مداخله بسيطه بعد اذن اخواننا
لو حبيت تتاكد ان المعيشه غاليه في قطر
ومالك رغبه تروح تتاكد او تحس المسافه بعيده
روح للاحساء ( اقرب منطقه لقطر ) وبتشوف كيف المعيشه في قطر غاليه !!
معيشتهم مرتفعه وساهموا ايضا في رفع اسعار السلع بالاحساء
تعرف كيف !
لما نطلع للسوق بخاصه سوق النساء (السويق )
المكاسره طبيعيه كما هو معروف
ولكن هالسنوات الرد جاهز ومعلب من قبل الباعه وبكل غطرسه
تبون تشترونه بهالسعر والا خلوه يأخذونه القطريين !!
وعلما ان الاسعار مدبله للقطريين واغلبهم ياخذ بدون مكاسره بعد
هذا صار شي طبيعي تسمعه في اي من المحلات
تخيل
وعلى طريق سلوى ترى اغلب السيارات القطريه محمله بالمؤنه
والسلع على مدار الساعه
ربي يهنيهم بزيادة حقتهم بس المفروض كانت تشملنا
بالشرقيه معهم
وبرضوا ياريت انها تشمل القطاعات الخاصه عندهم مساكين هم اللي ماكلينها
وودي اعرف كم سعر السن توب عندكم يا اهل قطر صراحه؟

لاني اشوف اغلب السيارات القطريه تشوف شايلين سن توب معهم

صباح الخير
ماعندي الخلفية الجيدة رغم روحاتي للحسا 3-4 مرات في السنة تقريبا.. باحاول افيدك باللي اعرفه
المطاعم العادية الشعبية ومطاعم الاكلات السريعة في الحسا ارخص تقريبا 25% وخصوصا العيش ما شاء الله متوفر واجود في اي مكان هناك
في الدوحة الفنادق خمس نجوم غالية مقارنة بدبي تقريبا دبل السعر والسبب قلتها وعدم توافرها والاربع نجوم ايضا اغلى لكن بنسبة اقل
مواد التموين من الجمعيات تقريبا نفس السعر ..تفرق في بعض اغراض الجملة ولذلك تشوف القطريين شاريين اغراض بالجملة فهنا ممكن في فرق جيد يستاهل الروحة
الملابس : التشكيلات في الحسا مثلا اكثر والخيارات متنوعة هذا سبب للتسوق والاسعار ارخص ممكن ب 25-%50وخصوصا الاغراض النسائية
قطع غيار السيارت فيها فرق كبير ممكن في قطر دبل السعر وايضا يقال ذلك عن دبي
مواد البناء ارخص في السعودية والاثاث ايضا
الهواتف والكهرباء طبعا برسوم اعلى قليلا من السعودية..الكهرباء لمنازل القطريين مجانية
ملاحظة السن توب الصراحة مادري كم سعره البارحة ماخذ كرتون عصير راني من الجمعية وسعره 18 ريال ..اتوقع نفس سعر السن توب

انا اشووف ان الاشيااء الاستهلاكيه بقطر ارخص من السعوديه كالرز والدقييق الله يطوول بعمر اميرنا بو مشعل . اللي يقولون ان المعيشة غااليه هم اللي يدفعون ايجارات للشقق والفلل لان الايجارات مرتفعه شوي عن دول الخليج بالنسبه للقطري ما عنده مشكله الحكومه تعطيه ارض وبيت وكهربا وماء مجااني الله يحفظ اميرنا بو مشعل امين يارب .

الله يخلي لكم ابو مشعل ويخلي لنا ابو متعب . . . انا من سكان االاحساء واتفق مع اخوي اللي يتكلم عن الحسا صراحة الاسعار عندنا غالية في الاسواق وكلها من اخوننا القطرين لانهم يشتروو باي سعرر حتى ما يكاسرر فبكذا رافعين الاسعار علينا . . . على العموم الاسعار في الشرقيه بشكل عام مرتفعه اشوي عشان الشركات فيها كثيررة ولكن عندنا في الاحساء بشكل اووضح في الاسواق . . .

الله يهنيكم بالزياده
والله يحفظكم من شرها

اكييد احنا اغلى منكم في كل شي البيبسي بريال ونص في البقالات والجمعيات اما المطاعم اذا كانت عاديه فاست فوود بثلاثة ريال للصغير والوسط باربع والكبير خمس وبعض المطاعم بست والمطاعم الفخمة البيبسي ب12 او 16 ودايما يكون في حجم واحد بس
والزيت على حسب الماركة في ب22 وفي 28 يعني يمكن اغلى واحد 35
الارز عندنا غالي لاكن مادري كم سعرره
المطاعم الفاست فوود مثل اسعاركم الفرق ريال ريالين
والمطاعم الفخمه اذا 3 اشخاص وكل واحد طالب وجبه على الميتين وثمانين

noora-404
المواد الاساسيه مدعومه من الدوله ومخفضة للمواطن مثل الارز والزيت والحليب

هل أستطيع القول
إن السعوديين سبب أرتفاع أسعار السيارات المستعملة في قطر
والله الانسان حر يتسوق من وين ماحب ومتى حب
ناس تتسوق في السعودية وناس في أوربا وشرق أسياوالأمارات والكويت ولبنان
وناس تستورد الخضار والفاكة من الخارج ( قم بزيارة لمنطقة الشحن في مطار الدوحة وسوف تشاهدالحوم والطيور و فواكه لاتعرف أسمها)
أما الفرق بين الحسا والدوحة في الأسعار
من سنة إستأجرة مزرعة في الحسا من مساء الخميس الى مساء السبت
( لا أنصح بها)
أشتريت التموين من محلات ( بندة) أفتكر أسعارهم ثابته للغريب والقريب
نفس المواد في ( الميرة) أرخص
مره كنت في الطريق من الرياض صار عندي تهريب زيت الفرامل
مريت صناعية الحسا قال لي الميكانيكي موزع الزيت محتاج تبديل
رحت الوكاله قال نطلبه من الدمام وبكره تستلمه وسعره كذا
تسحبت بالسياره لقطر ولقيته أرخص عند الجيده

الف شكر لكم اخواني
وهذا العشم فيكم .. تجاوب اكثر من جميل
والله يحفظ بلادنا الخليجيه والعربيه من كل شر
حسب ماذكرتوه ان المواد الغذائيه اسعارها قريبه من السعوديه
اما الأشياء غير الإستهلاكيه تفرق شوي مثل مواد بناء وقطع غيار سيارات ايضآ اجارات السكن
والجوال له رسوم، لكن الكهرب والماء مجانآ للقطريين

• راح اقول لكم كلام احد الأصحاب .. يقول ان علبة البيبسي تصل 8 ريال في الجمعيات !

شكرآ لكم .. ونطمع بمزيد من المعلومات والنقاش.