راعي الكام
14-10-2022 - 09:19 am
السلام عليكم ورحمة الله وبركاته
بإذن الله بنروح لأوروبا إذا كنا من الحيين
من 9 - 29 اغسطس 2013
وعندي بعض الإستفسارات من الخبراء
الله يعطيهم العافية
وجعل ما يقدمون بميزان حسناتهم
1- الشنغن من وين نستخرجها إي سفاره أفضل ؟
2- عندي 3 اطفال بجواز واحد واعمارهم بين 2 - 11 سنة عادي بالنسبة للشنغن والإ لازم أفصلهم كل واحد بجواز ( مع العلم إني حجزت الحين الطيران وقضيت )
3- الذهاب راح يكون على موينخ والعودة من باريس
أبي برنامج خلال هالمدة من 9 - 29 اغسطس
يكون يشمل الطبيعة والأماكن اللي فيها ترفيه للأبناء
4- بالنسبة للحجاب ( العباية و النقاب ) وخاصة في فرنسا لإن العودة راح تكون من باريس وش وضعه هناك ؟
5- هل انترلاكن تكفي عن زيارة زيلامسي ؟
لإن سويسرا أكثر شي معجبتني
والإ الأيام كثيره نروح لهذي وهذي ؟
6- هل فيه سكن يكفي لإفراد العائله أنا والمدام و 3 أطفال ( عبارة عن شقة ويوجد فيها مطبخ )
لو يكون بأغلب الأماكن لا للكل
لإن الأرياف أوسع صدر وأقل زحمة وسمعت إنها أقل سعر.
7- بالنسبة للسيارة وش الأفضل ( فيه شركة معينه ) ومتى نستلمها ومتى نسلمها ؟
8- الميزانية الحالية من غير التذاكر المدفوعه 35 ألف ريال سعودي هل تكفي ؟
9- البطاقات الإئتمانية مسبقة الدفع تمشي هناك وخاصة إن أحرفها بارزه ؟
10- متى نبدأ بحجز السكن ؟
وأخيراً
أشكر المشرف الغاليMedo 77
اللي آشار علي بفتح موضوع مستقل بهالقسم
لكم جميعاً
التقدير والإحترام
حياك الله اخوي راعي الكام ..والله يسهل لكم سفرتكم .
نقول بسم الله ..وهات الاسئلة :
1- الشنغن من وين نستخرجها إي سفاره أفضل ؟
هذا السؤال المفروض يجي متأخر شوي .
والافضل انك تحدد المخطط بالاول ..ثم الشنجن من وين تطلع .
لأن الشنجن مرتبط بالدولة الاكثر اقامة في مخططك .
وهذه خليها شوي.
2- عندي 3 اطفال بجواز واحد واعمارهم بين 2 - 11 سنة عادي بالنسبة للشنغن والإ لازم أفصلهم كل واحد بجواز ( مع العلم إني حجزت الحين الطيران وقضيت )
والله ليس لي تجربة مع تأشيرات الاطفال ...لكن اللي اعرفه ان كل طفل تعبي له ابليكشن خاص فيه .
وهذه خليها شوي .
3- الذهاب راح يكون على موينخ والعودة من باريس
أبي برنامج خلال هالمدة من 9 - 29 اغسطس
يكون يشمل الطبيعة والأماكن اللي فيها ترفيه للأبناء
المخطط المقترح لخط سيرك :
ميونخ ثلاثة ايام
زيلاميسي اربعة ايام
كونستانس يومين
انترلكن خمسة ايام
اليوروب بارك يومين
باريس اربعة ايام
والانشطة في هذا المخطط متنوعة جدا .
فيبقى الاكثر اقامة راح تكون في ألمانيا ...والتأشيرة الشنجن تطلع من الالمانية ..من مركز التأشيرا ت الموحد ..في الشرقية وجدة والرياض .
لا تتصل عليهم ..روح لهم بنفسك وخذ الطلبات وكل الاستفسارات ..عشان تتأكد 100 %
جوازات الاطفال + حضور العائلة عند تقديم الاوراق للبصمة + الطلبات والشروط ...الخ .
اذا اتصلت عليهم راح يردو عليك الكول سنتر ..والله بالخير .
4- بالنسبة للحجاب ( العباية و النقاب ) وخاصة في فرنسا لإن العودة راح تكون من باريس وش وضعه هناك ؟
ان شاء الله ماعليك خلاف .
الكثير ينزلو مطار جنيف بالنقاب ولا حد اعترضهم .
صحيح راح تواجه نظرات الاستغراب والاستهجان ..لكونه شي جديد عليهم ..وممكن استبدال العباية السوداء بواحدة بيضاء او لباس فضفاض مع النقاب .
زي ما تشوف النسوان في الحرم في مكة الله يعمرها .
5- هل انترلاكن تكفي عن زيارة زيلامسي ؟
لإن سويسرا أكثر شي معجبتني
والإ الأيام كثيره نروح لهذي وهذي ؟
ممكن تلغي زيلاميسي وتوزع ايامها على انترلكن وكونستانس .
لكن ميزتها ارخص من انترلكن ...لكن مو احلى طبعا ..الجودة السياحية في سويسرا على مستوى عالي.
6- هل فيه سكن يكفي لإفراد العائله أنا والمدام و 3 أطفال ( عبارة عن شقة ويوجد فيها مطبخ )
لو يكون بأغلب الأماكن لا للكل
لإن الأرياف أوسع صدر وأقل زحمة وسمعت إنها أقل سعر.
اذا كنسلت زيلاميسي ..ممكن في انترلكن تاخذ شقة بنظام اسبوعي .
ومو شرط في وسط انترلكن ...توجد قرى قريبة منها باردة شوي لأنها مرتفعة ..مثل جريندلوالد او اكسالب او بيتنبيرج .
وفي حدود 20 كم عن انترلكن .
وسعرها معقول.
وكلها بدون مبالغة ..بدون مكيفات ..لأن الجو عليل بالليل .
وهذا رابط راح يفيدك :
لمن يبحث عن شقق واكواخ بسويسرا ودول أوروبا https://artravelers.com/p/re/531132
7- بالنسبة للسيارة وش الأفضل ( فيه شركة معينه ) ومتى نستلمها ومتى نسلمها ؟
نعم ..شركة سيكست في المانيا قوية جدا واسعارها رائعة ..من وجهة نظري طبعا .
ووتوجد ضريبة اذا استلمتها في المانيا وسلمتها في فرنسا ..يعني مو ذاك الشي الكبير .
وممكن تتفاداها انك تسلم السيارة بعد قضاء يومين في اليوروب بارك مدينة الالعاب ..وتطلع بالقطار الى باريس .
وممكن تشد خط الى باريس مرة واحدة بالسيارة وتسلمها لهم هناك ...مع دفع الضريبة هذه .
ادخل على موقعهم وشوف الاسعار المتاحة .
على فكرة ..الاطفال الصغار لازم لكل واحد منهم كرسي طفل خاص فيهم ..وهذه تحجزها لهم من نفس الموقع حق شركة سيكست ..في الخيارات الاضافية ..الاكسترا .
8- الميزانية الحالية من غير التذاكر المدفوعه 35 ألف ريال سعودي هل تكفي ؟
م ..لمدة عشرين يوم ..تعتمد على الفنادق والشقق اللي بتاخذها ..شوف سعرها بالاول .
والا الميزانية لكم تقريبا 200 يورو في اليوم تمشيات واكل وشرب وبنزين ..في اليوم الواحد ...تراها حسبة تقريبية ..ممكن تنقص وممكن تزود.
9- البطاقات الإئتمانية مسبقة الدفع تمشي هناك وخاصة إن أحرفها بارزه ؟
البوابة الايطالية والفرنسية والالمانية سمعوو الهواش حقنا في هذا الموضوع :
هل البطاقات مسبقة الدفع تقبلها شركات التأجير؟ https://artravelers.com/p/re/665096
الزبدة ...الرحلة معتمدة على السيارة ..فروح طلع وحدة ائتمانية ب 200 ريال ولا اقل احسن لك من البهدلة لا قالو لك ما نقبل اللي عندك اللي هي مسبقة الدفع .
وخلي الائتمانية هذه احتياط ..ابدا لا تستعملها الا في الشديد القوي .
10- متى نبدأ بحجز السكن ؟
ألحين .
ههه
لا امزح ..اقصد اذا اعتمدت المخطط خلاص وتوزيع الايام ..تبدأ بالسكن فورا ...لأن الطيب من بدري يروح .
======================
العفو اخوي ..اتمنى اكون افدتك .
واي استفسار اخر نحن حاضرين .
وبالتوفيق