تصحيح الرحله من 23 مايو الى 6 يونيو
لمده 14 يوم

وعليكم السلام ورحمة الله وبركاته ::
حياك الله أخوي ..والله يسهل لكم سفرتكم .
والله اخوي ..بالنسبة لسويسرا ...الافضل توفر سيارة .
لكن من باريس الى سويسرا ..هل عندك نية لأخذ سيارة ..ولا بالقطار .؟
لأن ممكن تروحون بالقطار ..وممكن بالسيارة .
والسيارة افضل من وجهة نظري اذا كنتم شباب .
المخطط المقترح يكون كالتالي :
الوصول الى باريس والاقامة ثلاثة ايام .
لوزيرن او زيورخ يومين
انترلكن اربعة ايام
جنيف يومين
باريس يوم واحد .
(هذا المخطط ايضا مناسب اذا كانت تنقلاتكم كلها بالقطار)
وممكن تطلعون من باريس الى ستراسبورغ الفرنسية بالقطار..ثم اخذ السيارة ..اذا كان ودكم ايضا زيارة اليوروب بارك مدينة الالعاب ..وقضاء يومين فيها
والباقي في انترلكن 4 وجنيف 2.
وفي انتظار رأيك

والله خط السير جميل لكن نسيت اخبرك اننا حاطين في البال اننا نزور كان ونجلس فيها 4 ايام
اذا تقدر تعيد تجدول لي الخط باضافه كان راح اكون من الشاكرين لك
وبالنسبه للسياره او القطار بصراحه حاطين في البال راح نستاجر السياره بعد مانغادر باريس
اما باريس حاطين مخطط ان المواصلات تكون بالباصات وبالقطارات
وحتى الرحله من باريس الى كان راح تكون بالقطار
يعني المبدئي اننا راح نجلس في باريس يومين حال الوصول او ثلاثه ونغادر بالقطار
الى كان اربع ايام او خمسه بما فيها زيارات للارياف القريبه وبنكون استئجرنا السياره
وبعد كذا انترلاكن خمس ايام وبعدها لجنيف لمده يوم نسلم السياره
ومن ثم العوده الى باريس بالقطار
^
يهمني رايك اخوي ميدو ويهمني نصائحك وترا هذي اول رحله لنا عشان كذا اتوقع ان فيه اخطاء كبيره في خط السير
وفي المواصلات اللي كتبتها لك
ابيك تعقب على خط السير والمواصلات وكذلك مقترحات
والدعوه مفتوحه لبقيه الاعضاء للانتقاد والنصائح
واتمنى اشوف منكم تفاعل

ام ..أوكي ..براحتك ..
يصير المخطط :
باريس 3
كان 4
أنسي يومين
انترلكن 4
باريس يوم واحد
المسافة من كان الى انسي 553 كم
والمسافة بين انسي وانترلكن 255 كم
والمسافة بين انترلكن وباريس 628 كم.
وفي انتظار رأيك

شكرا من القلب على تفاعلك وطولت بالك اخي الكريمومخططك جميل واشكر لك افادتك بالمسافه بين المناطق
واعتقد ان هذا هو خط السير اللي راح اقدمه للزملاء
وبالاخير جزاك الله خير والله يوفقنا لاختيار المخطط المناسب
سواءا مخططي او مخططات زملائي
بس ناقص شي واحد
وهو نصيحتك من ناحيه المواصلات
من اول يوم لنا لاخر يوم لنا
يعني عطني تفصيل لافضل السبل من ناحيه المواصلات
عارف ازعجتك والله بس يشهد الله اني ادعيلك لانك الوحيد المتفاعل معي

العفو أخوي ...ولو ..على عيني ..تامر امر ..
عشان اكون صريح معاك ..انا تفاجأت يوم قلت لي انك بتاخذ سيارة في كان ..وانك اصلا بتجلس فيها اربعة ايام ..يعني مو لحالها ..معاها نيس وانتيب وموناكو وتولون, ..ومرسيليا 200 كم عنها .
وقلت اكيد انك مغرم بالانشطة البحرية اكثر ..فقلت أوكي ...اختيار موفق .
طيب انت قررت تاخذ سيارة لزيارة الارياف في كان ..والمسافة بينها وبين أنسي فوق 500 كم ..اشوفها لشباب مسافة بسيطة واستمتاع بالريف الفرنسي .
ممكن مخطط اخر ..اذا كان ودكم كشباب تزورون ميلان ..انكم تجلسون فيها يومين ..وبينها وبين كان تقريبا 350 كم ..وتجلسون يومين فيها .
وبين ميلان وانترلكن ..300 كم تقريبا.
فيصير :
باريس 2
كان 4
ميلان 2
وبعدها على انترلكن 4
جنيف يوم واحد
ويوم في باريس والعودة .
تسليم السيارة يكون في مطار جنيف الجانب الفرنسي ..ومن محطة قطار مطار جنيف ..الى باريس بالقطار .
بس راح تكون اغلى بخصوص انكم ثلاثة اشخاص .
وممكن تلغون جنيف ..وتطلعون من انترلكن الى باريس دايركت وتجلسون فيها اخر يومين .
وتسليم السيارة يكون عند الوصول الى باريس .
يعني :
باريس 2
كان 4
ميلان 2
انترلكن 4
باريس 2
>>> جاي مرتب 2 - 4 -2 -4 -2 .
انا بصراحة ..عجبني المخطط الاخير ..متناسق .
من باريس الى كان قطار
من كان الى ميلان الى انترلكن الى باريس.. سيارة.
انت استخير الله ..وشاور الزملاء ..والله يكتب لكم اللي فيه الخير .
وعلى قول المثل ..كل الطرق تؤدي الى روما ..حاول تثبت على مخطط عشان تبدأ بالمرحلة الثانية وهي حجوزات الفنادق والسيارة ومعرفة الانشطة المهمة اللي ممكن تسويها .
وفي انتظار رأيك .

بصراحه خط السير الاخير روعه اروعه روعه واعجبني جدا ومثل ماقلت لازم نثبت على خط سير عشان نبدا البوكنق والاماكن السياحيه والتخطيط الشامل
اعجبني المخطط الاخير خصوصا ان السياره بتكون معنا 10 ايام ووفرنا حق اربع ايام
وبرضو ميلان لما ذكرتها شديتني لها مع العلم اني ماقريت عنها شي ولا اعرف شي عنها
بس من باب الحماس راح اطرحها لان فعلا المخطط اللي طرحته جدا جدا روعه وماقدر اوصفلك سعادتي يالغالي
انا اعتمدت مخططك الاخير كامل بكل تفاصيله وبدون تعديلات وراح اطرحه للشباب
وما اقول الا جزاك الله كل خير ويسعدك ويوفقك ويحقق لك كل ماتتمنى يا اخي العزيز