1. بسم الله الرحمن الرحيم


2. الباقي بالرنقت 6,636.56


3. ريال 6,794.37

بسم الله الرحمن الرحيم

حجزي لماليزيا على الخطوط السعودية كان في 17 اغسطس 2006 وقررت ان ابداء حجوزاتي للسكن من بدري لكي اتقي الزحام فبدأت بعمل الحجوزات في شهر 6 ميلادي أي قبل سفرتي بشهر ونصف تقريباً مع مكاتب السياحه في الرياض وتفاجأة بغلاء الاسعار وبالصدفه في يوم شفت البانر الموجود في منتدى المسافرون العرب عن مكتب السوداني للسياحة الموجود في ماليزيا فقلت في نفسي منتدى مثل المسافرون العرب ماراح يضع دعايه لأي مكتب الا وهو أكيد واثق فيه ومجرب من قبل لأن المنتدى كامل بكل معنى الكلمه من جميع النواحي السياحية. المهم نزلت موضوع اطلب فيه من الأعضاء اذا أحد يعرف شي عن مكتب السوداني أو قد تعامل معه من قبل رد على البعض بالمدح والبعض الأخر بأن افضل لك خذ من ديرتك أحسن لك والبعض الأخر قال سوف ننتظر مغامرتك . توكلت على الله لأن بطبعي أحب المغامرات وراسلت مكتب السوداني بطلباتي ورد علي بأسعاره وقال لي كل الفنادق والغرف اللي أنت طالب موجودة وهي كالتالي مع الأسعار:
الفتره- Hotel - الفندق - وصف الغرفة- سعر الليله- عدد الليالي- المجموع
1 )18-23 Aug Golden Sands Resort الرمال الذهبية دبل ديلوكس مطله على البحر مع الأفطار 560 5 2800
2 )23-25 Aug Sunway lagoon Resort صن واي دبل ديلوكس مطله على الألعاب المائية مع الأفطار 540 2 1080
3 )25-27 Aug A'famosa Resort افاموسى دبل ديلوكس مطله على ملعب القولف مع الأفطار 230 2 460
4 )27 Aug - 01 Sep Marriott Hotel ماريوت دبل ديلوكس مطله مع الأفطار 390 5 1950
5 )01-06 Sep Mandarin Oriental مندرين دبل ديلوكس مطله على الحديقة مع الأفطار 480 5 2400
مجموع قيمة السكن بالرنقت 8690
خدمة مكتب السوداني 9% 782
المجموع الكلي قيمة السكن + 9% 9472
المدفوع كحواله 2900 ريال في تاريخ 1 / 6 2,835.44 رنقت

الباقي بالرنقت 6,636.56

ريال 6,794.37

وقال لي لازم تحول لي 30% وحولت له وكلمته تقريباً بالتلفون 10 مكالمات أأكد حجوزاتي ومره كنت طالب الخيول الذهبيه ورجعت وكنسلتها قبل ذهابي ب 3 اسابيع وكلمته هاتفياً ووافق وهذا الجدول بالأعلى أخر جدول اتفقنا عليه انا والشخص المسؤول هناك في المكتب( اللي هو صاحب المكتب) وقبل ما أغادر السعوديه بثلاثة أيام كنت ناوي أكلم الفنادق عشان أتأكد من الحجوزات ولهيت ولا سويتها المهم كلمته هو عشان أتأكد من حجوزاتي كلش تمام ولا لا مع أنه معاه رقم جوالي والبريد الالكتروني تبعي اكتشفت لما كلمته يقول لي السن واي لاقون ماحجزت لك فيه لأن فيه مكتب من السعوديه حاجز لك فيه طيب يابني أدم ارقامي كلها معاك كلمني سوي أي شي المهم وارسل فاكس للفندق بتوقيعي بأن المسؤول عن حجوزاتي فقط مكتب السوداني .
وأتوكل على الله وأسافر لما وصلنا قابلني مندوبهم هناك وعطاني الفاوتشرز على حسب الجدول بالأعلى لما شفت الفاوتشرز ضاق صدري أولا مكتوبه باليد كأننا في الستينيات ثانياً لم يكتب فيها وصف كامل للغرفه فقط كاتب غرفه ديلوكس المهم اني ارتبت من الموضوع فقلت له أكيد كل الحجوزات مؤكده ومدفوعه قال اذا حصل لك أي مشكله أرقامنا معك كلش تمام وكنت متفق معاه أحاسبه بالدولار وحاسبته وركبت طيارتي لبينانق ووصلت الحمد لله فندق الرمال الذهبية Golden Sands لما طلعت الفاوتشر وسلمته للرسبشن طقطقت وطلعت الفاكس الأصلي اللي واصلهم بحجزي قالت غرفتك غير مطله على البحر على حسب الفاكس الأصلي قلت لها الفاوتشر اللي معي يقول غرفه ديلوكس قالت بله وأشرب مويته أحنا ماعلينا الا من الفاكس اللي يوصلنا والقيمه اللي أندفعت لغرفتك غرفه غير مطله وأكلم عليه وقال لي ولا يهمك انت خذ الغرفه اللي عطوك وبكره بنحل المشكله طبعاً انا تعبان وعيالي تعبانين فخذنا الغرفة وقلت خلنا نشوف تاليتها . من بكره كلمت الاستقبال وسألتهم صار شي قالوا ما صار شي وانتظر للظهر واكلم عليه وردت علي بنت عربيه قالت انه ناسي جواله وأنا سكرتيرته وموضوعك عندي وأبحله لكن اليوم السبت اجازه وبكره اجازه والمكتب اللي حاجز لك مسكر قلت أفا هذا أول فندق الله يعين على الباقي طبعاً قلت ابترك الموضوع عشان ما أحرق اجازتي ولا اخربها على عيالي وطبعاً معاد كلموني ولا عدلوا الغرفه ولا أي شي وبقيت في الغرفه 5 ليالي.
طلعت من بينانق ورحت لكوالالمبور الأن دور سن واي لاقون طبعا طول الوقت وأنا حاط يدي على قلبي لما وصلنا وعطيته الفاوتشر طقطق وأشوى لقى حجز قلت انا مهيب مشكله المواصفات أهم شي نلقى غرفة . ذا المره الغرفه على المطلوب بس بدل ما السرير كبير صار سريرين صغار منفصلات Twin قلت معليش.
الأن دور منتجع أفاموزا رحت له طبعا المنطقة مقطوعة لما وصلت الفندق وأقدم الفاوتشر دور حجز لي دور دور جلس تقريباً 15 دقيقه وهو يدور ويكلم مكتب الحجز في كوالا في الأخير قال ياولد الحلال ما عندنا لك حجز قلت دور زين معي طفل وتعبانين قال الفندق فل مليان اليوم وبكره وكل الأيام الجايه وأكلم على المكتب ورد قال احنا حاجزين وقام يعطيني من الكلام الفاضي وحولني على واحد من الموظفين عنده يقول هو المسؤول عن حجزك لأني مشغول كلمت المسؤول هذا وقام يبرر وربع ساعه وأنا وياه هواش وملاجد في الأخير قال عطني الاستقبال وقال لهم سكنوه في أي شي قالت فيه فله 3 غرف ب 888 رنقت قال اوكي سكنيه وطول ذا الليلتين وانا مكالمات معهم هاه سددتو بكره بكره الين في الأخير سددوا بس نصيحه اللي يروح لأفموسى لا يسكن في فله اولا شينه وثانياً بعيده اذا بغيت الباص يجيك تتصل عليهم وياله يجيك بعد ربع ساعه واذا جاك لازم تكون تحتريه عند الباب ولا ما يلتفت يروح ويخليك اللى اللي معه عائلة كبيره.
الأن جاء دور ماريوت الحمد لله كلش زين الحجوزات تمام ماعدا انها غير مطله على شارع العرب.
وأنا في ماريوت كلمت فندق مندرين أورينتال قلت فيه حجز بأسمي قالو فيه لك يوم واحد فقط وأنا حاجز 5 ليالي رجعت وكلمت المكتب قال أنا خسران الأن كيف تبغاني أدفع لك أنا دفعت لك في أفاموسى 888 عن الليله الوحده قلت له هذا غلطك مش غلطي الفاوتشر اللي معاي يقول غرفه لنفرين أنا طالب غرفه لنفرين مش فله هذا غلطك وتتحمله ما أتحمله أنا جا في بالي اذا عصلق معاي راح أخذ الفاوتشر اللي معاي وعلى شرطة السياحه المهم جلست أنا وياه على التلفون في نقاش وأرتفع الصوت وكان غير محترم في بعض كلماته في الأخير قال وافق على تسويت الموضوع والدفع للمندرين أورينتال بعد يومين شيكت مع المندرين قالوا لي دفعت قيمة الغرفه لما رحت للمندرين طبعاً لوه لاقي لي غرفه في الحوش حجزها لي غير مطله لكن الحمد لله ، الله رزقني بعرض ممتاز قدمه لي الفندق لما وصلت كان في الفندق غرف مشغوله طول السنه اللي هي غرف أخر دور وعلى الزاويه يعني يكون لها مطلين زاويه على الحديقه وزاويه على المدينه وفي أخر دور ومساحتها أكبر من الغرف الثانيه وحمامها أكبر وفيها غرفة ملابس ونص جدرانها زجاج يعني كأنك في السحاب ولها خدمه خاصه وكل يوم يحطون لك في الغرفة صينية فيها فاكهة شكل طبعاً الفاكهه اللي يحطونها اول مره أشوفها في حياتي والفرق كله 680 رنقت .
وبكذا يكون مكتب السوداني للسياحة جعل رحلتي لماليزيا كابوس.