر
والحين كنسلتها بعد الاحداث والتحذيرات الي صارت فيها وخسرت على كل تذكرة 200 ريال
وقررت اروح مصر لكن ستر ربك ماقصيت التذاكر والحين مالحب الا للحبيب الأولي
رجعنا لسويسرا والله يكتب الي فيه خير وإن شاء الله تتم والحين جالس اسوي ترتيبات الحجز.

اضحك الله سنك , قعدت اضحك لحالي وخفت واحد من العيال يشوفن ويقول ابوي انهبل
سويسرا اختيار موفق , وان شاء الله لن تندم
النصائح
اولا :- اجازتك قصيره مره على الاقل خلها اسبوعين لاجل تحلل التذاكر
ثلنيا :- لابد انك تاخذ سياره بدون ترد
ثالثا :- لاتتنقل كثير وقسمها قسمين (بين بحيرة جنيف وبين انترلاكن )
الله يوفقك يارب

الغالي المزيد
الله يجعلها دوم هالضحكه ان شاء الله وبيض الله وجهك على المساعدة
بالنسبة للإجازة فالحجز ياطويل العمر راح يكون الذهاب بتاريخ 14 فجرا والعودة بتاريخ 27
لمشكلة ان أسعار التذاكر ولعت الحين وماتحسفت الا على الحجز الأول الي ألغيته كنت اخذه بشهر 12 العام الماضي
وبسعر رخيص ههه
وبالنسبة للسيارة فأنا من الأساس مقرر استأجر سيارة حتى اني مشتري قارمن من يوم نويت اسافر المرة الأولى
وربك يسهلها ان شاء الله
لكن ابيك ترشح لي فنادق في انترلاكن وفنادق بجنيف تكون ممتازة
وللأمانة المرة الاولى بالحجز حجزت على فندق هوليدي ان جنيفا بسويسرا
وفندق قولدي بإنتلاكن
فأبي رأيك الله لا يهينك بهالفنادق اذا عندك خلفية عنها او ترشح لي فنادق أخرى
بالتوفيق للجميع

فندق قولدي اختيار جيد ,, سبق لي السكن فيه ولكن بشرطين
1- ان تكون الغرف جنوبيه مطله على النهر
2- ان تكون الغرفه في الادوار من الثاني فمافوق للبعد عن الخلايا الشمسيه التي تحجب الرؤيا
جنيف لم اسكن في فنادقها ,, كل سكني في ديفون الفرنسيه على مسافة 20 كم عن وسط جنبف

المزيد
الله يعطيك العافية
طيب بالنسبة لجنيف وش المناطق الي ممكن ازورها لو سكنت فيها يعني رحلة يوم وارجع بالسيارة
هل فيه موضوع بالمنتدى فيه احداثيات الاماكن السياحية بسويسرا ممكن اخزن الاحداثيات منه؟
وسؤال اخر بالنسبة للصرف هناك هل احتاج للنقد لازم يكون معي والا اكتفي بالبطاقة الإئتمانية أفضل من النقد
الله لا يهينك أخوي المزيد

واستفسار اخر بخصوص الحجاب
مثل مانسمع ونقرأ الان والحملة القوية على الحجاب بسويسرا وانهم راح يقرون نظام يمنع ارتداء الحجاب عندهم

الله يوفقكم اخوي طراد القصيم
اللي مانعه النقاب وليس الحجاب هي فرنسا وبلجيكا :18xwg:
اما سويسرا بالعكس النقاب والحجاب فيها عادي جدا
اتمنى افدتك
اختك بيردز

طراد القصيم
اولا :- الحجاب موضوع النقاش هو الحجاب الكامل يعني مافيه ملامح لشخصية المرأه ابدا
ثانيا :- لااعتقد ان الحجاب بالاماكن العامه فيه اشكال ( يمكن منعوه في اماكن العمل او الجامعات
والمدارس او ماشابه )
في الصيف الماضي لم اواجه اي مشاكل خلاف بعض نظرات المتطفلين وقد كان معي من تأخذ
برخصة اظهار الوجه والكفين ومعي من غطت كامل جسدها .