الجواز لابد ان يكون متبقي له وقت السفر 6 اشهر
بالنسبة للمخطط
باريس
انترلاكن
زيلامسي
ميونخ
التنقل بالقطار
رغم اني انصحك ان تأجر سياره
شهر اغسطس حيكون هو موسم سياحي ويشهد ازدحام
لكن لما تقصد صخب المدن
اعتقد هي باريس ونوعاً ما ميونخ والباقي كله ارياف
التقدم يكون على الفيزا الفرنسية لان قدومك لها

اخوي الربيش مشكور على الرد يالغالي,,
عندي كم سؤال لسا ما حصلت لهم أجابات
لنفرض ان عدد ايام الرحلة 20 يوم ابغى تقسيم لعدد الأيام للمدن المذكوره بالأعلى
وش الأحسن اسافر من باريس لأنترلاكن بالقطار ولا بالطياره؟ كم ساعه بالقطار؟ واقرب مطار لأنترلاكن, انتو وش رأيكم
لو فكرت أستاجر سياره من انترلاكن وأسلمها في ميونخ بأخر يوم , وش رايكم؟ ولا أحسن أسلمها في زيلامسي؟
بالنسبه للسكن وش تنصحون؟ زيلامسي أو كابرون
تراني ما نزلت الموضوع الا اني ابغى مشورتكم ونصايحكم
شكرا لكم مقدماً
ودعواتكم الجميله لي

20يوم
تكون كالتالي
باريس 4ليالي
انترلاكن 4ليالي
كونستانس ليلتين
زيلامسي 5ليالي
سالزبورغ 3ليالي
ميونخ ليلتين
اذا حاب تسافر طيران
من باريس تكون على بيرن ومنها الى انترلاكن
بالقطار اعتقد ان الرحله قد تتجاوز 8 ساعات
تستأجر سياره من مطار بيرن
وتسلمها اول ماتوصل الى ميونخ
بما انك عريس عندك فندقين في زيلامسي
الجراند و سي فيلا
او كابرون اذا حاب تكون شقه مرتبة

هلا اخوي مشكور على سرعة التجاوب والرد
سويت بحث سريع وحصلت مطار brn هل هذا هو المطار الصحيح؟ لأني ما حصلت رحلات لها من باريس
لو تنقلت من باريس الى انترلاكن بالقطار ,حسب جدول الرحلات بالنت, ان الوقت من 5-8 ساعات, ومن انترلاكن استأجر سياره , وش رايكم؟
اسعار تذاكر القطار , كيف الاسعار من المحطه نفس السعر بالنت؟
في حالة اني وصلت بالقطار , مكاتب التأجير موجوده بكل مكان ولا محصوره في المطارات؟
هل يلزمني رخصة قياده دوليه؟ ولا الرخصه السعوديه تفي بالغرض
هل نظام السواقه عندهم نفس الانظمه المتعارف عليها عندنا ولا تختلف؟
المواقف هل هي متوفره بكل مكان ولا فيه صعوبه؟
هل سعر تأجير السيارات من المكاتب مباشره يختلف عن سعر الحجز بالأنترنت؟
هل يوجد ضرائب او اي رسوم للتنقل بين المدن او الدول؟
قريت في المنتدى انه فيه استكر اشتريه وصلاحيته 10 أيام , بس مدري وش سالفته؟ ياليت توضيح
اللي فهمته من الرد اللي فوق اني اذا ابغى اسكن في فندق اجلس في زيلامسي واذا شقه اتجه لكابرون؟ ارجو التوضيح
ديزني لاند-فرنسا: هل ينصح بالذهاب لها في عطلة نهاية الأسبوع(اقصد الزحمة)؟ لان وصولي ان شاء الله بيكون ويك اند , وافكر اسكن بديزني لاند
تحياتي للجميع

الرجاء المساعده يا أعضاء المنتدى
تعرفون هذا شهر عسل و أول سفره لأوربا
شكرا لكم مقدماً

ننتظر مساعدتكم بالإجابات على الأسئله اللي فوق, الله يجزاكم خير

اهلاً اخوي
ماقصر ابو سلطان اقتراحات ممتازه
برد عليك في نقاط
1- بالنسبه لمطار berne التذاكر غاليه بعد اطلاعي عليها والانسب لك من باريس الى جنيف سعرها رخيص ومكاتب التأجير متوفره
وتطلع من جنيف الى انترلاكن بالسيارة 200 كم تقريباً هذا هو الحل الانسب احسن من القطار .
الطيران اوفر في الوقت والفلوس .
2- نعم يلزمك الرخصه السعوديه والرخصه الدوليه عند استلام السيارة .
3- مااتوقع فيه حجز مباشر من مكاتب تأجير السيارات الافضل تحجز من النت وشوف من جنيف القسم السويسري ارخص ام القسم الفرنسي ارخص
القسم السويسري والقسم الفرنسي هذا لان المطار على الحدود السويسريه الفرنسيه .
4- بالنسبه للضرائب من دوله الى اخرى حسب ما رأيت من النمسا الى سويسرا فقط وعند سؤالي للموظف ليش الظرائب هذي قال ضريبه للنفق فقط
5- الاستكر ضروري
القياده في اوربا على الطرق السريعه بضريبه وضريبتها هذا الاستكر
بالتفصيل
عند وصولك سويسرا وعند استلام السيارة اسألهم عن ضريبة الطريق هل هو مشمول في الحجز ، يعني هل تشتري استكر الطريق ام مشمول في الحجز .
اذا كان غير مشمول توقف عند اي محطه واطلبه من الماركت سعر الاستكر في سويسرا 40 فرنك سويسري ويكفي لمدة سنه .
اما في النمسا اذا كان استأجارك من سويسرا ضروري تشتريه من اول محطه في النمسا
توجد انواع من الاستكر في النمسا فيه 10 ايام اتوقع الان ب 8 يورو
و اتوقع 30 يوم
وكمان سنه وكل له سعره
اختر المناسب منها .
بعد ما تأخذ الاستكر تلزقه ع الزجاج الامامي الجهه اليمنى .
6- زيلامسي توجد فندقين ع البحيرة
سي فلا
و قراند هوتيل
مناسبه للعرسان
اما كابرون تبعد عن زيلامسي 7 كم تقريباً
جميله وهادئه
وتوجد فيها شقق مناسبه
طبعاً اللي تبغاه انت فنادق او شقق .
7- دزني لاند في الويك اند زحمه الافضل تتلافاها وتبدل وقتك فيها .
تحياتي

وعليكم السلام ورحمة الله وبركاته
ماقصر مشرفنا الربيش
ومشرفنا شخص ما
الله يجزاهم خير
بكل النقاط
بس ديزني
عندكم 4 ليالي باريس الأفضل السكن في باريس بأربع الليالي
وزيارة ديزني من النهار ومرورا في أوت لت القريب منها
والعودة لباريس
ورحلة موفقة بإذن الله

اخواني: شخص ما / هدوء العالم
الحمد لله وضحتو لي امور مهمه,, لكم الشكر
الحين انا سويت جدول مبدئي وابي اخذ رأيكم,, وهو كالتالي:
الوصول الى باريس تاريخ 15 اغسطس (4 ليالي)
المغادرة بالطيران الى جنيف بتاريخ 19 اغسطس, بنفس وقت الوصول تأجير سيارة من المطار والإنطلاق الى انترلاكن (5 ليالي)
المغادرة الى زيلامسي تاريخ 24 اغسطس (5 ليالي)
المغادرة الى سالزبوغ تاريخ 29 اغسطس (2 ليالي)
المغادرة الى ميونخ تاريخ 31 اغسطس (3 ليالي) ثم المغادرة الى الوطن
مجموع الليالي 19 ليله
ابغى رأيكم بالتقسيم,,
وفيه كم سؤال
شيكت على جدول رحلات الطيران من باريس الى جنيف,, اسعار تذاكر الطيران المخفضة أغلبها مسائية, يعني سواقتي بتكون في الليل,وش رايكم الوضع عادي ولا أدفع زياده وآخذ تذكرة صباحيه؟
فيه كم سؤال بعد,,

• مواقف السيارات هل هي متوفره بالمدن اللي فوق ولا فيه صعوبه وعددهم قليل؟ اتكلم بشكل عام
• بالنسبة لسالزبورغ كمدينه,, هل تستاهل السكن فيه ولا اجيها زياره من زيلامسي أو ميونخ بدون الإقامه فيها؟
• بالنسبة للجوال,, وش انسب شركه اتصالات أشتري منها شريحة و استخدمها في تنقلاتي في اوربا؟

شكرا لكم,, واذا فيه نصايح لي لا تقصرون مع أخوكم..
تحياتي