- اسرد لكم تجربتي على شكل خواطر وذكريات و اتمنى تجد عندكم القبول:
السلام عليكم ورحمة الله وبركاته
تحية طيبة لاعضاء هذا المنتدى الكبير اللي استفدت من مواضيعه الشي الكثير في رحلتي الى اندونيسيا للمره الاولى في شهر يوليو 2008
فكرت كيف كان وضعي لو ما دخلت وقريت تجاربكم الثريه... بكل بساطه كنت وقعت فريسه !
لهذا السبب من الواجب رد جزء من الجميل بالكتابه عن تجربتي ولو انها متأخره شهرين لكن تعذروني انشغلت!
و بكل صراحه ان اكبر فائده حصلت عليها من المنتدى كانت من النصائح المكتوبه... بمعنى ان الصور لم تكن ذات فائده جوهريه لي شخصيا مع انها تضيف جمالا للموضوع بلاشك. يعني بالعربي ماعندي صور! اعذروني والبوابه مليانه تصاوير.....
اسرد لكم تجربتي على شكل خواطر وذكريات و اتمنى تجد عندكم القبول:
1.سافر مع شخص تثق فيه وحاول ما تسافر وحدك. انا سافرت مع شخص قريب لي وكانت المره الاولى اللي اسافر معه وان شاء الله ماتكون الاخيره. ونعم الصاحب.
2.ان كنت موظف مثلي اتفق مع رئيسك في العمل على موعد اجازتك السنويه ثم احرص على اختيار ناقل جوي من وقت مبكر وكذالك الفنادق احجزها بالنت من بدري. تجنب قدر الامكان اوقات الصيف الا اذا اضطريت تاخذ الاولاد خلال اجازتهم . خلال الصيف جميع الاسعار تتضاعف مرتين او ثلاث. تاكد من خط سير الرحلة مع عدد مرات التوقف ومدة الترانزيت في كل وقفه فهذه النقطه مهمه جدا لراحتك . بعض الناس ماعليه لو تطير الطياره وتنزل 3 مرات الين يوصل جاكرتا لكن الغالبيه يفضلها دايركت . بعض مكاتب السفر لايطلعك على هذه التفاصيل الا بعد ان تكون دفعت وهنا تجي الصدمه! سافرت مع قريبي على الاماراتيه وتوقفنا في سريلانكا ساعه وبعدها في سنغافوره نزلنا من الطياره ساعه للتفتيش . بصراحه كانت متعبه حيل. ملاحظه هامه: لا تحمل معك اي قاروره او علبه فيها مواد سائلة او شبه سائله مثل العطر او الشامبو او الجل او غيرها اذا كانت العبوة اكثر من 100 مل لانه لن يسمح لك بالصعود للطائره بها مره اخرى! ولاتحاول تجادل الموظف فهو او هي لن تسمح لك بالمرور بها. طيب و الحل ؟ اشحنها مع الشنطه الكبيره من البدايه. او احمل معك عبوات صغيره 50 مل. شفت بعض الناس في مطار سنغافوره كتعبير عن عدم الرضى يفرغون العبوات من محتواها او يكسرون العطر حتى لايستفيد منه موظفوا الجمارك!
3.البس ولاتبالغ .شفت اشخاص خليجيين ما بين مبالغ في لبسه ومظهره يلفت انظار ضعاف النفوس . وشفت اشخاص على العكس تشوفه تقول فقير من سوء شكله وهندامه . يازين الوسط.
4.عند الوصول لجاكرتا والانتهاء من اجراءات التأشيره والجوازات والخروج من مبنى المطار الدولي , اتجه لمبنى المطار الداخلي القريب اما مشيا على الاقدام او باستخدام التاكسي الرسمي بالعداد. احجز على اقرب طياره على جزيره بالي.لاتعطي وجه للاندونيسين اللي بتشوفهم يتحاذفون عليك من اليمين ومن اليسار وانت ماشي واللي يبي يسحب الشنطه عنك وبيعك شريحه جوال وغيرها من الخدمات. بالنسبه لي فكره الاستماع للايبود خلال الفتره ذي مفيده جدا لصرف الفضوليين الى ضحايا اخرين! على فكره ان تكون بارد الاعصاب وغير مبالي او حتى عبيط في هذا البلد تعتبر فكره جيده قرأتها في هذا المنتدى وطبقتها بالحرف الواحد!
5.اذا اظطريت تنتظر في جاكرتا على بال ما يجي موعد رحلتك الداخليه وش تسوي؟ العاصمه ممله فانصحك تروح الحديقه المائيه "الووتر بوم" . طبعا مستواها اقل من ال"وايلدوادي" في دبي لكن الجود بالموجود.
6.تاكسي البلوبيرد اكثر احترافيه واوفر من اي سائق خاص. اذا عندك اسماء الفنادق والاماكن السياحيه في البلد من المنتدى ليش تاخذ السائق الخاص؟ لكن احذر من سائق البلو بيرد صاحب العداد العطلان ! لانه نصاب رسمي! اذا العداد عطلان لاتركب معه وهذي صارت لنا مرتين في باندونق. اغلب السائقين لايتكلمون الا الاندونيسيه فقد تضطر لاستخدام لغه الاشاره او قد تحتاج ان تكتب لك موظفه الاستقبال بالفندق اسماء الاماكن وبعض العبارات العامه مثل " انتظر هنا" " اذهب ل" في ورقه تاخذها وتوريها الجنط اذا مافهم عليك . التعامل مع موظفات الفندق وليس الموظفين بكل امانه خدومات ومبتسمات ولاينتظرون اكراميه. همهم ان يكون السائح مرتاح وراضي.
7.منطقه الجبل بونشاك ومنطقه شاباناس الافضل من ناحيه الطبيعه والاسوأ من ناحيه الخدمات. في الليل تتحول الى مناطق موحشه ومزعجه باصوات الدبابات. ما تعجبني مظاهر" التدييت" مع الاندونيسيات والشراب وهذا النوع من السياحه ما يناسبني . قضيت ليله واحده فقط في هذه المنطقه ولا انصح بها الا لهواة الطيران بالباراشوت او محبي السفاري. مستوى نظافه الفلل اللي شفتها مقبول لكن غاليه بشكل غير مبرر واكثر من الاسعار اللي ذكرت بالمنتدى
8.جزيره بالي هي اختصار لكل ما تتخيله في اندونيسيا باستثناء المياه الكبيريتيه الحاره في شياتر باندونق. بالي جميله جدا ومهيأه للسياح بفنادقها الاقتصاديه ومطاعمها " الكاجوال" الشبيهه بتشيليز وابل بيز وفرايديز . الانهار و تجربه الرافتتق او التجديف في القارب المطاطي جميل جدا وذكرى لاتنسى والشواطئ (وخاصه شاطي دريم لاند في نوسادوا بامواجه العاتيه والاجانب اللي على بالهم في هاواي يحاولون ركوب الامواج !) والالعاب البحريه موجوده لكن دائما يجب عليك المفاصله في السعر بشكل جنوني فلو عرض عليك مظله على البحر ب100 الف روبيه لمده ساعه اطلبها ب20 الف لمده 4 ساعات وصدقني راح يوافق ! طبعا هذي من بركات المنتدى وانا هنا اعيد واكرر. انتبه من بائعي الحشيش لانه يباع في الشوارع وعند الاشارات السيجاره بالف روبيه ! بالعربي عشان المحشش يفهم سجارتين ريال يالحبيب . لا انصح بالهوت سبرينق " المياه الكبريتيه " في بالي لانها بارده على عكس شياتر. السواق الخاص ضيع علينا تقريبا يوم كامل في مشوار الى الينابيع الحاره وفي الاخير لا حاره ولاهم يحزنون. احذر من ال"بنقي جمبنق" وهو القفز من ارتفاع 40 متر في بركه 5 امتار و رجلك معلقه بحبل. لعبه غير مأمونه ابدا. تجربه الغوص في شاطئ نوسادوا لاتستحق المبلغ المدفوع لسببين: اولا عمق المياه 6 متر فقط وثانيا درجه صفاء المياه رديئه نسبيا ( مدى الرؤيه 15-20 متر تقريبا)..... لا مكان يعدل البحر الاحمر للي يبي يغوص.
9.محلات المساج الباليني منتشره في شارع ليقيان في كوتا بالي وهي محترفه ورخيصه. جربت مساج لشخص اندونيسي ساعه كامله تدليك من الركب الى ابهام الرجل بمايعادل 20 ريال سعودي "50 الف روبيه" وزياده على هذا كوب من الشاي او القهوة او الزنجبيل حسب اختيارك مع ابتسامه وطيب خاطر. كان هذا في اخر ليله لي في بالي ولولا اني حاجز طياره اليوم الثاني كان رجعت للشخص نفسه أسوي مساج كامل للجسم. من تجربه شخصيه, تدليك الرجل للرجل افضل واكثر اتقانا من تدليك المرأه للرجل حتى من ناحيه احترافيه بحته.
0-"لو اسقبلت من امري مااستدبرت " لاستخدمت التنقل من المطار الى باندونق مباشره عن طريق محطه القطارات وباستخدام الباص. تذكره الباص 20 الف من المحطه الى المطار اوبالعكس وهو نظيف وجديد . تذكره القطار من جاكرتا الى باندونق او بالعكس 35 الف على درجه رجال الاعمال (الاكسيكيوتف) . افضل بكثير من التاكسي الخاص الذي يكلف مليون روبيه لنفس المسافه!
1-احرص على ان تاخذ معك شيئين للتسليه والاسترخاء : ايبود وكتاب. ستواجه اوقات انتظار سواء في المطارات او في الفندق
2-منتجع المياه الكبريتيه الحاره في شياتر باندونق جميل ويستحق اكثر من زياره وسعر التذكره 14 الف فقط وافضل وقت هو بعد الغروب عندما يبرد الجو ويقل عدد الزوار! جهز نفسك بملابس وشامبو لحمام حار واستغرب من الاخوة اللي جاي المنتجع بالثوب!
3-سكنا في فندق جراند برينقر في باندونق 5 نجوم وبوفيه الفطور الصباحي عنده الذ واطعم من اي فطور جربته في فنادقنا! اذكرها للامانه
4-شارع تجاري في باندونق لو ماجيته يكون فات عليك مكان حلو لا اذكر اسم الشارع لكن اذكر اسم مجمع فيه اسمه "بريميير مول". في الشارع المذكور يوجد شارع فرعي ممنوع دخول السيارات ولا الدبابات, فقط للمشاه وفيه محلات راقيه جدا وكافيهات ولاراح تصدق انك في اندونيسيا.
5-الحمد لله الجو كان معتدل طول مده اقامتنا في اندونيسيا من اخر يوليو و لحوالي اسبوعين, لكن الامطار ولاقطره نزلت من مايو الين مشينا. حتى كان واضح الجفاف على منسوب المياه في الانهار . وبعض الانهار الصغيره جفت. ما ادري اذا هذا الشي طبيعي او لا لكن ذكرته للي يهمهم جو الامطار.
6-ما واجهتنا اي مشكلة في الاكل ولله الحمد كل شي متوفر في كل المناطق الثلاثه اللي زرناها (باستثناء الجبل بونشاك) ولا احتجنا عزبه ولا طبخ ولا شغاله. ولا صار لنا حالات تسمم .
هذا اللي اذكره الان من رحلتي قبل شهرين
في الاخير عندي لكم سر
اول ما وصلت السعوديه
دخلت على النت
وحجزت تذكره الدمام جاكرتا الدمام شهر مايو 2009 ودفعت قيمتها
تتوقعون اني مفتون؟ الله يستر
لكم كل الود والتقدير
ابو ديما
