1. أولاً : بيننق وماأدراك مابيننق.


2. كوالالمبور


3. جنتنق

في البداية أحب أن أعرض النقاط التي يجب الحذر منها والتي حصلت لي شخصياً

أولاً : بيننق وماأدراك مابيننق.

المدينة أقل مايقال عنها أنها بايخه وماأنصح بالجلوس فيها أكثر من يومين لعدة أسباب:
1. أشغلونا بعض الاخوان في المنتدى بشارع باتو فرنجي ،، ياأخوان ترى الشارع اقل مايقال عنه أنه بايخ جداً وفقير ،، وبالنسبة للصينين اللي يبسطون بعد المغرب ،، صدقوني كل بضايعهم سيئة ورديئة وغالية جداً (زرف عينك عينك) أنا ماأنصح نهائياً بالشراء منه ( ماعدا أفلام الدي في دي )، وتبون الصدق أنا أنصح بالسكن بعيد عن هالشارع عشان تحس أنك مسافر ،، لانك وسط هالشارع بتحس أنك في البطحاء ،، عمالة عشوائية وبضائع مقلدة رديئة جداً وثلاثة أرباع اللي في السوق هم ربعنا صايرين أكثر من الصينيين ويشترون وكأنهم جايين من كوكب آخر مافيه أسواق ،، والله أن البطحاء والمرقب (خصوصاً في الشنط المقلدة) أحسن ألف مرة.
2. بالنسبة للألعاب المائية أنا أحذر وأحذر وأحذر من الوتر سبورت اللي في فندق الهوليدي إن لانه صار معي موقف مع الشخص الصيني المشرف والطوفرية اللي معاه (قصدي البنت الصينية) على الالعاب المائية (البراشوت والجتسكي والبنانا) بعدين احكيه لكم.
3. البلد حارة جداً والرطوبة فيها شي غير طبيعي ،، الظهر إذا طلعت في الشمس لأي سبب ،، صدقني راح تندم وتقول ياحليل الرياض.
4. أحذروا من مزرعة الفواكة والدوريان ،، مزرعة الفواكة دخول الشخص ب20 أول ماتدخلون يودونكم للماركت اللي كله مانقا وبطيخ وخوخ وبعدين يودونكم بالباص للمزرعة فوق وصدقوني ماراح تلقون ولا نوع فاكهة كله كلام فاضي و راح يذوقونكم ثمار غريبة ،، وبعدين ينزلونكم للماركت عشان تشترون (على فكرة الجو خانق جداً )، أما Durian كانك بايع عمرك كله الله يديم النعمة رائحة عفنه وطعم مخيس كنه بصل خربان.
5. بوكيت ميرا إذا ماكان معك بزران أنصحك لاتروح ،، أنا رحت من بينانق لبوكيت ميرا بمبلغ 280 للتاكسي وبعدين التذكرة بحوالي 19 رينقت للشخص أو 35 شاملة الالعاب المائية وراح تركب قارب يوديك لجزيرة القرود اللي هي مقفلة وبعدين تنتظر لين يجي البوت وياخذك ثاني مرة وتروح للملاهي. اللي ماهو راعي سباحة لايروح نصيحة.
6. المناظر اللي تشوفها في مسبح الفندق تشمئز منها.
7. لاتروحون لمزرعة الفراشات لانها كلام فاضي وخرابيط.
8. أسعار التكاسي غالية.
9. أحذرو من الصينين اللي محتلين بينانق ،، شعب قذر جداً ومعاملة أقذر ،، تعاملوا مع الهنود أرحم وأحسن.
0- بعض الاخوان المتزوجين حديثاً (Honey moon) تصرفاتهم عجيبة؟.
1- يعني لاتروح الا يومين عن قولة أنك مارحت لبينانق.
كاميرون هاي لاند:
البلد يجنن بصراحة أحس انه قطعة من الجنة وهادية وأهلها كويسين بس أنا بقول الملاحظات:
1- لازم تقوم بدري وتنام بدري ،، لانه بعد المغرب البلد كل سنة وأنت طيب،، ماتلقى أحد ،، تصدقون حتى الروم سيرفس في الفندق يقفل تسع ونصف؟؟
2- هي عبارة عن مجموعة قرى كل قرية تبعد ثلاثة كيلو تقريباً عن الثانية ،، مما يضطرك أنك تاخذ تكاسي ،، التكاسي رخيصة بس المشكلة في الليل حتى التكاسي مستحيل تلقاها؟؟
3- في المنتدى أشغلونا بفندق الليك هاوس ،، والبحيرة اللي هو عليها ،، وياليتك تشوف هالليك (البحيرة) البحيرة كلها طين ،، تصدقون لونها بني مقرف. وبعيد جداً جداً عن أقرب قرية له. يعني لو أشتهيت عشاء من براء ،، بتخيس لين تروح.

كوالالمبور

كوالا المدينة اللي لازم نقف لها إحتراماً لانها من لاشي صارت شي يعني بلد مافيه ذيك الموارد طلعت من المدن المشهورة عالمياً ،، بس برضه أنا بعرض الملاحظات:
1. ألاسواق أو مايسمى بالشوبنق ،، المدام كانت مخططة أنها بتسوي بلاوي في الشراء ،، لكن ولله الحمد والمنّه ماعجبها ولالقت شي إلا الجزم أعزكم الله ( تخيلوا ثلاثين جوز يعني ستين فردة) وباقي الاشياء أغلى من عندنا وأقل من عادية (أسواق الرياض وبضائعها أحلى)
2. China Town الحي الصيني اللي أزعجونا فيه وبأسعاره وببضايعة المقلدة ......... تدرون وش هالحي الصيني؟؟ ممر بين محلات طوله حوالي خمس مائة متر تقريباً والصينين باسطين يمين ويسار وهذا يعرض ساعات وهذا يعرض جلديات زي وجيههم والبضايع اللي تشوفها بأول بسطة هي اللي تلقاها بأخر بسطة ،،، والاسعار ،،، كلمني عن الآسعار ..... هبال ،، واللي سبب هالشي هم أحنا يالخليجيين اللي من يقول الصيني السعر تلقى الحرمة شرتها ،، والمشكلة أنها كلها تقليد وتقليد سيء درجة صفر .. ياعالم أنتبهو .
3. المطاعم العربية وبالذات مطعم الريان حذاري ياأخوان أنا كلت منه أنا والمدام ويومين الله وكيلكم وبطونا توجعنا ( طلبنا نصف دجاجة وعلبة حمص وواحد مشوي مشكل عبارة عن قطعتين لحمة وقطعتين دجاج وسيخ كباب الله يديم النعمة تخيلوا السعر ب 90 رينقت؟) وحاطين أردني بلحية عشان يجذبنا أحنا يالخليجيين ،،، مدري هالعالم إلى متى وهم مستغفلينا؟؟؟؟ أحلى المطاعم عندهم هي ناندوز وبلانيت هوليود وبي بي كيو اللي في بوكيت بنتنانق وتشيلز في الكي ال سي سي ، والمطاعم العربية هناك أسحب عليها.
4. أسعار العود (البخور) ودهن العود خرافية ، لأن إخوانا وحبايبنا الخليجيين كما أسلفت سابقاً يجون للبلد وكأنهم ماقد شافوا محلات أوكأن مافيه بضائع عندهم؟ اسعار البخور خيالية ونوعية بايخه إن لم تكن نوعية خايسة.
5. أحذروا من المصانع ( مصنع الجلديات ، ومصنع الخلاقين (الأقمشة) ، ومصنع الشكولاته ، ومصنع الساعات) كله كلام فاضي ونصب أنا رحت بعد إلحاح من صاحب التكسي اللي الظاهر يبي ياخذ نسبته من هالمصانع ، ورحت ولقيت أخونا الخليجيين طايحين في الشراء ،، جيت أبشتري محفظة وجابت الجلد اللي مصنوع منه هالمحفظة وقالت طبيعي وولعت فيه بالولاعة ،، أنا أخذت المحفظة وقلت ولعي فيها وأنا بشتريها ،، طبعاً رفضت وهي تتبسم وأنا طلعت وعرفت أن الدعوى كلها زرف وهبال.
6. السينما ،، أنسى أنك تفكر تروح للسينما بسبب الزحمة الخطيرة جداً ،، يعني تحس ان الماليزيين والصينيين يدخلون السوق عشان السينما ،، ماتلقى لك موطئ رجل.

جنتنق

أعتب على الاخوة في المنتدى لانهم يقولون أن جنتق ماتساهل أن الواحد ينام فيها ،، وأنا أقول تصدقون أني متحسف أني ماجلست فيها يومين؟؟ بسبب أني حجزت الفنادق بناءاً على كلام الاخوان بالترتيب اللي اقترحوه علي ،، وطبعاً الاخوان ماحطوا جنتنق في اللستة على اساس انها ماتستاهل ،، تصدقون أني أنبسطت فيها وتمنيت أني نمت فيها لو على الاقل يوم؟ الجو خيالي ورائع (برد) ومطر وضباب ،، وناس رايحة وناس جاية ،، أنواع الفّلة .
والسلام عليكم ،، وانتظرو موضوعي الثاني اللي موثق فيه بالصور بعض من مشاهداتي في ماليزيا..