- مساء الخيرات لكل الزقرت والزقرتيات .
السلام عليكم ورحمه الله وبركاته
مساء الخيرات لكل الزقرت والزقرتيات .
إمتداد لمواضيعي السابقة اليوم بسدح لكم موضوعي إلى القمة الأوربية اللي هي قمة Jungfraujoch
بداية الرحلة كنا في احد ايام Interlaken الصيفية واللي كانت تخلي اللي ضايقن صديره يستاسع وينبسط وألتفت على رفيقي ابو صالح قلت له وين ناوي اليوم قال ما ادري قلت شرايك في هالرحلة وما غير أأشر على لوحة معروضة وكان مكتوب فيها Jungfraujoch قال خلنا نروح نشوف والموهيم وننقز للمكتب حق مبيعات التذاكر السياحية
وندخله وتقابلنا هذيك العجيز وتقعد تشرح لنا وتشرح يا طول بالها ويا سعة صدرها حتى من حرصها قالها شايب جنبها خذوها معكم ازين لكم حسيته متورط فيها .
ونشتري التذاكر وما غير يلتفت علي ابو صالح قال يا أبو إبراهيم تراها قمة أوربية مهيب سديراوية ! قلت له وإذا قال يعني فوق فيه ثلج مهوب حميض وحصى قلت طيب فهمت نلبس بجايم وفروات يعني قال لا نستعد زين للروحة قلت له إن شاء الله.
وننطلق من محطة القطار الساعة 8 الصباح وما غير من قطار لقطار لين ما استقرينا في قطار خذنا مرة وحدة فوق.
وإحنا كل ما ارتفعنا عن الديرة اقوم وألقط لكم هذيك الصورة اللي توضح لكم إرتفاع الطريق
طبعا هذي صورة من اول ما انطلقنا
وهذي هي Interlaken منتثرة على الجبال
هذا عاد آخر صورة لنا قبل لا ندخل في الغيوم والمناظر الثلجية
بعدها دخلنا في منطقة ثلجية وغيوم ومناطق توسع الصدر
بعد ما دخلنا في النفق الجبلي ياخذ له القطار محطات توقف وتسمى بال View point
يحول الواحد وياخذ له كم صورة ويشوف الجبال الثلجية
وهذي صورة توضح لكم الطريق في وسط الجبال
وهذي صور مختلفة من أماكن ال View Point
هذي صورة من View Point خارجية
ال View Point ثنتين
وحدة من ورا القزاز
والثانية يخلونك تطلع وتصور بدون ما تلمس الثلج
وشوي ويوم وصلنا لأعلى منطقة يوصلها القطار
وبعدها نزلنا ورحنا نتمشى في الثلج لين ما طلعنا اعلى القمة
صورة متنوعة لتمشينا
وهالصورة إهداء لكل الأعضاء واقولهم بردوا على قلوبكم ووسعوا صدوركم
وبعدها طلعنا اصنصير ورقينا تقريبا إرتفاع 108 متر عشان نصير في القمة
وهذي صورة لآعلى القمة
وهذي عاد صور للي برا
هذي صورة للجرف اللهم يا كافي
وهذي عاد صورة لأرضية القمة كلن وقوة قلبه
وهذي صورة تبين لنا قوة البرد وش مسوية في الحديد
وهذي عاد تقريرينا المبسط عن روحتنا للقمة الأوربية وشوفة عينكم توتا وانتهت الحتوتا وإذا بغيتوا اي شي كل يواحد يسدح سؤاله وحنا نجاوبه .
سلمت يمينك والله يعطيك العافية
تحياتي