1. بغثكم اليوم بسوالفي وصوري بس تحملوني شوي


2. ما علينا المهم توكلت على الرحمن


3. وهذي أول صوره لأول نقطه في الطريق


4. وكان باقي على الدمام 360كم ومنتزه سعد (بكسر السين) 75كم


5. صادوه

السلام عليكم ورحمة الله وبركاته

بغثكم اليوم بسوالفي وصوري بس تحملوني شوي

بحكم عملي يتوجب علي التنقل لبعض المدن السعوديه ومن ضمنها المنطقه الشرقيه (الدمام والخبر والجبيل )
ودائماً ما تكون الرحله للشرقيه من الرياض على السياره وأحياناً أكون وحداني وأحياناً يرافقني أحد زملاء العمل اذا دعت الحاجه لتواجده طبعاً طريق الرياض الشرقيه من الطرق الواسعه والمكتمله للخدمات والجسور والمؤمن ب ( أمن الطرق ) او على قولة أهل الباديه (طرق الأمن )
المهم للي ما عنده معلومات عن الطريق .. الطريق عباره عن جزئين واحد رايح و واحد جاي وكل جزء فيه 3 مسارات .. بعضكم بيقول المعلومه معروفه للجميع .. لكن انا ذكرتها لأن المنتدى زواره من جميع دول الخليج والدول العربيه وما يعرفون عن الطريق شي
للعلم الطريق ملغم برادارات أمن الطرق وصدت لكم واحد وهم يلقط السرعه وهو متوزي
المهم آخر رحله لي كانت الأسبوع الماضي
وعادة أطلع بدري الصباح يعني على الساعه 6 او 7 الصباح عشان أوصل للشرقيه قبل الساعه 10 الصباح ويمديني أخلص شغلي
المهم كالعاده اذا جيت أطلع من الرياض أمر (dunkin donuts) وهو محل لبيع القهوه والدونات وهو على بداية الطريق بعد مخرج المطار وانت جاي مع الدائري الشمالي ومجاور لسوبرماركت العثيم
أطلع من القهوه وأخذ الحجم الكبير من القهوه يكفيني طول الطريق وكم حبة دونات..
للعلم عليهم قهوه مع الحليب تعدل الراس وتصحصح الواحد ولا الدونات ما فيه أفضل منه والشراء منه هو أفضل وسيله ل ( دعم المقاطعه للمنتجات الأمريكيه ) هذا حنا عريبيا ندعو للمقاطعه ونتسابق للشراء منهم

ما علينا المهم توكلت على الرحمن

ودعيت دعاء السفر وللي ما يعرف دعاء السفر هذا نصه (( الله أكبر، الله أكبر، الله أكبر، سُبْحانَ الَّذِي سَخَّرَ لَنَا هَذَا وَمَا كُنَّا لَهُ مُقْرِنِينَ* وَإِنَّا إِلَى رَبِّنَا لَمُنقَلِبُونَ، اللهم إنا نسألك في سفرنا هذا البرّ والتقوى، ومن العمل ما ترضى، اللهم هوِّن علينا سفرنا هذا واطوِ عنا بعده، اللهم أنت الصاحب في السفر والخليفة في الأهل، اللهم إني أعوذ بك من وعثاء السفر وكآبة المنظر وسوء المنقَلَب في المال والأهل )) واذا رجع من السفر يذكر نفس الدعاء ويزيد عليها (( آيبون، تائبون، عابدون، لربنا حامدون ))
مسكت الطريق للشرقيه

وهذي أول صوره لأول نقطه في الطريق

وكان باقي على الدمام 360كم ومنتزه سعد (بكسر السين) 75كم

ماشي ومثبت السرعه على 130 كم في الساعه بس لازم الواحد ينتبه لان الرادار لو صادك وانت بهالسرعه بتاخذ مخالفه بقيمة 150 ريال لأن السرعه القصوى 120كم/الساعه .. مع اني أشوف انهم المفروض يزيدونها شوي لأن سرعة 120كم جداً بطيئه يعني يخلون السرعه القصوى 130كم كويس
المهم كان فيه سيارة أمن طرق ومتوزي ورى تريلا عطلانه ويصيد المسرعين بس في الجهه الثانيه ولقطته لكم

صادوه

المهم أستمريت في الطريق والحمدلله كل شي تمام ولما قطعت نصف المسافه وقفت في محطة بنزين أعبي بنزين لأني ناسي أعبي بنزين في أول الطريق وقلت منها أشتري مويه (ماء )
المهم طلعت ومسكت الطريق ومن بعد ما تتجاوز مسافة 250 كم تكثر الألغام في الطريق (ردارات أمن الطرق ) ولازم تهدي او تكون على سرعتك بس تنتبه للطريق وتهدي عند الجسور والترسلات المتوقفه لأنهم يتخفون وراها الحمدلله الأمور تمام حتى وصلت لنهاية الطريق والمفرق .. بعد كذا الطريق ينقسم إلى جزئين يمين ( الظهران و الخبر ودولة البحرين ) ويسار ( الدمام والخفجي والجبيل ودولة الكويت )
طبعاً انا رحت يمين ومشيت مسافه توصل إلى 30 كم حتى وصلت لمدينة الخبر حيث المكان الذي أريده
أنتهى الجزء الأول
للعلم الصور ملتقطه من عدة رحلات للشرقيه