اللهم صلي عليك يا رسول الله .
الحمدلله على سلامتك يا صديقي وحبيب البي العضو الجديد
اموت بالسفر واخونا ابو محمد جزاه الله خير يستاهل
كل خير وان شاء الله تعالى رحلتي القادمة ماخذها من عنده
يستاهل والله ابو محمد وخلونا والله نكسب ابن ديننا وبلدنا .
ولا تنسون ابوغدي تراه مننا وفينا بعد
كلامك جميل وشاعري ماسوينا الا الواجب حبيب البي
وسلمك ربي على كلامك الجميل وترانا ما نستغني عنك حبيب البي
انا ودي استفيد من خبرتك ...من بين المناطق اللي زرتها وش هي
المنطقة اللي اخذت عقلك متوقع راح تقول كاميرون حرقتها
طيب خبرنا ليه حبيب البي ؟
وخبرنا عن فنادقك ورأيك بكل صراحة فيها وهذه راح تفيد الكثير .
سلمك ربي اخوي اموت بالسفر ونورت منتداك من جديد
ولك تحياتي وتقديري والسلام عليكم

1. اشكرك اخوي الشعيبي على اطلالتك وتواضعك الطيب ...

اشكرك اخوي الشعيبي على اطلالتك وتواضعك الطيب ...

بالنسبة لاجمل مارأيت في ماليزيا( طبعا بشكل خاص ) والا ماليزيا معظمها جميل هي ولاية مثل ماقلت ( كاميرون هاي لاند ) وانا بصراحه اخذت في اكواتوريال وهو فندق جميل وروعه وخمسة نجوم وفي اعلى الجبل واطلالته حلوه ومرافقه جميله وانا ندمت يوم حجزت بس ليلتين وتمنيت اني جلست عشر ليالي ( بس عشان الجو والمناظر ) اللي تفتح نفسك وشهيتك وكل شيء ... آآآآآآآآآآآه ياالكميرون .
بالنسبة للفندق في لنكاوي ( لنكاوي لاقون ) فندق فخم وجميل ورائع بس تأذيت من الناموس ( لكن عندهم داخل الغرف الدواء حق البعوض ) لكن مو مشكله في سبيل حلاوة الفندق . ولنكاوي تعرفونه عاد ...
اما بينانق فأخذت في فندق ( بي فيو بيتش ) وهو كمان فندق حلوو وجميل والعرب فيه ( تو متش ) يمكن 80% من سكانه عرب ... وعاد بينانق تعرفونها وحلاوته ولو انها صارت لي مواقف فيها الله لايوريكم ( بس حلوه )
اما العاصمه الحبيبه فأخذت بفندق الخيول الذهبيه ( سويت ) طبعا كل هذا لوحدي ( احب ادلع نفسي ) ههه (قولوا ماشاء الله ) فندق طبعا فخم وتغيير عن الفنادق المعتاده ( لايجيني واحد الحين يقولي والله فرشه مو زين والله الغرفه مو نظيفه ) هذا مايعني انك تحكم على ان الفندق او القصر مو حلو لان اللي مونظيف دقيقتين ( والهاوس كيبينج جاي) وهذا اصلا نادر جدا ( وانتم تعرفون هذا القصر مين يسكنه )
واخذت في حبيب قلب الشعيبي (فندق بان بسفيك ) طبعا فندق حلو وجميل وراقي وراح اخذ فيه مره ثانيه (ان اعطاني الله عمر ) وامامه محطة قطار ومجمع سوق (ذا مول ) ولو انهم خربوها معاي اخر شيء ( لكن ان شاء الله بعذر ) ولااحد يغسل عندهم ( تراهم غالين جدا ) وانا جربت وسألو الشعيبي بعد ...
واخذت كمان في ( جي دبليو ماريوت ) وهو فندق غني عن التعريف اذ ان اغلبيت اعضاء المنتدى اللي سافروا ماليزيا سكنوا فيه فهو فندق جمع كل شي ( رقي الفندق وملحقاته ) موقعه الاستراتيجي ( يمكن ماتحتاج لتكسي طول سفرتك ) وسعره المناسب ( ولو انه كانت فيه بعض الترميمات مادري وشي لكن ماحسيت )
واذا فيه شيء ناقص قولو لي ( اما عن اسعار التكاسي فهي مناسبة جدا ) وعن اسعار المطاعم في ارخص من عندنا بالسعوديه يمكن بعض الوجبات بسبعة ريال الى خمسة ريال ... اما عن جودت المطاعم العربية هناك فأنا عندي ملاحظه للي يذم وسب الاكل
يأخي الغالي انت مسافر للبنان او سوريا او بلد عربيه ( اكيد بتقول لا طبعا ) طيب انت تطلب حاجه شبه مستحيله فإذا دخلت مطعم عربي ووجدت الاكل مو لهذي الدرجه فهذا الاصل ,,, ياخي لاحق على الأكل العربي والسعودي جرب ياخي والله ياشباب احنا تنقصنا روح المغامره ياخي جربت انا الاكل الماليزي وانهبلت عليه ( وبعدين الاكل الماليزي اصناف وانواع مو تاكل صنف واحد وتقول سبحان الله مادري كيف يتلذذون بأكلهم ) وبعدين على فكره انا دخلت مطعم ( الطربوش ومطعم خيمة الصحراء ) وكل اكلهم لذيذ جدا وماتلاقيلك مكان كمان ( لكن السعر زياده شوي )
ومشكورين..

السلام عليكم..
الف الحمد لله على سلامتك أخي العزيز..
فعلاُ ماليزيا جميلة جدا..استغرب من سب البعض لها..
والمشكله لاتزال ولا نزال نعاني منه كثيرا الا وهي مشكلة ( التعميم ) فإذا حصل لشخص موقف مو طيب بنا على هذا الموقف سوء الدوله التي سافر لها وو الخ ( فنحن لانقول ان ماليزيا كامله مافيها عيب هذا مستحيل في جميع الدول والبشر قبل ذلك )
كلامك صح 100%..
ويكفيك انها بلاد مسلمة..والله انهبلت يوم رحت هناك..مساجد وتسمع الأذان..وكلمة ((حلال)) في كل مكان..هذا غير روعة وطيب اخلاق الماليزين معاك..
حبينا ماليزيا..وانشالله ناوين نكرر السفرة السنة الجاية..((متى ربي يجيب الصيف الجاي))
وانشالله سوف اقوم بكتابة موضوع عن تفاصيل رحتلنا..كرد جميل لهالمنتدى الرائع..
الف شكر لك اخي العزيز على موضوعك..

السلام عليكم ورحمة الله وبركاته
الحمد لله على السلامة ... وسفرة سعيدة بأذن الله ..
فهد©

الحمد لله على السلامه....وان شاء الله انها كانت رحله موفقه.

الحمدلله على سلامتك أخوي
في الحقيقة رغم أني رحت ماليزيا عام 2002م ورغم أني أنبسط هناك واجد إلا أني بدأت أغير فكرتي عنها من كثر ما أسمع من سب وحش لها من بعض الشباب، حتى أن واحد من أصحابي أراد السفر لها فقلت له انتظر لأني أسمع حش عنها. ولكن كلامك هنا بدأ يرجع لي الصورة الجميلة عن ماليزيا.
وشكرا

الحمد لله على سلامتك أخي الغالي ،،،
وكل يوم نزداد ثقةً بأخانا أبو محمد الشتيوي فوالله إن هذا الأمر يثلج صدورنا ويسعدنا أن انبسطت واستانست وننتظر الصور وانطباعاتك عن كل منطقة وتقييمك لها ،،،

1000 شكر لكم ياأخواتي وأخواني على ردودكم الرائعه وصدق من قال ان هذا المنتدى العضو فيه يحس انه بين اهله واخوانه ...

الحمد لله على سلامتك أخي أموت بالسفر
و الحمد لله انك استمتعت بماليزيا ,
و أشكرك الي افدتنا باسم فندق الكاميرون لأنه خانة فندق الكاميرون عندى فاضيه نوعا ما.:rolleyes:
فاغلب الاخوه جزاهم الله خير كانوا يعيبون على الكاميرون قلة فنادقها ذات الخمس نجوم .
وبالمناسبة اقول لكل من ذهب لماليزيا و استمتع الحمد لله على فضله و عليكم بالعافية و ان شاء الله تتكرر.
و أما من سافر لها و لم تكن رحلته بمستوي الطموح نسأل الله ان يعوضه بسفره أخري افضل من سابقتها فنحن جربنا الأمر مع بعض البلاد فتكرار السفر لذات البلاد يجعل الفرد منا يستجمع الايجابيات و يركز عليها و يحرص على تفادى السلبيات الي واجهته في المره الاولي بل ربما يحولها إلي ايجابيات لتحصل معها المتعه .
ويظل السفر توافيق من الله كما غيره من الأمور في حياتنا .
تحياتي .................