مرحبا بك أخي الكريم في الكويت وإليك برنامج مختصر وبعض الأماكن السياحيه :
أنصحك بالسكن في شقق السالميه
المطاعم :
1 - فريج صويلح بالسالميه ( أكلات شعبيه ممتازه )
2 - مطعم مركز سلطان بالسالميه على البحر ( أحلى وأرخص أفطار )
3 - مجموعات مطاعم ومقاهي يمكن أكثر من عشرة شمال المارينا مول .
المراكز :
1 - مارينا مول بالسالميه
2 - سوق شرف على شارع الخليج العربي قرب الأبراج
3 - مجمع المهلب بمنطقة حولي
4 - مجمع أفينوس الدائري الخامس بمنطقة الشويخ
5- مجموعة مراكز تجاريه بالسالميه أشهرها الفنار
الأماكن الترفيهيه :
1 - المتحف العلمي ( أوكيريم ) بمنطقة الرأس
2 - مدينة ألعاب الدوحه
3 - مدينة ألعاب الشعب
4 - أبراج الكويت
المقاهي :
1 - مجموعة مقاهي قرب المارينا مول
2 - مقهي ليالي الحلميه على شارع الخليج
كذلك أهم سوق الكويت الشعبي وأهمه سوق المباركيه والمطاعم والمقاهي وسفره سعيده

ابو الاء اله يخليلك الاء
تسلم على المعلومات هذي .. مختصر عجوبي
بعد عندي سؤالين ... ادري مصختها بس حياكم شويه متاي
اي احسن المجمعات .. اسعارها مناسبة ..
ووين احسن مكان حق السينما..
ومطعم فريج صويلح ينفع حق العائلات ..
و..
كاني قلت بس سؤالين ..

كل الأسواق فيهم سينما
لكن الأفضل .. سينما الأفينيوز أو سينما المارينا
و شكرا عالمتاي

اسفرت وانورت الكويت حياكم الله بديرتنا............................
عليك وعلي شارع سالم المبارك.................وفية مجمع الفنار ومجمع البستان...........مركز سلطان............وكل الكافيهات.............من ستار بوكس وانت رايح....................وفي هناك مطعم فريج صويلح كما ذكر ابوالاء.....................سنتربوينت............. .والسينما بكل المجمعات................
شارع الخليج العربي من بداية تدش المركز العلمي .........الاكوريوم اهم شي تبي تدش باقي الاماكن كيفك...........بعدها انطلق الي مارينا مول بنفس الشارع...................وفية مطاعم الوجبات السريعة فوق مع السينمات وتجول بالمجمع ترا فية اشياء حلوة وكفيهات................وبعدها الي الابراج وبعدها دشة لسوق شرق................ولاتنسا لو كنت من محبي الالعاب الخطرة تدخل مدينة الشعب الترفيهية......هم علي شارع الخليج.................ومجمع الافينوز......................وحياك الله بالكويت.....................ولو تقدر تدش مطعم قيصر بالسالمية وتطلبلك واحد سيزلر مشكل واو

مراكز التسوق اللي لازم تزورها...
1- الأفنيوز (منطقة الري, طريق الدائري الخامس السريع), فيه 12 صالة سينما و راقي جدا, حيث انه الأكبر بالكويت.
2- مارينا مول:مجمعين يربطهما جسر فوق شارع الخليج العربي, والأول هو الرئيسي و له إطلالة على شارع سالم المبارك, و يضم عدد كبير جدا من المحلات التجارية,المطاعم,المقاهي, مرافق ترفيهية و غيرها.
و الثاني يقع على الواجهة البحرية, و يضم عدد من المقاهي و المطاعم الفاخرة, و إطلالة رائعة على الخليج العربي.
3- المركز العلمي: أكواريوم(و هو الأكبر في الشرق الأوسط و أفريقيا) حيث يمكنك رؤية البيئة الطبيعية بشتى أنواعها, و يمكنك رؤية أنواع الأسماك "أبرزها القروش" حيث لا يفصلك عنها سوا "زجاجة".
كما يمكنك دخول قاعة الإستكشاف في هذا المرفق"الديسكفري", و دخول سينما "آي ماكس"
4- شارع سالم المبارك : يعتبر القلب النابض لمدينة السالمية, و يضم اكثر من 10 مجمعات, و عدد كبير من المطاعم,المقاهي,الأسواق,دور السينما و غيرها...
5- مطاعم و مقاهي شارع الخليج العربي...حيث أن هناك مطعم في كل بضعة كيلومترات في هذا الشارع المميز.
6- الأماكن التراثية و المتاحف (متحف ديكسون-شارع الخليج, المتحف الوطني..الخ)+ سوق المباركية الأقدم في الكويت و يقع في قلب مدينة الكويت.
و العديد العديد.

وانا احب اشارك في ها الردود لاني اعتبر نفسي واحد من اهل ها البلد
لاتطوفك المجمعات الحلوه والجو الحلو والقعدات الشعبيه اللي على البحر وسوق الصفاة والاهم من هذا وهذا الشعب الطيب الحبوب الاخلاق

زعطوطه العجيبة : شكرا على الرد وبالعافية على المتاي
soso swet: خليتيني اركز على سيزلر المشكل هذا .. لازم اطلبه .. ما قصرتي كفيتي ووفيتي..
Dhar: تسلم لي على الشرح والتفصيل الحلو .. خاطري اروح كل هذي الاماكن .. بس شكلها 3 ايام ماتكفي..
سواح999 : والله صدقت .. فعلا ابصم على كلامك بالعشرة.. الكويتيين والبحرينين اهل واكثر..
بس تبون الصج .. انا كانت لي 5 محاولات ان ايي الكويت بس كلها بائت بالفشل .. سواء مع ربعي او مع الاهل.. دايما اخر الوقت يصيدني شي واعتذر .. اهمه يروحون وانا اقعد في البحرين ( مع انه انا اللي ارتب لهم السكن دايما )
ان شاء الله هالمرة تنجح المحاولة ببركة زوجتي
مع اني اخاف اتكون الكويت ازحم من البحرين في العيد .. بس تغير جو زين

السلام عليكم و رحمة الله
نبدي بال ..
الأسواق و المجمعات الكبيرة
الأفينيوز >> على امتداد الدائري الخامس ( الأكبر و الأحدث )
رابط لزيارتي للأفينيوز اضغط هنا https://artravelers.com/p/re/155059
سوق شرق >> بشرق
المارينا مول >> بالسالمية
المهلب >> بحولي
الكوت >> فحيحيل و لا تطوفكم القعده عالنافوره بهالجو الروعه
و بكل سوق في مطاعم و سينما
سوق المباركية >> سوق شعبي
المطاعم
ميس الغانم >>مشاوي
برج الحمام >> مشاوي
مغل محل >> هندي
مطاعم شارع الخليج
أس أس دانه >للأكلات البحريه
بافلوز كافيه > أمريكي ...
دجاج تكا > مشويات ...
جوني كارينوز > ايطالي
نينو .. فرايديز .. فدركرز .. لي نوتر ... أبل بيز.. تشيليز .. روبي تيوزدي
و داخل كل سوق تحصل مطاعم و ان شاء الله ترضي كل الأذواق
أماكن تستحق الزيارة
أبراج الكويت
المركز العلمي ( سينما الأيماكس و الكورايوم )
المدينة الترفيهية >> بالدوحه
هذا جدول قدمته لأحد العضوات و ان شاء الله يعجبك
يوم المارينا :
روحو المارينا و تسووقو فيه و تغدو و ان شاء الله تستانسون بالكافيه شوب و بالتسوق
و بعدين روحو المركز العلمي و دشوو الأيماكس و بعدها الكورايوم
و اخر شي روحو تعشو باحد مطاعم اللي عالبحر
روحو المارينا + المركز العلمي + مطعم عالبحر
يوم الأفينيوز :
يبيله من الصبح و تقعدون فيه لي المغرب و راح ان شاء الله تستانسون فيه
في محلات و كافيهات و سينما و ايكيا و كارفور
+.. أي نشاط ودكم تسوونه
الأفينيوز + أي شي ودكم تسوونه
يوم الكوت او المهلب :
بهاليوم قعدو من اصبح و روحو المدينة الترفيهية
و بوقت المغرب روحو سوق ( المهلب او الكوت )
انا افضل الكوت لان الحين الجو حلو و هناك القعدات حيل حلوه
الكوت + و قعدو بالكافي شوب عند النافوره و الجو الحلو
و روحو سوق المنشر .. سوق اصغر من الكوت لكن يمه .. بينهم شارع بس
و عقبها روحو تعشو بمطعم .
المدينة الترفيهيه + الكوت و المنشر + مطعم
يوم سوق شرق
روحو سوق شرق و تغدو فيه
و بعدها روحو المباركيه و فيها قهوات شعبيه
و بعد ما تخلصون من المباركيه روحو مطعم ميس الغانم
سوق شرق + سوق المباركية + مطعم ميس الغانم
تحياتي لكم جميعا
زعطوطه

وينعاد على الجميع بالصحه والعافيه